ന്യൂദല്‍ഹി: ജന്മഭൂമിയുടെ മൂന്നാമത് ദല്‍ഹി കോണ്‍ക്ളേവിന് തുടക്കമായി. ഹോട്ടല്‍ ദ അശോകില്‍ നടക്കുന്ന ഏകദിന കോണ്‍ക്ലേവ് കേന്ദ്രപാര്‍ലമെന്ററികാര്യ സഹമന്ത്രി അര്‍ജ്ജുന്‍ മേഘ്‌വാള്‍ ഉദ്ഘാടനം ചെയ്തു. കേന്ദ്രവിദേശകാര്യ സഹമന്ത്രി വി. മുരളീധരന്‍, കേന്ദ്ര ആഭ്യന്തരസഹമന്ത്രി ജെ. കിഷന്‍ റെഡ്ഡി, മുന്‍ മിസോറാം ഗവര്‍ണര്‍ കുമ്മനം രാജശേഖരന്‍ എന്നിവര്‍ വിവിധ സെഷനുകളില്‍ പ്രസംഗിക്കും.
ദാരിദ്ര്യത്തില്‍ നിന്ന് ശാക്തീകരണത്തിലേക്ക് എന്ന വിഷയത്തില്‍ നടക്കുന്ന സെഷനില്‍ നിതി ആയോഗ് ഡയറക്ടര്‍ ഡോ. ഉന്നത് പണ്ഡിറ്റ്, ഐസിഎസ്എസ്ആര്‍ അംഗം ഡോ. കനഗസഭാപതി, മുതിര്‍ന്ന മാധ്യമ പ്രവര്‍ത്തകനും ബിജെപി പരിശീലക വിഭാഗം അംഗവുമായ ഡോ. ആര്‍. ബാലശങ്കര്‍, മുന്‍ ഐഎംഎ പ്രസിഡന്റ് ഡോ. ജെ. ശ്രീകുമാര്‍ എന്നിവര്‍ വിവിധ കാഴ്ചപ്പാടുകള്‍ മുന്നോട്ട് വെയ്‌ക്കും. ഓര്‍ഗനൈസര്‍ എഡിറ്റര്‍ പ്രഫുല്ല കേത്ക്കര്‍ മോഡറേറ്ററായി പങ്കെടുക്കും.
ഉച്ചയ്‌ക്ക് ശേഷം രണ്ട് മണിക്ക് നടക്കുന്ന സെഷനില്‍ കേന്ദ്രസര്‍ക്കാരിന്റെ വിവിധ പദ്ധതികളും മോദി സര്‍ക്കാരിന്റെ അഞ്ചരവര്‍ഷത്തെ ഭരണ നേട്ടങ്ങളും അവതരിപ്പിക്കപ്പെടും. മുന്‍ കേന്ദ്ര ടൂറിസം മന്ത്രിയും രാജ്യസഭാംഗവുമായ അല്‍ഫോന്‍സ് കണ്ണന്താനം, കേന്ദ കാബിനേറ്റ് സെക്രട്ടറിയേറ്റ് സെക്രട്ടറി ഡോ വി.പി ജോയി, ക്ളീന്‍ ഗംഗാ മിഷന്‍ ഡയറക്ടര്‍ ജി.അശോക് കുമാര്‍ ഐഎഎസ് എന്നിവര്‍ വിവിധ പേപ്പറുകള്‍ അവതരിപ്പിക്കും. മുന്‍ ഐഎഎസ് ഉദ്യോഗസ്ഥനും കേന്ദ്രമന്ത്രിയുമായ അര്‍ജ്ജുന്‍ റാം മേഘ് വാള്‍ മുഖ്യപ്രഭാഷണം നടത്തുന്ന സെഷനില്‍ മേഘാലയ ഗവര്‍ണറുടെ ഉപദേശകനും ഗ്രന്ഥകാരനുമായ ഡോ. സി.വി ആനന്ദ ബോസ് ഐഎഎസ് മോഡറേറ്ററാവും.
വൈകിട്ട് നാല് മണിക്ക് ചേരുന്ന സമാപന സെഷനില്‍ കേന്ദ്ര വിദേശകാര്യ-പാര്‍ലമെന്ററികാര്യ സഹമന്ത്രി വി. മുരളീധരന്‍ മുഖ്യപ്രഭാഷണം നടത്തും. ദേശീയ ന്യൂനപക്ഷ കമ്മീഷന്‍ ഉപാധ്യക്ഷന്‍ അഡ്വ. ജോര്‍ജ്ജ് കുര്യന്‍, പ്രജ്ഞാ പ്രവാഹ് ദേശീയ കണ്‍വീനര്‍ ജെ നന്ദകുമാര്‍, ജന്മഭൂമി മാനേജിംഗ് ഡയറക്ടര്‍ എം. രാധാകൃഷ്ണന്‍, ജന്മഭൂമി കോണ്‍ക്ലേവ് സംഘാടക സമിതി അധ്യക്ഷന്‍ ബാബു പണിക്കര്‍, ജനറല്‍ കണ്‍വീനര്‍ അഡ്വ. ജോജോ ജോസ് എന്നിവര്‍ പ്രസംഗിക്കും. വിവിധ മേഖലകളിലെ പ്രമുഖര്‍ ജന്മഭൂമി കോണ്‍ക്ലേവിന്റെ ഭാഗമാകും. ദാരിദ്രത്തില്‍ നിന്ന ശാക്തീകരണത്തിലേക്കുള്ള ഇന്ത്യയുടെ മാറ്റം, മോദി സര്‍ക്കാര്‍ ആരംഭിച്ച ജനക്ഷേമ പദ്ധതികള്‍ എന്നീ വിഷയങ്ങളില്‍ നടക്കുന്ന പാനല്‍ ചര്‍ച്ചകളാണ് ഇത്തവണത്തെ കോണ്‍ക്ലേവിനെ ശ്രദ്ധേയമാക്കുന്നത്.
