തിരുവനന്തപുരം/ കൊച്ചി: വീണ്ടും എസ്എഫ്ഐ ഗുണ്ടകളുടെ അഴിഞ്ഞാട്ടം. യാതൊരു പ്രകോപനവുമില്ലാതെ ലോകോളേജിലെ കെഎസ്യു പ്രവര്ത്തകരെ എസ്എഫ്ഐ നേതാക്കള് സംഘം ചേര്ന്ന് ആക്രമണം നടത്തുകയായിരുന്നു.
രണ്ടാം വര്ഷ ബിരുദ വിദ്യാര്ത്ഥി യാമിന് മുഹമ്മദിനെയാണ് എസ്എഫ്ഐ നേതാക്കള് ക്രൂരമായി മര്ദ്ദിച്ചത്. കമ്പിവടി ഉള്പ്പെടെയുള്ള മാരകായുധങ്ങള് ഉപയോഗിച്ചായിരുന്നു മര്ദ്ദനം.യാതൊരു പ്രകോപനവും കൂടാതെയാണ് എസ്എഫ്ഐ നേതാക്കളുടെ മര്ദ്ദനമെന്ന് പരിക്കേറ്റ വിദ്യാര്ത്ഥി പറയുന്നു.
തലയ്ക്കും കാലിനും ഗുരുതരമായി പരിക്കേറ്റ വിദ്യാര്ത്ഥി മെഡിക്കല് കോളേജ് ആശുപത്രിയില് ചികത്സയിലാണ്. സംഭവത്തില് കോളേജിലെ എസ്എഫ്ഐ നേതാക്കളായ അനന്തകൃഷ്ണന്, നിഖില്, ഗോകുല് എന്നിവരെ മെഡിക്കല് കോളേജ് പോലീസ് കസ്റ്റഡിയിലെടുത്തു. യൂണിവേഴ്സിറ്റി കോളേജിലെ എസ്എഫ്ഐ നേതാക്കളുടെ ഗുണ്ടാപ്രവര്ത്തനങ്ങള്ക്ക് അല്പം ശമനമായതിന് പിന്നാലെയാണ് ലോ കോളേജില് നിന്നും ആരോപണം ഉയരുന്നത്.
അതിനിടെ എംജി സര്വകലാശാല നാടകോത്സവത്തിനെത്തിയ ആലുവ യുസി കോളേജിലെ യൂണിയന് ഭാരവാഹികളെ എസ്എഫ്ഐ പ്രവര്ത്തകര് മര്ദ്ദിച്ചതായും പരാതിയുണ്ട്. യുസി കോളേജ് യൂണിയന് ജനറല് സെക്രട്ടറിയും രണ്ടാം വര്ഷ ബിരുദാനന്തര ബിരുദ വിദ്യാര്ത്ഥിയുമായ ജെറിന് ജേക്കബ് പോള്, യുയുസി ഫൈസ് ടി.പി. എന്നിവര്ക്കാണ് മര്ദ്ദനമേറ്റത്.
യുസി കോളേജിലെ വിദ്യാര്ത്ഥി നേതാക്കളെ മുപ്പതോളം വോളണ്ടിയര്മാര് ചേര്ന്ന് മര്ദ്ദിക്കുകയായിരുന്നു. മഹാരാജാസ് കോളേജിലെ വിദ്യാര്ത്ഥി നേതാക്കളും മര്ദ്ദിച്ചതായി പറയുന്നു. തലക്കും കഴുത്തിനു പരിക്കേറ്റ ഇവര് ആലുവ സ്വകാര്യ ആശുപത്രിയില് ചികിത്സയിലാണ്. വര്ഷങ്ങളായി എസ്എഫ്ഐ യുടെ കൈവശമായിരുന്ന കോളേജ് യൂണിയന് കെഎസ്യു പിടിച്ചെടുത്തതിന്റെ വൈരാഗ്യമാണ് അക്രമത്തിന് കാരണമെന്നാണ് കരുതുന്നത്.
