തിരുവനന്തപുരം: പൗരത്വ നിയമ ഭേദഗതി ചോദ്യം ചെയ്ത് സുപ്രീംകോടതിയില്‍ ഹര്‍ജി നല്‍കിയതിനെതിരെ സംസ്ഥാന സര്‍ക്കാരിനോട് ഗവര്‍ണര്‍ ആരിഫ് മുഹമ്മദ് ഖാന്‍ വിശദീകരണം തേടി. എന്തടിസ്ഥാനത്തിലാണ് സുപ്രീം കോടതിയെ സമീപിച്ചതെന്നു വിശദീകരിക്കാനാണ് ചീഫ് സെക്രട്ടറിയോട് ആവശ്യപ്പട്ടത്. റൂള്‍ ഓഫ് ബിസിനസ് അനുസരിച്ച് ഇത്തരമൊരു നടപടിക്ക് മുമ്പ് ഗവര്‍ണറെ അറിയിക്കാത്തതെന്തെന്നും വിശദീകരിക്കണം.
കേന്ദ്രവും സംസ്ഥാനവും തമ്മിലുള്ള വിഷയമാണെങ്കില്‍ അത് ഗവര്‍ണറെ അറിയിക്കണമെന്നാണ് ചട്ടമെന്നും കത്തില്‍ പറയുന്നു. പൗരത്വ നിയമത്തിനെതിരെ സുപ്രീം കോടതിയെ സമീപിക്കുന്നതിനു മുമ്പ് സര്‍ക്കാര്‍ രാജ്ഭവനെ അറിയിച്ചിട്ടില്ല. എന്തുകൊണ്ടാണ് അറിയിക്കാതിരുന്നതെന്നും ഗവര്‍ണര്‍ ചോദിക്കുന്നു. അടിയന്തരമായി വിശദീകരണം വേണമെന്നാണ് ആവശ്യപ്പെട്ടിരിക്കുന്നത്.
എന്നാല്‍ ഇത് സംബന്ധിച്ച് മുഖ്യമന്ത്രി മൗനം പാലിച്ചു. ഇന്നലെ വൈകുന്നേരം തിരുവനന്തപുരത്ത് നടന്ന സിപിഎം രാഷ്‌ട്രീയ വിശദീകരണ യോഗത്തില്‍ ഗവര്‍ണറുടെ വിശദീകരണം സംബന്ധിച്ച് മുഖ്യമന്ത്രി യാതൊരു മറുപടിയും നല്‍കിയില്ല. ചില വിഷയങ്ങള്‍ ഉണ്ട് അത് പിന്നീട് വിശദീകരിക്കാം എന്നായിരുന്നു മുഖ്യമന്ത്രിയുടെ പ്രതികരണം.
ഗവര്‍ണറെ അറിയിക്കാതെ കോടതിയെ സമീപിച്ചതില്‍ നിയമലംഘനമില്ലെന്ന് മുഖ്യമന്ത്രി പറയുന്നെങ്കില്‍ അക്കാര്യം നിയമം ചൂണ്ടിക്കാട്ടി മുഖ്യമന്ത്രി പറയണമെന്ന് ആരിഫ് മുഹമ്മദ് ഖാന്‍ പിന്നീട് മാധ്യമപ്രവര്‍ത്തകരോടു സംസാരിക്കവെ പറഞ്ഞു.
സര്‍ക്കാരുമായി വ്യക്തിപരമായ പ്രശ്‌നങ്ങളില്ല. ഭരണഘടനയും നിയമവും ഉയര്‍ത്തിപ്പിടിക്കുകയാണ് ചെയ്യുന്നത്. ഗവര്‍ണറുടെ അനുവാദമില്ലാതെ സ്വയം തീരുമാനിച്ച് മുന്നോട്ടുപോകാന്‍ അനുവാദം നല്‍കുന്ന ചട്ടങ്ങള്‍ ഉണ്ടെങ്കില്‍ മുഖ്യമന്ത്രി വ്യക്തമാക്കണം. ഭരണഘടനയും രാജ്യത്തെ നിയമവും ചട്ടങ്ങളും പാലിക്കപ്പെടുന്നുണ്ടോയെന്ന് ഉറപ്പുവരുത്തലാണ് തന്റെ ദൗത്യം. ഞാന്‍ എന്റെ ഭരണഘടാനാ ബാധ്യതകള്‍ നിറവേറ്റുമെന്നും ഗവര്‍ണര്‍ പറഞ്ഞു.
സഞ്ചരിക്കാന്‍ അനുവദിക്കില്ലെന്ന് ഭീഷണി മുഴക്കിയിട്ടും താന്‍ തുടര്‍ച്ചയായി സഞ്ചരിക്കുന്നു. കോഴിക്കോട്ട് ലിറ്ററേച്ചര്‍ ഫെസ്റ്റിവലില്‍ പരിപാടിയില്‍ പങ്കെടുക്കുന്നത് മാറ്റിവെച്ചത് സംഘാടകര്‍ ആവശ്യപ്പെട്ടതനുസരിച്ചാണ്. അവര്‍ക്ക് നിരവധി ഭീഷണികള്‍ ലഭിച്ചു. പ്രതിഷേധിക്കുന്നവര്‍ സംവാദത്തിലും ചര്‍ച്ചയിലും വിശ്വസിക്കുന്നില്ല. വ്യത്യസ്തമായ അഭിപ്രായങ്ങള്‍ കേള്‍ക്കാന്‍ അവര്‍ തയ്യാറല്ല. ചര്‍ച്ചകളോട് അവര്‍ വൈമുഖ്യം പ്രകടിപ്പിക്കുന്നു. സംവാദങ്ങളോടും മുഖം തിരിക്കുന്നു. ഇവര്‍ വിദ്വേഷത്തിന്റെയും അക്രമത്തിന്റെയും അന്തരീക്ഷം വലുതാക്കുന്നവരാണെന്നും ഗവര്‍ണര്‍ പറഞ്ഞു.
