ആലപ്പുഴ: സുപ്രീംകോടതി വിധിയുടെ അടിസ്ഥാനത്തില് പാണാവള്ളി നെടിയതുരുത്തിലെ കാപിക്കോ റിസോര്ട്ട് പൊളിച്ച് നീക്കുന്നതുമായി ബന്ധപ്പെട്ട് പാരിസ്ഥിതിക ആഘാത പഠനം നടത്തുന്നതിന് സര്ക്കാര് പ്രത്യേക സമിതിയെ നിയോഗിച്ചേക്കും. സര്ക്കാര് നിര്ദേശം ലഭിച്ചാല് ഉടന് റിസോര്ട്ട് പൊളിക്കുന്നതിനുള്ള പശ്ചാത്തല സൗകര്യവും, സാങ്കേതിക സൗകര്യവും ഒരുക്കാന് ജില്ലാ ഭരണകൂടം നടപടികള് തുടങ്ങി. ഇത് സംബന്ധിച്ച് റെവന്യൂ മന്ത്രിയുമായി ജില്ലാ കളക്ടര് ചര്ച്ച നടത്തി.
എന്നാല്, റിസോര്ട്ട് പൊളിച്ചു നീക്കുന്നത് സംബന്ധിച്ച് ആശയക്കുഴപ്പം തുടരുകയാണ്. റിസോര്ട്ട് പൊളിച്ചു നീക്കാന് പാണാവള്ളി ഗ്രാമപഞ്ചായത്തിനോടാണ് സുപ്രീംകോടതി നിര്ദേശിച്ചിരിക്കുന്നത്. പക്ഷേ പൊളിച്ചു നീക്കാനുള്ള ഭീമമായ തുക കണ്ടെത്താന് പഞ്ചായത്തിന് സാധ്യമല്ലെന്നാണ് അധികൃതര് പറുയന്നത്. ഇതിനാവശ്യമായ പണം സര്ക്കാര് നല്കണമെന്നും അവര് ആവശ്യപ്പെടുന്നു. റിസോര്ട്ട് പൊളിക്കുന്നത് സംബന്ധിച്ച സുപ്രീംകോടതിയുടെ വിധിപ്പകര്പ്പ് സര്ക്കാരിന് ലഭിച്ചിട്ടുണ്ട്. അതിന്റെ അടിസ്ഥാനത്തില് എന്തു നടപടിയെടുക്കണമെന്നു സര്ക്കാര് ജില്ലാ ഭരണകൂടത്തെ അറിയിക്കും. അതിനു ശേഷമേ പൊളിച്ചു മാറ്റുന്നത് എങ്ങനെയെന്ന് തീരുമാനിക്കൂ.
സുപ്രീംകോടതി വിധിയുള്ളതിനാല് പൂര്ണമായും പൊളിച്ചുനീക്കി ദ്വീപ് പുനഃസ്ഥാപിക്കേണ്ടി വരും. അതിനുള്ള അചെലവ് റിസോര്ട്ട് ഉടമകളില്നിന്ന് ഈടാക്കുമോയെന്ന കാര്യത്തില് തീരുമാനമായിട്ടില്ല.
നെടിയതുരുത്തില് തീരദേശ നിയന്ത്രണ നിയമം ലംഘിച്ച് 57 വില്ലകള്, 3500 ചതുരശ്ര മീറ്ററില് കോണ്ഫറന്സ് ഹാള്, സ്വിമ്മിങ് പൂളുകള് എന്നിവയാണ് നിര്മിച്ചത്. 2012-ല് വില്ലകളുടെ നിര്മാണം പൂര്ത്തിയായി. റിസോര്ട്ട് നിര്മാണത്തിന്റെ ഭാഗമായി മത്സ്യത്തൊഴിലാളികളുടെ ഊന്നിവലകള് നശിപ്പിക്കപ്പെട്ടതോടെയാണ് കേസുകള്ക്കു തുടക്കം. 2008-ല് ചേര്ത്തല മുന്സിഫ് കോടതിയില് രജിസ്റ്റര് ചെയ്ത കേസ് തള്ളിയതോടെ മത്സ്യത്തൊഴിലാളികള് ഹൈക്കോടതിയെ സമീപിച്ചു.
2011ല് ജനസമ്പര്ക്ക സമിതിയുടെ നേതൃത്വത്തിലാണ് ഹൈക്കോടതിയില് കേസ് ഫയല് ചെയ്തത്. 2013ല് റിസോര്ട്ട് പൊളിച്ചു മാറ്റാന് ഹൈക്കോടതി ഉത്തരവിട്ടു. ഇതിനെതിരെ റിസോര്ട്ട് ഉടമകള് സുപ്രീംകോടതിയെ സമീപിച്ചു. ഈ കേസിലാണ് ഹൈക്കോടതി വിധി അംഗീകരിച്ച് സുപ്രീംകോടതി ഉത്തരവ് ഉണ്ടായത്.
പരിസ്ഥിതിലോല പ്രദേശങ്ങള് ഉള്പ്പെടുന്ന സിആര്സെഡ് 1 വിഭാഗത്തില്പ്പെടുന്നതാണ് നെടിയതുരുത്ത് ദ്വീപ്. അതിനാല് മുഴുവന് പ്രദേശവും നോ ഡെവലപ്മെന്റ് സോണ് ആണ്. ദ്വീപ് ഉള്പ്പെട്ട മേഖല എഫ്പി (ഫില്ട്രേഷന് പോണ്ട്) വിഭാഗത്തിലാണ് ഉള്പ്പെടുന്നത്.
