കോഴിക്കോട്: നക്സല് നേതാവ് വര്ഗീസ് അനുസ്മരണവും മുസ്ലിം തീവ്രവാദ സംഘടനകള് കൈയടക്കുന്നു. വര്ഗീസ് കൊല്ലപ്പെട്ടിട്ട് അമ്പതു വര്ഷം തികയുന്ന ഇന്ന് കോഴിക്കോട് നടക്കുന്ന അനുസ്മരണ സമ്മേളനത്തില് പങ്കെടുക്കുന്നത് പോപ്പുലര് ഫ്രണ്ട് ദേശീയ കൗണ്സില് അംഗം പ്രൊഫ. പി. കോയയും പിഡിപി നേതാവ് സി.കെ. അബ്ദുള് അസീസും. ജോയ് കൈതാരം ഉദ്ഘാടനം ചെയ്യുന്ന പരിപാടിയില് മുഖ്യപ്രഭാഷണം നടത്തുന്നത് പ്രൊഫ. കോയയാണ്.
വര്ഗീസ് അനുസ്മരണ സമിതിയുടെ പേരില് സംഘടിപ്പിക്കുന്ന രക്തസാക്ഷി ദിനാചരണ പരിപാടിയുടെ കണ്വീനര് വര്ഗീസിനൊപ്പം പ്രവര്ത്തിച്ച ഗ്രോ വാസുവാണ്. അടിയോരുടെ പെരുമന് എന്നറിയപ്പെടുന്ന വര്ഗീസിന്റെ രക്തസാക്ഷിത്വത്തെ മുസ്ലിം തീവ്രവാദ സംഘടനകള്ക്ക് ഏല്പ്പിച്ചു കൊടുത്തതില് പ്രതിഷേധവുമുയരുന്നുണ്ട്.കണ്ണൂരിലും വയനാട്ടിലും സിപിഐ(എംഎല്)ന്റെ വിവിധ ഗ്രൂപ്പുകളാണ് അനുസ്മരണ പരിപാടികള് സംഘടിപ്പിക്കുന്നത്.
മാവോയിസ്റ്റ്-മുസ്ലിം തീവ്രവാദ സംഘടനകള് ഒരുമിച്ചു പ്രവര്ത്തിക്കുന്നതിന്റെ തെളിവായാണ് ഇന്ന് നടക്കുന്ന അനുസ്മരണം ചൂണ്ടിക്കാണിക്കപ്പെടുന്നത്. എസ്ഡിപിഐയുടെയും പോപ്പുലര്ഫ്രണ്ടിന്റെയും മറ്റു നേതാക്കളും പൊറ്റമ്മലില് നടക്കുന്ന രക്തസാക്ഷി ദിനാചരണത്തില് പങ്കെടുക്കുന്നുണ്ട്.
