ന്യൂദല്‍ഹി : ജനാധിപത്യം ഉത്സവമാക്കൂവെന്ന് ആഹ്വാനവുമായി പ്രധാനമന്ത്രി നരേന്ദ്രമോദി. ദല്‍ഹി നിയമസഭാ തെരഞ്ഞെടുപ്പിനെ തുടര്‍ന്ന് ജനങ്ങള്‍ക്കായി നല്‍കിയ ട്വീറ്റിലാണ് മോദി ഇക്കാര്യം അറിയിച്ചത്.
ദല്‍ഹിയിലെ വോട്ടിങ് റെക്കോര്‍ഡിലെത്തിക്കണമെന്നും, സമ്മതിദാനാവാകാശം എല്ലാവരും വിനിയോഗിക്കണമെന്നും മോദി ആവശ്യപ്പെട്ടിട്ടുണ്ട്. 70 നിയമസഭാ മണ്ഡലങ്ങളിലേക്ക് നടക്കുന്ന തെരഞ്ഞെടുപ്പില്‍ 672 പേരാണ് ജനവിധി തേടുന്നത്. ഇതിനോടനുബന്ധിച്ച് തലസ്ഥാനത്ത് കനത്ത സുരക്ഷയാണ് ഏര്‍പ്പെടുത്തിയിരിക്കുന്നത്.
മിക്ക മണ്ഡലങ്ങളിലും ബിജെപിയും എഎപിയും തമ്മിലാണ് മത്സരം നടക്കുന്നത്. ബിജെപി ദേശീയ അധ്യക്ഷന്‍ ജെ.പി. നദ്ദ, ആഭ്യന്തര മന്ത്രി അമിത്ഷാ തുടങ്ങി വിവിധ കേന്ദ്ര മന്ത്രിമാര്‍ ദല്‍ഹിയില്‍ തെരഞ്ഞെടുപ്പ് പ്രചാരണം നടത്തിയിരുന്നു. മുഖ്യമന്ത്രി അരവിന്ദ് കേജ്‌രിവാളിന്റെ നേതൃത്വത്തിലാണ് ആംആദ്മി തെരഞ്ഞെടുപ്പ് പ്രചാരണം നടത്തുന്നത്. രാഹുലും പ്രിയങ്കയുമാണ് കോണ്‍ഗ്രസ്സിന്റെ സ്ഥാനാര്‍ത്ഥികള്‍ക്കായി തെരഞ്ഞെടുപ്പ് പ്രചാരണത്തിന് ഇറങ്ങിയത്.
എന്നാല്‍ ബിജെപിയും എഎപിയും തമ്മിലാണ് പ്രധാന മത്സരം നടക്കുന്നത്. കോണ്‍ഗ്രസ് തെരഞ്ഞെടുപ്പ് ചിത്രത്തില്‍ പോലും ഇല്ലാത്ത അവസ്ഥയിലേക്കാണ് ദല്‍ഹി തെരഞ്ഞെടുപ്പ് എത്തിനില്‍ക്കുന്നത്.
