ഫറ്റോര്ഡ(ഗോവ): ഇന്ത്യന് സൂപ്പര് ലീഗിന്റെ കലാശപ്പോരില് എടികെ ഇന്ന് ചെന്നൈയിന് എഫ്സിയുമായി കൊമ്പുകോര്ക്കും. ആരു ജയിച്ചാലും അത് ചരിത്രമാകും. മൂന്ന് തവണ ഐഎസ്എല് കിരീടം തലയിലേറ്റിയ ടീമെന്ന റെക്കോഡ് അവര്ക്ക് സ്വന്തമാകും. എടികെയും ചെന്നൈയിനും രണ്ട് തവണ വീതം ഐഎസ്എല് കിരീം ചൂടിയിട്ടുണ്ട്. ഫറ്റോര്ഡ സ്റ്റേഡിയത്തില് രാത്രി 7.30 ന് കളി തുടങ്ങും. കാണികള്ക്ക് പ്രവേശനമില്ല.
ഈ സീസണില് ഏറ്റവും സ്ഥിരതയാര്ന്ന പ്രകടനം കാഴ്ചവച്ച എടികെയും തുടക്കത്തിലെ തകര്ച്ചയ്ക്ക് ശേഷം കൂടുല് കരുത്തോടെ തിരിച്ചെത്തിയ ചെന്നൈയിനും തമ്മിലുള്ള പോരാട്ടം പൊടിപാറുമെന്ന് ഉറപ്പാണ്.
സീസണിലെ പകുതി മത്സരങ്ങള്ക്ക് ശേഷം ജോണ് ഗ്രിഗറിയില് നിന്ന് ഓവന് കോയ്ലി മുഖ്യ പരിശീലകസ്ഥാനം ഏറ്റെടുത്തതോടെയാണ് ചെന്നൈയിന്റെ തലവര മാറിയത്. പന്നില് നിന്ന് പൊരുതിക്കയറിയ അവര് ലീഗില് മൂന്നാം സ്ഥാനക്കാരായാണ് പ്ലേ ഓഫിന് യോഗ്യത നേടിയത്.
ലീഗ് റൗണ്ടില് ഒന്നാം സ്ഥാനത്തെത്തിയ എഫ്സി ഗോവയെ സെമിയില് അട്ടിമറിച്ചാണ് ചെന്നൈയിന് കലാശപ്പോരാട്ടത്തില് എടികെയെ നേരിടാന് അര്ഹത നേടിയത്.കൊല്ക്കത്തയിലെ സാള്ട്ട്ലേക്ക് സ്റ്റേഡിയത്തില് നടന്ന ലീഗ് മത്സരത്തില് എടികെയെ തോല്പ്പിച്ചത് ചെന്നൈയിന്റെ ആത്മവീര്യം ഉയര്ത്തിയിട്ടുണ്ട്. മുന്നേറ്റ നിരക്കാരായ നെര്ജിസ് വല്സ്കീസും റാഫേല് ക്രിവല്ലെറോയും മികച്ച ഫോമിലാണ്. ഇവര് എടികെയുടെ പ്രതിരോധത്തില് വിള്ളല് തീര്ക്കും. എല് സാബിയ, ലൂസിയന് തുടങ്ങിയ പരിചയസമ്പന്നന്മാരുടെ സാന്നിദ്ധ്യവും ടീമിന് കരുത്ത് പകരും.
തങ്ങള്ക്ക് പ്രഥമ ഐഎസ്എല് കിരീടം നേടി തന്ന മുഖ്യപരിശീലകന് അന്റോണിയോ ഹാബസിന്റെ ശിക്ഷണത്തിലാണ് എടികെ മൂന്നാം കിരീടം പിടിക്കാനിറങ്ങുന്നത്. നിലവിലെ ചാമ്പ്യന്മാരായ ബെംഗളൂരു എഫ്സിയെ തോല്പ്പിച്ചാണ് എടികെ ഫൈനലില് കടന്നത്.
ഈ സീസണില് മിന്നുന്ന പ്രകടനം കാഴച്വച്ചുവരുന്ന മുന്നിരക്കാരായ ഡേവിഡ് വില്യംസും കൃഷ്ണയുമാണ് എടികെയുടെ ശക്തികേന്ദ്രങ്ങള്. ഇന്ത്യന് ടീമംഗങ്ങളായ പ്രീതം കോട്ടല്, പ്രബീര് ദാസ്, സുമിത് രതി എന്നിവരും മകിച്ച ഫോമിലാണ്.
