മുംബൈ: ഇന്ത്യ- ന്യൂസിലന്‍ഡ് ടി20 പരമ്പരയിലെ ആദ്യമത്സരം നാളെ ഓക്‌ലന്‍ഡില്‍ ഇന്ത്യന്‍ സമയം 12.20 ന് ആരംഭിക്കും. ടി20 പരമ്പരയില്‍ അഞ്ചുമത്സരങ്ങളാണ് ഉള്ളത്. ഇതിന് ശേഷം മൂന്ന് ഏകദിനത്തിലും രണ്ട് ടെസ്റ്റിലും ന്യൂസിലന്‍ഡുമായി ഇന്ത്യ കളിക്കും. പരിക്കേറ്റ ഓപ്പണര്‍ ശിഖര്‍ ധവാന് പകരം മലയാളിതാരം സഞ്ജു സാംസണെ സ്‌ക്വാഡില്‍ ഉള്‍പ്പെടുത്തിയിട്ടുണ്ട്.
നിലവില്‍ ന്യൂസിലാന്റിനെതിരെ കളിച്ച ടി20കളില്‍ ചരിത്രത്തില്‍ ഇന്ത്യക്ക് മോശം റെക്കോഡാണുള്ളത്. ടി20 മത്സരങ്ങളില്‍ ന്യൂസിലന്‍ഡിനെതിരെ കളിച്ച 12 മത്സരങ്ങളില്‍ ഇന്ത്യക്ക് മൂന്നെണ്ണത്തില്‍ മാത്രമേ വിജയിക്കാന്‍ കഴിഞ്ഞിട്ടുള്ളു. എട്ടു കളികള്‍ ന്യൂസിലാന്റ് സ്വന്തമാക്കുകയും ഒരു കളി സമനിലയിലും അവസാനിച്ചു. ന്യൂസിലന്‍ഡില്‍ ഇതുവരെ ടി20 പരമ്പര നേടാനും നീലപ്പടയ്‌ക്ക് ആയിട്ടില്ല. ഇതിനുമുന്‍പ് 2009ലും 2019ലും പര്യടനം നടത്തിയപ്പോള്‍ ടീം ഇന്ത്യ തോറ്റുമടങ്ങി. 2009ല്‍ 20നും കഴിഞ്ഞ വര്‍ഷം 21നുമാണ് കിവികള്‍ ഇന്ത്യയെ തോല്‍പിച്ചത്. എന്തായാലും ഇതിനുള്ള മുന്‍കരുതലുകളുമായി ആയിരിക്കും കോഹ്‌ലിയും സംഘവും നാളെ ഇറങ്ങുന്നത്.
