തിരുവനന്തപുരം: പൗരത്വ ഭേദഗതി നിയമത്തെ പിന്തുണക്കുന്നവരെ ഊരുവിലക്കാനുള്ള മത തീവ്രവാദികളുടെ നീക്കങ്ങള്‍ക്കും ശ്രമങ്ങള്‍ക്കുമൊപ്പം സിപിഎമ്മും കോണ്‍ഗ്രസും കൂട്ടുനില്‍ക്കുയാണെന്ന് യുവമോര്‍ച്ച സംസ്ഥാന സെക്രട്ടറി സന്ദീപ് ജി. വാര്യര്‍. തൊടുപുഴയില്‍ നിസ്‌കരിക്കാനെത്തിയ ബിജെപി സംസ്ഥാന സെക്രട്ടറി എ.കെ. നസീറിനെ ക്രൂരമായി ആക്രമിച്ചതിലൂടെ ഇത്തര നീക്കള്‍ക്കുള്ള ശ്രമങ്ങള്‍ മുസ്ലീം മതതീവ്രവാദികള്‍ നടത്തുന്നുണ്ടെന്നത് വ്യക്തമാണ്. ഇസ്ലാമിന്റെ പഞ്ചസ്തംഭങ്ങളില്‍ ഒന്നായ നമസ്‌കാരം നിര്‍വഹിച്ച നസീറാണോ അതോ നമസ്‌കാരത്തിനിടെ അദ്ദേഹത്തെ ചവിട്ടി വീഴ്‌ത്തിയ മത തീവ്രവാദികളാണോ ഈമാനുള്ള മുസല്‍മാനെന്നും സന്ദീപ് വാര്യര്‍ ചോദിക്കുന്നു.
ബിജെപി അനുഭാവമുള്ളവരെ ഊരുവിലക്കുക എന്നുപറഞ്ഞാല്‍ കേരളത്തിലെ 15 ശതമാനം ജനങ്ങളെ ഊരുവിലക്കുക എന്നുള്ളതാണ് അര്‍ത്ഥം. അതൊരു ചെറിയ സംഖ്യയല്ലെന്നും സന്ദീപ് ഓര്‍മിപ്പിക്കുന്നു. പ്രതിഷേധിക്കാനും സമരം ചെയ്യാനും എല്ലാവര്‍ക്കും അവകാശമുണ്ട്. അതുപോലെതന്നെ നിയമ ഭേദഗതിയെ പിന്തുണയ്‌ക്കാന്‍ നസീറിനും ജനാധിപത്യപരമായ അവകാശമുണ്ട്. ഇത്തരത്തിലുള്ള ശാരീരിക ആക്രമണങ്ങള്‍ വാസ്തവത്തില്‍ നിങ്ങളുടെ പ്രതിഷേധത്തെ ദുര്‍ബലപ്പെടുത്തുകയേ ഉള്ളൂ. സംവാദത്തിന് പോലും തയ്യാറാകാതെ നിങ്ങളുടെ വാതിലുകള്‍ കൊട്ടിയടച്ച് ഇരിക്കുമ്പോള്‍ ഒറ്റപ്പെടുന്നത് ഗൃഹസമ്പര്‍ക്കം നടത്തുന്ന ഞങ്ങളല്ല. വാതിലുകള്‍ കൊട്ടിയടച്ച നിങ്ങള്‍ തന്നെയാണെന്നും അദ്ദേഹം പറഞ്ഞു.
ഫെയ്‌സ്ബൂക്ക് പോസ്റ്റിന്റെ പൂര്‍ണരൂപം:-
ഇസ്ലാമിന്റെ പഞ്ചസ്തംഭങ്ങളില്‍ ഒന്നായ നമസ്‌കാരം നിര്‍വഹിച്ച ശ്രീ എ.കെ നസീറാണോ അതോ നമസ്‌കാരത്തിനിടെ അദ്ദേഹത്തെ ചവിട്ടി വീഴ്‌ത്തിയ മത തീവ്രവാദികളാണോ ഈമാനുള്ള മുസല്‍മാന്‍?
