തിരുവനന്തപുരം: ഗവര്ണറെ ഉടന് പുറത്താക്കണമെന്ന ആവശ്യവുമായി പ്രതിപക്ഷ നേതാവ് രമേശ് ചെന്നിത്തല. ആരിഫ് മുഹമ്മദ് ഖാനെ പുറത്താക്കണമെന്ന പ്രമേയ നോട്ടീസില് ഉറച്ചുനില്ക്കുകയാണെന്ന് ചെന്നിത്തല പറഞ്ഞു. ഈ പ്രമേയം സര്ക്കാര് കൊണ്ടുവരേണ്ടിയിരുന്നതാണെന്നും സഭയെ അപമാനിച്ച ഗവര്ണര്ക്കെതിരെ സഭാനേതാവായ മുഖ്യമന്ത്രി മൗനം പാലിക്കുകയാണെന്നുമാണ് രമേശ് ചെന്നിത്തല ആരോപിക്കുന്നത്.
എന്നാല്, ഗവര്ണര് ആരിഫ് മുഹമ്മദിനെതിരെ പ്രതിപക്ഷത്തിന്റെ പ്രസ്താവനകള് പിണറായി സര്ക്കാരിനെ കുടുക്കാനെന്നാണ് എല്ഡിഎഫ് വ്യക്തമാക്കുന്നത്. കേരളത്തില് നിലവില് ഭരണ പ്രതിസന്ധിയൊന്നുമില്ലെന്നും ഇടത് മുന്നണി കണ്വീനര് എ. വിജയരാഘവന് അറിയിച്ചു. പൗരത്വ നിയമ ഭേദഗതി വിഷയത്തില് ഗവര്ണര് ആരിഫ് മുഹമ്മദ് ഖാനെ കേന്ദ്രം തിരിച്ചുവിളിക്കണമെന്ന് പ്രമേയം അവതരിപ്പിക്കണമെന്ന പ്രതിപക്ഷ നേതാവ് രമേശ് ചെന്നിത്തലയുടെ പ്രസ്താവനയ്ക്ക് നല്കിയ മറുപടിയിലാണ് ഇക്കാര്യം അറിയിച്ചത്.
സംസ്ഥാനത്ത് ഇപ്പോള് ഭരണഘടനാ പ്രതിസന്ധിയൊന്നുമില്ല. വിഷയത്തില് വിസിലടിക്കുന്നതിന് മുമ്പ് ഗോളടിക്കാനുള്ള ചെന്നിത്തലയുടെ ശ്രമമാണ്. ഇത് പ്രോത്സാഹിപ്പിക്കാനാകില്ലെന്നും വിജയരാഘവന് കൂട്ടിച്ചേര്ത്തു. അതേസമയം വിഷയത്തില് മന്ത്രി എ.കെ ബാലനും ചെന്നിത്തലയെ രൂക്ഷമായി വിമര്ശിച്ചിരുന്നു. കലക്കവെള്ളത്തില് മീന് പിടിക്കാനുള്ള ശ്രമമാണ് ചെന്നിത്തല നടത്തുന്നതെന്നാണ് മന്ത്രി വിമര്ശിച്ചത്. ഗവര്ണറും സര്ക്കാരും തമ്മില് പ്രശ്നങ്ങളില്ല.
