കണ്ണൂര്: സിഐടിയു നേതാവ് ചെയര്മാനായ ഹാന്വീവില് ശമ്പളമില്ലാതായപ്പോള് സിഐടിയു യൂണിയന് തന്നെ സമരമാരംഭിച്ചു. സിഐടിയു സംസ്ഥാന സെക്രട്ടറി കെ.പി.സഹദേവന് ചെയര്മാനായ ഹാന്ഡ്ലൂം ഡെവലപ്പ്മെന്റ് കോര്പ്പറേഷനിലാണ് സിഐടിയു പ്രത്യക്ഷ സമരമാരംഭിച്ചത്. ഏതാനും മാസങ്ങളായി ജീവനക്കാരുടെ ശമ്പളവും നെയ്ത്തു തൊഴിലാളികളുടെ കൂലിയും കൃത്യസമയത്ത് ലഭിക്കാത്തതില് പ്രതിഷേധിച്ചാണ് സമരം.
കഴിഞ്ഞ നവംബറിലെ ശമ്പളം മൂന്നുഘട്ടമായി നല്കിയപ്പോള് ഡിസംബറിലെ ശമ്പളം 18 ദിവസമായിട്ടും ഇതുവരെ നല്കിയില്ല. ശമ്പളം നല്കാത്തതില് പ്രതിഷേധിച്ച് ഇന്നലെ കണ്ണൂരിലെ ആസ്ഥാനത്ത് ജീവനക്കാര് കറുപ്പ് ബാഡ്ജ് ധരിച്ച് ജോലിക്ക് ഹാജരായി. പ്രവേശന കവാടത്തിന് മുന്നില് പ്രതിഷേധ പ്രകടനം നടത്തി. സിഐടിയു അംഗങ്ങളായ ജീവനക്കാര് മാത്രമാണ് പ്രതിഷേധത്തില് പങ്കെടുത്തത്. മറ്റ് യൂണിയനില്പ്പെട്ട ജീവനക്കാര് വിട്ടുനിന്നു.
വിദ്യാര്ഥികള്ക്ക് സ്കൂള് യൂണിഫോം തുണി നിര്മിച്ച് നല്കിയ വകയിലും റിബേറ്റ് ഇനത്തിലും സര്ക്കാരില് നിന്ന് ലക്ഷങ്ങള് കിട്ടാനുള്ളതു കൊണ്ടാണ് ശമ്പളം മുടങ്ങുന്നതെന്നാണ് സ്ഥാപന നടത്തിപ്പുകാരായ സിഐടിയു നേതാക്കള് പറയുന്നത്.
സ്വന്തം പാര്ട്ടി അധികാരത്തിലിരിക്കുമ്പോള് സര്ക്കാരില് നിന്നു കിട്ടാനുള്ള തുക വാങ്ങിക്കാന് നേതാക്കളോ, നല്കാന് സര്ക്കാരോ തയാറാകാതെ തൊഴിലാളി കുടുംബങ്ങളെ പട്ടിണിക്കിടുന്ന നിലപാടില് തൊഴിലാളികള്ക്കിടയില് പ്രതിഷേധം ശക്തം. ശമ്പള വിതരണത്തിന് ഇനിയും തയാറായില്ലെങ്കില് അനിശ്ചിതകാല സമരത്തിനുള്ള ഒരുക്കത്തിലാണ് തൊഴിലാളികള്.
കഴിഞ്ഞ ദിവസം വളപട്ടണം ഫൈബര് ഫോം ചെയര്മാന്റെ ഓഫീസിനു മുന്നില് നടന്ന ജീവനക്കാരുടെ പട്ടിണി സമരം സിഐടിയു നേതാവ് കെ.പി. സഹദേവന് ഉദ്ഘാടനം ചെയ്തിരുന്നു. സ്വന്തം സ്ഥാപനത്തിലെ ജീവനക്കാര്ക്കും തൊഴിലാളികള്ക്കും ശമ്പളവും കൂലിയും മറ്റ് ആനുകൂല്യങ്ങളും നല്കാന് തയാറാകാതെ ചെയര്മാന് മറ്റൊരു സ്ഥാപനത്തിലെ ശമ്പള പ്രശ്നവുമായി ബന്ധപ്പെട്ട സമരം ഉദ്ഘാടനം ചെയ്യാന് പോയതും പ്രതിഷേധത്തിന് കാരണമായി. ഇത്തരമൊരു സാഹചര്യത്തില് കൂടിയാണ് കേരള സ്റ്റേറ്റ് ഹാന്ഡ്ലൂം ഡെവലപ്പ്മെന്റ് കോര്പ്പറേഷന് എംപ്ലോയീസ് യൂണിയന് സമരപരിപാടികളുമായി മുന്നോട്ടുപോകാന് തീരുമാനിച്ചത്.
