കൊച്ചി: വൈദ്യുതി ഉത്പാദന രംഗത്ത് കേരളത്തിന്റെ വളര്ച്ചാ നിരക്ക് വളരെ കുറവാണെന്നും വൈദ്യുതി വിതരണ രംഗത്തെ സ്വകാര്യവത്കരണ നീക്കം ഉപേക്ഷിക്കണമെന്നും അഖില ഭാരതീയ വിദ്യൂത് മസ്ദൂര് മഹാ സംഘ് ദേശീയാധ്യക്ഷന് ആര്. മുരളീകൃഷ്ണന് ആവശ്യപ്പെട്ടു. എല്ലാവര്ക്കും ബോണസ് നല്കണമെന്നും അദ്ദേഹം പറഞ്ഞു. വൈദ്യുതി മസ്ദൂര് സംഘം പ്രതിനിധി സമ്മേളനവും സംസ്ഥാന സമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം.
വൈദ്യുതി മേഖലയില് ഷിഫ്റ്റ് സമ്പ്രദായം നടപ്പാക്കണമെന്നും കേന്ദ്ര വൈദ്യുതി അതോറിറ്റിയുടെ പേരു പറഞ്ഞ് പ്രമോഷനുകള് തടയുന്നത് അവസാനിപ്പിക്കണമെന്നും സമ്മേളനം ആവശ്യപ്പെട്ടു. വൈദ്യുതി ബോര്ഡിലെ തൊഴില് വിഷയങ്ങളില് അടിയന്തരമായി പരിഹാരം കാണണമെന്ന് ബിഎംഎസ് സംസ്ഥാന അധ്യക്ഷന് കെ.കെ. വിജയകുമാര് ആവശ്യപ്പെട്ടു.
എല്ലാ സെക്ഷന് ഓഫീസുകളിലും ഷിഫ്റ്റ് ഏര്പ്പെടുത്തുക, ക്ഷേമനിധി ചട്ടങ്ങളില് ആവശ്യമായ മാറ്റം വരുത്തുക, പരിധിയില്ലാതെ ബോണസ് അനുവദിക്കുക, പുതിയ നിയമനത്തിനുള്ള വിലക്ക് നീക്കുക, പൗരത്വ നിയമത്തിനെതിരെ തെറ്റിദ്ധാരണ പരത്തുന്നതില് നിന്ന് രാഷ്ട്രീയ കക്ഷികള് പിന്മാറുക എന്നീ പ്രമേയങ്ങളും അവതരിപ്പിച്ചു. രാജ്യത്തെ തൊഴില് ഭേദഗതിയെക്കുറിച്ച് സെമിനാര് നടത്തി.
ഉദ്ഘാടനത്തിന് കെവിഎംഎസ് സംസ്ഥാന പ്രസിഡന്റ് സി.ജി. ഗോപകുമാര് അധ്യക്ഷനായി. ബിഎംഎസ് സംസ്ഥാന സംഘടനാ സെക്രട്ടറി സി.വി. രാജേഷ്, സംസ്ഥാന സെക്രട്ടറി അഡ്വ.ടി.പി. സിന്ധുമോള്, എറണാകുളം ജില്ലാ പ്രസിഡന്റ് ടി.എ. വേണുഗോപാല്, കെഎസ്ഇബി ഓഫീസേഴ്സ് സംഘ് സംസ്ഥാന ജനറല് സെക്രട്ടറി പ്രസാദ് പുത്തലത്ത്, കെഎസ്ടി എംപ്ലോയീസ് സംഘ് സംസ്ഥാന സെക്രട്ടറി കെ.എസ്. അനില്, ജില്ലാ സെക്രട്ടറി കെ.ആര്. മനോരാജ് എന്നിവര് സംസാരിച്ചു.
