കൊല്ലം: പള്ളിമണ് ഇളവൂരില് നിന്ന് കാണാതായ ആറ് വയസുകാരി ദേവനന്ദയുടെ മൃതദേഹം കണ്ടെത്തി. കുട്ടിയുടെ വീടിന് സമീപത്തായുള്ള ഇത്തിക്കരയാറ്റില് നിന്നാണ് മൃതദേഹം കണ്ടെത്തിയത്. മുങ്ങല് വിദഗ്ധര് നടത്തിയ തെരച്ചിലില് മൃതദേഹം കണ്ടെത്തുകയായിരുന്നു.
കുട്ടിയെ കാണാതായ സമയത്ത് ധരിച്ചിരുന്ന വസ്ത്രങ്ങളാണ് പുഴയില് നിന്ന് ലഭിച്ച മൃതദേഹത്തിലുള്ളത്. ഇത്തിക്കരയാറ്റിലെ കുറ്റിക്കാടിനോട് ചേര്ന്ന് കമഴ്ന്ന് കിടക്കുന്ന നിലയിലായിരുന്നു മൃതദേഹം.
പള്ളിമണ് ഇളവൂര് സ്വദേശികളായ പ്രദീപ് – ധന്യ ദമ്പതികളുടെ മകളാണ് കാണാതായ ദേവനന്ദ. വീട്ടില് കളിക്കുന്നതിനിടെ ഇന്നലെ രാവിലെയാണ് കുട്ടിയെ കാണാതായത്.ഇന്നലെ രാവിലെ 9.30 നും 10.30 നും ഇടയിലാണ് കുട്ടിയെ കാണാതായത്.
കുട്ടിയുടെ അമ്മ ഈ സമയം തുണി അലക്കി കൊണ്ടിരിക്കുകയായിരുന്നു. സമീപ പ്രദേശത്തെ ക്ഷേത്രത്തില് ഉത്സവ ചടങ്ങുകള് നടക്കുകയാണ്. അതിനാല് ഇന്നലെ കുട്ടി സ്കൂളില് പോയിരുന്നില്ല.
കുട്ടിയെ കണാതായതിനെ തുടര്ന്ന് ബന്ധുക്കളും പ്രദേശവാസികളും സമീപത്തായി തെരച്ചില് നടത്തിയെങ്കിലും കണ്ടെത്താനായിരുന്നില്ല. കുട്ടിയെ കണ്ടെത്താന് കഴിയാത്തതോടെ കണ്ണനല്ലൂര് പോലീസ് സ്റ്റേഷനില് വിവരം അറിയിക്കുകയായിരുന്നു. തുടര്ന്ന് പോലീസും അഗ്നിശമന സേനാംഗങ്ങളും തിരച്ചില് നടത്തുകയായിരുന്നു. ഇതുമായി ബന്ധപ്പെട്ട് ബാലാവകാശ കമ്മിഷനും വ്യാഴാഴ്ച കേസെടുത്തിരുന്നു. ബാലാവകാശ കമ്മീഷന് ഇന്നലെ കേസെടുത്തിരുന്നു.
