കൊച്ചി: മരട് ജെയിന് കോറല് കോവ് നിലംപൊത്തി. 10.59ന് അവസാന സൈറണും മുഴങ്ങിനിന്ന ശേഷം ജെയിന് ജെയിന് കോറല് ഫ്ളാറ്റ് സമുച്ചയം നിയന്ത്രിത സ്ഫോടനത്തിലൂടെ 11.01ന് തകര്ന്നടിയുകയായിരുന്നു. 372.8 കിലോ സ്ഫോടക വസ്തുക്കള് ഉപയോഗിച്ചാണ് ഇത് തകര്ത്തത്. അന്തിമഘട്ട പരിശോധനയ്ക്കുശേഷം അവസാന ആളേയും പുറത്തിക്കിയതായി ഉറപ്പുവരുത്തിയാണ് 10.59ന് സൈറണ് മുഴക്കിയത് അതിനുശേഷം ഇത് തകര്ന്ന് അടിയുകയായിരുന്നു. എച്ച്ടുഒ പൊളിച്ച എഡിഫെസ് തന്നെയാണ് ഇതും പൊളിച്ചത്.
പൊളിച്ചുമാറ്റാന് സുപ്രീംകോടതി ഉത്തരവിട്ടതില് ഏറ്റവും വലിയ ഫ്ളാറ്റ് സമുച്ചയം ആയത് കൊണ്ടുതന്നെ വലിയ ആകാംക്ഷക്ക് ഒടുവിലാണ് സ്ഫോടനം നടന്നത്. 10.55 ന് രണ്ടാം സൈറണ് മുഴങ്ങി. പോലീസ് അവസാന വട്ട സുരക്ഷാ ക്രമീകരണങ്ങള് സജ്ജമാക്കി. കൃത്യം 11.01ന് മൂന്നാം സൈറണ്. കണ്ട്രോള് റൂമില് നിന്ന് സന്ദേശം ബ്ലാസ്റ്റ് ഷെഡ്ഡിലേക്ക് എത്തി. വെറും നിമിഷങ്ങളുടെ ഇടവേളക്കിടെ ഒന്ന് മൂന്ന് ആറ് പന്ത്രണ്ട് എന്ന രീതിയില് സ്ഫോടനം. പിന്നെ ഒരു വശം ചരിഞ്ഞ് ജെയിന് കോറല് കോവ് എന്ന പതിനാറ് നിലകെട്ടിടം നിലംപതിക്കുകയായിരുന്നു.
ഫ്ളാറ്റ് സമുച്ചയത്തിന്റെ തൊട്ടടുത്ത് കായലായതിനാല് കായലിലേക്ക് ഫ്ളാറ്റിന്റെ അവശിഷ്ടങ്ങള് പരമാവധി കുറച്ച് വീഴുന്ന വിധത്തിലാണ് സ്ഫോടനം ക്രമീകരിച്ചിരുന്നത്. ഫ്ളാറ്റിന് ചുറ്റും കായല് ചുറ്റിവരുന്നത് പോലെയാണ് ഇവിടുത്തെ ഭൂപ്രകൃതി.അതുകൊണ്ടുതന്നെ കായലിന് അപ്പുറത്ത് ഫ്ളാറ്റിന് അടുത്തുള്ള തുറസ്സായ സ്ഥലത്തേക്ക് റെയിന് ഫാള് മാതൃകയില് ചെരിഞ്ഞ് അമരുന്ന രീതിയിലായിരുന്നു സ്ഫോടനം.
കഴിഞ്ഞ ദിവസത്തില് നിന്ന് വ്യത്യസ്ഥമായി വന് പൊടിപടലമാണ് ഫ്ലാറ്റ് തകര്ന്ന് വീണതോടെ പരിസര പ്രദേശങ്ങളിലേക്ക് വ്യാപിച്ചത്. പൊടിപടലങ്ങള് നിയന്ത്രിക്കാന് ഫയര് ഫോഴ്സ് സംഘം സജ്ജമായിരുന്നു. ഇവര് അവിടത്തെ പൊടിപടലങ്ങള് നിയന്ത്രിക്കാനുള്ള ശ്രമം നടത്തുകയാണ്.
ഫ്ളാറ്റുകളുടെ 200 മീറ്റര് ചുറ്റളവിലുള്ള മുഴുവന് ആളുകളും ഒമ്പതുമണിക്ക് മുമ്പ് സ്ഥലത്തുനിന്ന് മാറണമെന്ന് പോലീസ് നേരത്തെ അറിയിച്ചിരുന്നു. ഇവര് സ്ഥലത്തുനിന്ന് മാറിയിട്ടുണ്ടോയെന്ന് ഉറപ്പുവരുത്താന് പോലീസ് പരിശോധന നടത്തിയതിനുശേഷമാണ് നടപടി ആരംഭിച്ചത്.
നാല് മണിവരെ പ്രദേശത്ത് നിരോധനാജ്ഞ നിലവിലുണ്ട്. ഉച്ചക്ക് രണ്ട് മണിക്കാണ് രണ്ടാമത്തെ ഫ്ളാറ്റായ ഗോള്ഡന് കായലോരം പൊളിച്ച് മാറ്റുന്നത്. കൂട്ടത്തില് പഴക്കം ചെന്ന ഫ്ളാറ്റാണ് ഗോള്ഡന് കായലോരം. കിലോ സ്ഫോടകവസ്തുക്കള് ഉപയോഗിച്ച് പ്രത്യേക സാങ്കേതിക വിദ്യയിലൂടെ സ്ഫോടനം നടത്താനാണ് ശ്രമം.
