മുംബൈ: ഇതിഹാസ വിക്കറ്റ് കീപ്പറും ഇന്ത്യന് മുന് നായകനുമായ എം എസ് ധോണിക്കെതിരെ വിമര്ശനവുമായി മുന് ഇന്ത്യന് താരം സുനില് ഗവാസ്കര്. ധോണിയുടെ കായിക ക്ഷമതയെകുറിച്ചോ ടീമില്നിന്നു വിട്ടുനില്ക്കുന്നതിന്റെ കാരണത്തെക്കുറിച്ചോ തനിക്കറിയില്ലെന്നും ഒരു താരത്തിന് ഇത്രയും നീണ്ടകാലം ടീമില് നിന്നും വിട്ടുനില്ക്കാന് കഴിയുമോയെന്നും ഗവാസ്കര് ചോദിച്ചു. ടി20 ലോകകപ്പിനുള്ള ഇന്ത്യന് ടീമില് ധോണിയുണ്ടാവുമോ എന്നുള്ള ചോദ്യത്തിന് മറുപടി പറയുകയായിരുന്നു ഗവാസ്കര്.
കഴിഞ്ഞ ഏകദിന ലോകകപ്പ് സെമിയില് ന്യൂസിലാന്ഡിനോട് പരാജയപ്പെട്ട ശേഷം ധോണി ഇന്ത്യക്ക് വേണ്ടി കളിച്ചിട്ടില്ല. ഇത്രയും കാലം ഒരു താരത്തിന് ടീമില് നിന്ന് പുറത്ത് നില്ക്കാന് സാധിക്കുമോ, എന്തുകൊണ്ട് ടീമില് നിന്ന് നീണ്ട അവധിയെടുത്തുവെന്നുള്ള കാര്യത്തിന് ധോണി തന്നെ ഉത്തരം പറയണം- ഗവാസ്കര് പറഞ്ഞു. എന്നാല് ധോണിയുടെ വിരമിക്കല് കാര്യത്തില് കഴിഞ്ഞ ദിവസം രവി ശാസ്ത്രി പുതിയ വാര്ത്ത പുറത്തുവിട്ടിരുന്നു. ധോണി ഏകദിനത്തില് നിന്ന് വിരമിച്ചേക്കുമെന്നാണ് ശാസ്ത്രി പറഞ്ഞത്. എന്നാല് ഐപിഎല്ലില് മികച്ച പ്രകടനം പുറത്തെടുത്താല് താരത്തെ ടി20 ലോകകപ്പ് ടീമിലേക്ക് പരിഗണിക്കുമെന്നും ശാസ്ത്രി പറഞ്ഞിരുന്നു.
