ന്യൂദല്ഹി: പൗരത്വനിയമ ഭേദഗതിക്കെതിരെ നിലകൊള്ളുന്ന കോണ്ഗ്രസ്, സിപിഎം, മുസ്ലിം ലീഗ് കക്ഷികള്ക്കേറ്റ ഏറ്റവും വലിയ തിരിച്ചടിയാണ് സുപ്രീംകോടതി തീരുമാനം എന്ന് ബിജെപി ദേശീയ നിര്വാഹക സമിതിയംഗം പി.കെ. കൃഷ്ണദാസ്. ഇതിന്റെ പശ്ചാത്തലത്തില് കേരളത്തില് ഈ ത്രികക്ഷി അവിശുദ്ധ സഖ്യത്തിന്റെ നേതൃത്വത്തില് നടമാടിയ സമരാഭാസം അവസാനിപ്പിക്കാന് തയാറാവണം. സുപ്രീംകോടതിയില് കേസ് കൊടുത്ത്, തെരുവിലിറങ്ങി അസത്യവും അര്ധസത്യവും പ്രചരിപ്പിച്ച് ഹിന്ദു-മുസ്ലിം സ്പര്ധയുണ്ടാക്കാനാണ് ഈ മൂന്നു കക്ഷികളുടേയും ശ്രമം. ഇത് അവസാനിപ്പിക്കാന് തയാറാവണം.
അന്തിമ വിധി വരുന്നതുവരെ കാത്തിരിക്കാനുള്ള ജനാധിപത്യ മര്യാദ കേസുമായി കോടതിയെ സമീപിച്ച ഈ കക്ഷികള്ക്കുണ്ടെന്ന് ഓര്മിപ്പിക്കുന്നു. അക്രമ സമരം നിര്ത്താനുള്ള മര്യാദ കോണ്ഗ്രസും സിപിഎമ്മും ലീഗും കാണിക്കണം. കേരളമൊഴിച്ച് ഇന്ത്യയിലെല്ലായിടത്തും പൗരത്വ നിയമ ഭേദഗതിക്കെതിരായ സമരം അവസാനിച്ചു. കേരളത്തില് മാത്രമാണ് ജനങ്ങളെ തെറ്റിദ്ധരിപ്പിക്കാനുള്ള ശ്രമം ഇപ്പോഴും തുടരുന്നത്.
മുസ്ലീങ്ങളെ തെറ്റിദ്ധരിപ്പിച്ച് അവരുടെ വോട്ട് തട്ടിയെടുക്കാനുള്ള ഗൂഢനീക്കമാണ് പ്രതിഷേധ പരിപാടികളിലൂടെ ഇടതു, വലതു മുന്നണികള് നടത്തുന്നത്. വരുന്ന നിയമസഭാ തെരഞ്ഞെടുപ്പില് അധികാരം നേടാനുള്ള ശ്രമമാണ് ഇതെല്ലാം. ഇതു ജനങ്ങള്ക്ക് ബോധ്യപ്പെട്ടു തുടങ്ങിയതായും കൃഷ്ണദാസ് പ്രസ്താവനയില് പറഞ്ഞു.
