പത്തനംതിട്ട: ചില്ലറ ലോട്ടറി വിതരണക്കാര്‍ വില്‍ക്കുന്ന ടിക്കറ്റുകള്‍ക്ക് സമ്മാനം ലഭിക്കുന്നില്ലെന്ന് ആക്ഷേപം. മുന്‍കാലങ്ങളെ അപേക്ഷിച്ച് ധാരാളം സമ്മാനങ്ങളുണ്ടെന്ന് അറിയിപ്പ് വരുന്നുണ്ടെങ്കിലും തങ്ങള്‍ വില്‍ക്കുന്ന ടിക്കറ്റുകള്‍ക്ക് മുന്‍കാലങ്ങളിലേപ്പോലെ സമ്മാനം ലഭിക്കുന്നില്ലെന്ന് ലോട്ടറി ചില്ലറ വില്‍പ്പനക്കാര്‍ പത്രസമ്മേളനത്തില്‍ പരാതിപ്പെട്ടു.
ഭാഗ്യക്കുറികളുടെ നാലക്ക സമ്മാന ടിക്കറ്റുകള്‍ ബിനാമി ഏജന്റുമാര്‍ കൈക്കലാക്കുന്നതായും ഇവര്‍ക്ക് പരാതിയുണ്ട്. യന്ത്രം ഉപയോഗിച്ചുള്ള നറുക്കെടുപ്പ് വന്ന ശേഷം 5000, 2000, 1000 എന്നീ സമ്മാനങ്ങള്‍ ചില്ലറ വില്‍പ്പനക്കാര്‍ക്ക് വില്‍ക്കുന്ന ടിക്കറ്റുകള്‍ക്ക് കുറയുന്നു. ഇത് വില്‍പ്പനയെ ബാധിക്കുന്നു. ഉദ്യോഗസ്ഥരും ചില ബിനാമി ലൈസന്‍സുകാരും തമ്മിലുള്ള രഹസ്യ ഇടപാടാണ് ഇതിന് പിന്നിലെന്ന് സംശയിക്കുന്നതായും അവര്‍ പറഞ്ഞു.
നറുക്കെടുപ്പ് യന്ത്രത്തിന്റെ പ്രവര്‍ത്തനം അറിയാവുന്ന ഉദ്യോഗസ്ഥര്‍ സമ്മാനം അടിക്കുമെന്ന് ഉറപ്പുള്ള നമ്പരുകളിലെ ടിക്കറ്റുകള്‍ ബിനാമികള്‍ക്ക് കൈമാറും. ഇവര്‍ ടിക്കറ്റുകള്‍ കൈവശം വയ്‌ക്കും. വില്‍ക്കില്ല. 5000 രൂപയുടെ സമ്മാനം 10,000 പേര്‍ക്കാണ് ലഭിക്കേണ്ടത്. ഇത് 5.40 കോടിവരും.
അയ്യായിരം രൂപയുടെ ടിക്കറ്റുകള്‍ ജില്ലയില്‍ ഏതൊക്കെ ഏജന്റുമാര്‍ക്കാണ് കൊടുത്തതെന്നറിയാന്‍ വിവരാവകാശ നിയമപ്രകാരം ഭാഗ്യക്കുറി ഡയറക്ടറേറ്റിലും ജില്ലാ ഭാഗ്യക്കുറി വകുപ്പ് ഓഫീസിലും അപേക്ഷ സമര്‍പ്പിച്ചെങ്കിലും തൃപ്തികരമായ മറുപടി ലഭിച്ചില്ല.
ഭാഗ്യക്കുറി നറുക്കെടുപ്പുമായി ബന്ധപ്പെട്ട് അഴിമതി നടക്കുന്നുണ്ടോയെന്ന് അന്വേഷിക്കണമെന്നും ഇവര്‍ ആവശ്യപ്പെട്ടു. പത്രസമ്മേളനത്തില്‍ വിനിപോള്‍, മാത്തുണ്ണി മാത്യു, തോമസ്, സജി എന്നിവര്‍ പങ്കെടുത്തു.