പ്രതിഷേധിക്കാനും സമരം ചെയ്യാനും എല്ലാവര്‍ക്കും അവകാശമുണ്ട്. അതുപോലെതന്നെ ഈ നിയമ ഭേദഗതിയെ പിന്തുണയ്‌ക്കാന്‍ ശ്രീ എകെ നസീറിനും ജനാധിപത്യപരമായ അവകാശമുണ്ട് എന്നത് മറക്കരുത്.
സമരം ചെയ്യുന്നവരിലെ യഥാര്‍ത്ഥ വിശ്വാസികളോട് ഒരു കാര്യമേ പറയാനുള്ളൂ. ഇത്തരത്തിലുള്ള ശാരീരിക ആക്രമണങ്ങള്‍ വാസ്തവത്തില്‍ നിങ്ങളുടെ പ്രതിഷേധത്തെ ദുര്‍ബലപ്പെടുത്തുകയേ ഉള്ളൂ. സംവാദത്തിന് പോലും തയ്യാറാകാതെ നിങ്ങളുടെ വാതിലുകള്‍ കൊട്ടിയടച്ച് ഇരിക്കുമ്പോള്‍ ഒറ്റപ്പെടുന്നത് ഗൃഹസമ്പര്‍ക്കം നടത്തുന്ന ഞങ്ങളല്ല. വാതിലുകള്‍ കൊട്ടിയടച്ച നിങ്ങള്‍ തന്നെയാണ്.
നിയമഭേദഗതിയെ പിന്തുണയ്ക്കുന്നവരെ സാമൂഹികമായും സാമ്പത്തികമായും ഊരുവിലക്കാന്‍ വേണ്ടി ഉയരുന്ന ആക്രോശങ്ങള്‍ കേരളത്തെ ഭിന്നിപ്പിക്കുന്നതാണ്. അത്തരത്തിലുള്ള ഏതൊരു പ്രവര്‍ത്തിക്കും തുല്യവും വിപരീതവുമായ പ്രതിപ്രവര്‍ത്തനവും ഉണ്ടാകും എന്നത് ലോകനീതിയാണ്. അതാണ് നമ്മളെ വാസ്തവത്തില്‍ ഭയപ്പെടുത്തേണ്ടത്.
നമ്മുടെ നാട് ആര്‍ജിച്ചെടുത്ത സൗഹൃദങ്ങള്‍ മുഴുവന്‍ നശിപ്പിക്കുന്ന രീതിയിലേക്ക് ഈ സമരമെത്തണമെന്ന് മത തീവ്രവാദ സംഘടനകള്‍ക്ക് താല്പര്യമുണ്ട്. അവരുടെ താല്‍പര്യത്തിന് എരിതീയില്‍ എണ്ണ ഒഴിച്ചു കൊടുക്കുന്ന പ്രവര്‍ത്തനമാണ് സിപിഎമ്മും കോണ്‍ഗ്രസും ചെയ്യുന്നത്.
മറ്റൊരു സ്ഥലത്തും ഇല്ലാത്ത രീതിയില്‍ കേരളത്തില്‍ ഈ സമരം അത് തുടങ്ങിയവരുടെ കൈവിട്ടു പോയിരിക്കുന്നു. കേരളത്തിലെ ഒരു വിഭാഗം ജനങ്ങളെ ഊരു വിലക്കാനുള്ള മത തീവ്രവാദികളുടെ ആഹ്വാനത്തോട് സംസ്ഥാനസര്‍ക്കാരും സിപിഎമ്മും കോണ്‍ഗ്രസ്സും സ്വീകരിക്കുന്ന നിസ്സംഗ നിലപാട് അപകടകരമാണ്.
ബിജെപി അനുഭാവമുള്ളവരെ ഊരുവിലക്കുക എന്നുപറഞ്ഞാല്‍ കേരളത്തിലെ 15 ശതമാനം ജനങ്ങളെ ഊരുവിലക്കുക എന്നുള്ളതാണ് അര്‍ത്ഥം. അതൊരു ചെറിയ സംഖ്യയല്ല എന്നോര്‍ക്കണം. ഓര്‍ത്താല്‍ നന്ന്.
