തിരുവനന്തപുരം: കേരള പൊലീസിന്റെ തോക്കുകളും വെടിയുണ്ടകളും കാണാതായ സംഭവത്തെ ന്യായീകരിച്ച് ആഭ്യന്തര സെക്രട്ടറിയുടെ റിപ്പോര്ട്ട്. സംഭവത്തില് വീഴ്ച സംഭവിച്ചിട്ടുണ്ടെന്ന സിഎജിയുടെ കണ്ടെത്തലുകളില് അസഹിഷ്ണുത പ്രകടിപ്പിച്ചുള്ള ആഭ്യന്തര സെക്രട്ടറി മുഖ്യമന്ത്രിക്ക് സമര്പ്പിച്ച റിപ്പോര്ട്ടില് രജിസ്റ്ററില് രേഖപ്പെടുത്തുന്നതിലെ പിഴവ് മാത്രമാണ് സംഭവിച്ചതെന്നാണ് വാദിച്ചിരിക്കുന്നത്. തോക്കുകള് കാണാതായിട്ടില്ലെന്ന ക്രൈംബ്രാഞ്ചിന്റെ കണ്ടെത്തല് ആഭ്യന്തര സെക്രട്ടറി ശരിവയ്ക്കുന്നതായാണ് റിപ്പോര്ട്ടില് വ്യക്തമാക്കിയിരിക്കുന്നത്.
രജിസ്റ്ററില് രേഖപ്പെടുത്തുന്നതിലെ പിഴവ് മാത്രമാണ് ഉണ്ടായത്. തോക്കുകളും തിരകളും കാണായിട്ടില്ല. രജിസ്റ്ററില് രേഖപ്പെടുത്തുന്നതിലെ പിഴവ് മാത്രമാണ് ഉണ്ടായത്. 94 മുതല് തോക്കുകളുടെ രെജിസ്റ്റര് സൂക്ഷിക്കുന്നതില് വീഴ്ച്ച ഉണ്ട്. ആയുധങ്ങളും വെടി കോപ്പുകളും കാണാനില്ലെന്ന് പറഞ്ഞ്, സുരക്ഷ പ്രശനം ഉണ്ടെന്ന പ്രചാരണം നടത്തുന്നത് തെറ്റാണ്. ഫണ്ട് വകമാറ്റിയതിനെ സര്ക്കാര് അംഗീകരിച്ചിട്ടുണ്ട്. ഉപകരണങ്ങള് വാങ്ങിയത് സര്ക്കാര് സ്ഥപനമായ കെല്ട്രോണ് വഴി. പോലീസ് ചട്ടം ലംഘിച്ചിട്ടില്ലെന്നും ആഭ്യന്തര സെക്രട്ടറിയുടെ റിപ്പോര്ട്ട് പറയുന്നു.
കെല്ട്രോണിന്റെ ഭാഗത്തുള്ള വീഴ്ചയാണ് സിഎജി ചൂണ്ടിക്കാട്ടിയത്. എന്നാല് കെല്ട്രോണിനെ കുറ്റപ്പെടുന്നത് നീതിപൂര്വ്വമല്ലെന്നും ആഭ്യന്തര സെക്രട്ടറി റിപ്പോര്ട്ടില് പറയുന്നു. ഡിജിപിയുടെ പേരെടുത്ത് പറഞ്ഞതിന് സിഎജിയെ ആഭ്യന്തര സെക്രട്ടറി തന്റെ റിപ്പോര്ട്ടില് വിമര്ശിച്ചു. ഇത്തരം വിമര്ശനം സിഎജി നടത്തുന്നത് പതിവില്ലെന്നും ആഭ്യന്തര സെക്രട്ടറി അഭിപ്രായപ്പെടുന്നു.
ഡിജിപിക്കു ഔദ്യോഗിക വസതി ഇല്ലാത്തത് കൊണ്ടാണ് വില്ല പണിതത്. ബുള്ളറ്റ് പ്രൂഫ് വാഹനം വാങ്ങാന് തുറന്ന ടെന്ഡര് വിളിക്കാതിരുന്നത് സുരക്ഷ മുന്നിര്ത്തിയാണ് എന്നും ആഭ്യന്തര സെക്രട്ടറി പറഞ്ഞു. ജിപിഎസ് ടാബ്ലറ്റ് പാനസോണികില് നിന്നും വാങ്ങിയത്, മാറ്റ് കമ്പനികള്ക്ക് സേവന കേന്ദ്രങ്ങള് ഇല്ലാത്തത് കൊണ്ടാണ്.
കേരളാ പോലീസിന്റെ ആയുധശേഖരത്തില് നിന്ന് വന്തോതില് വെടിക്കോപ്പുകളും ഉണ്ടകളും റൈഫിളുകളും കാണാതായെന്നാണ് സിഎജി കണ്ടെത്തല്. 12,061 വെടിയുണ്ടകളുടെ കുറവാണ് കണ്ടെത്തിയിരിക്കുന്നത്. കാണാതായവയ്ക്ക് പകരം വ്യാജ വെടിയുണ്ടകള് വയ്ക്കുകയും സംഭവം മറച്ചു വയ്ക്കാന് ഉദ്യോഗസ്ഥര് ശ്രമിക്കുകയും ചെയ്തു. രേഖകള് തിരുത്തി കുറ്റക്കാരെ സംരക്ഷിക്കാനാണ് ബന്ധപ്പെട്ട ഉദ്യോഗസ്ഥര് ശ്രമിച്ചതെന്നും സിഎജി കണ്ടെത്തിയിട്ടുണ്ട്.
അതേസമയം, വെടിയുണ്ടകള് കാണാതായ സംഭവം ഐ ജി ശ്രീജിത്തിന്റെ നേത്യത്വത്തിലുള്ള പ്രത്യേക സംഘം അന്വേഷിക്കും. ക്രൈംബ്രാഞ്ച് എസ് പി ഷാനവാസ് അന്വേഷണ ഉദ്യോഗസ്ഥന്. രണ്ട് മാസത്തിനുള്ളില് അന്വേഷണം പൂര്ത്തിയാക്കാനാണ് നിര്ദ്ദേശം.
