ന്യൂദല്ഹി: അഞ്ചര വര്ഷംകൊണ്ട് രാജ്യത്ത് വലിയ മാറ്റങ്ങളാണ് ഉണ്ടായിട്ടുള്ളതെന്ന് കേന്ദ്ര പാര്ലമെന്ററികാര്യ-ഘനവ്യവസായ സഹമന്ത്രി അര്ജ്ജുന് റാം മേഘ്വാള്. ഇന്ത്യയിലെ അടിസ്ഥാന മേഖലയിലെ ഉണര്വ്വ് ലോകരാജ്യങ്ങള് ഉറ്റുനോക്കുകയാണെന്നും അദ്ദേഹം പറഞ്ഞു. മാറുന്ന ഇന്ത്യ എന്ന വിഷയത്തില് നടന്ന മൂന്നാമത് ജന്മഭൂമി കോണ്ക്ലേവ് ഉദ്ഘാടനം ചെയ്തു സംസാരിക്കുകയായിരുന്നു കേന്ദ്രമന്ത്രി.
പത്തൊന്പതാം നൂറ്റാണ്ടിന്റെ അവസാനത്തിലാണ് ഇരുപത്തൊന്നാം നൂറ്റാണ്ട് ഇന്ത്യയുടേതാവുമെന്ന് സ്വാമി വിവേകാനന്ദന് പ്രവചിച്ചത്. സ്വാതന്ത്ര്യലബ്ധിക്ക് ഏഴു പതിറ്റാണ്ടുകള്ക്കിപ്പുറം ഇന്ത്യ ലോകത്തിന്റെ ശ്രദ്ധാകേന്ദ്രമായി വീണ്ടും ഉയരുന്നു. അടിസ്ഥാന മേഖലയിലെ പരിഷ്ക്കാരങ്ങള് ജീവിത സാഹചര്യങ്ങളെ മാറ്റിമറിച്ചു.
ട്രാന്സ് ഇന്ത്യ എന്ന പേരില് വികസന കോണ്ക്ലേവ് സംഘടിപ്പിച്ച ജന്മഭൂമിയുടെ നടപടി സ്വാഗതാര്ഹമാണ്. മൂന്നാം തവണയാണ് വികസന വിഷയങ്ങള് മുന്നിര്ത്തി ജന്മഭൂമി ദല്ഹിയില് കോണ്ക്ലേവ് സംഘടിപ്പിക്കുന്നത്. സംഘാടകര്ക്ക് എല്ലാവിധ ആശംസകളും നേരുന്നതായും അര്ജ്ജുന് റാം മേഘ്വാള് കൂട്ടിച്ചേര്ത്തു.
ദേശീയ ന്യൂനപക്ഷ കമ്മീഷന് വൈസ് ചെയര്മാന് അഡ്വ. ജോര്ജ്ജ് കുര്യന് അധ്യക്ഷത വഹിച്ച ചടങ്ങില് ഡോ. ശ്രീകുമാര്. ജെ, ജന്മഭൂമി മാനേജിങ് ഡയറക്ടര് എം. രാധാകൃഷ്ണന് എന്നിവര് സംസാരിച്ചു. സംഘാടക സമിതി ചെയര്മാന് ബാബു പണിക്കര് സ്വാഗതവും ജന്മഭൂമി ജനറല് മാനേജര് കെ.ബി. ശ്രീകുമാര് നന്ദിയും പറഞ്ഞു.
