കോഴിക്കോട്: കേന്ദ്രവിദേശകാര്യ സഹമന്ത്രി വി. മുരളീധരന്‍ ഇടപെട്ടപ്പോള്‍ സൗദിയില്‍ ജയിലിലടയ്ക്കപ്പെട്ട യുവാവിന് മോചനം. പുതുപ്പാടി കണ്ണങ്ങോട്ടുമ്മല്‍ ഷാജു പുലിയുള്ളക്കണ്ടി (41) ആണ് ജയില്‍ മോചിതനായത്. തൊഴിലുടമയുടെ നിര്‍ബന്ധത്തെതുടര്‍ന്ന് ലൈസന്‍സില്ലാതെ വാഹനം ഓടിച്ച കുറ്റത്തിനാണ് ഷാജു ജയിലിലായത്. ഷാജു ഓടിച്ച വാഹനത്തിന് പിന്നില്‍ സൗദി പൗരന്റെ വാഹനം ഇടിക്കുകയും ഇയാള്‍ മരിക്കുകയും ചെയ്തിരുന്നു.
ആഗസ്ത് ആറിനാണ് ഷാജു സൗദിയില്‍ എത്തുന്നത്. റിയാദിലെ ഷക്‌റ എന്ന സ്ഥലത്തായിരുന്നു ഷാജുവിന് ജോലി. നവംബര്‍ 30നാണ് അപകടം ഉണ്ടായത്. തൊഴിലുടമയുടെ നിര്‍ബന്ധത്തെ തുടര്‍ന്ന് ലൈസന്‍സില്ലാത്ത ഷാജു വാട്ടര്‍ ടാങ്കര്‍ ഓടിക്കുകയായിരുന്നു. ഈ വാട്ടര്‍ ടാങ്കറിന് പിന്നില്‍ സൗദി പൗരന്റെ കാര്‍ ഇടിച്ചു. അപകടത്തില്‍ സൗദി പൗരന്‍ മരിച്ചതോടെ ലൈസന്‍സില്ലാതെ വാഹനം ഓടിച്ച കുറ്റത്തിന് ഷാജു ജയിലിലായി. സുഹൃത്തുക്കളും ബന്ധുക്കളും ജയില്‍ മോചനത്തിനായി ശ്രമിച്ചെങ്കിലും നടപടികളായില്ല.
ഷാജുവിന്റെ ഭാര്യയുടെ പിതൃസഹോദരന്‍ മുന്‍ എംഎല്‍എ യു.സി. രാമന്‍ പ്രവാസി സംഘടനകളുമായി ബന്ധപ്പെടുകയും കേന്ദ്ര ഇടപെടല്‍ ഉണ്ടെങ്കില്‍ വേഗത്തില്‍ ജയില്‍ മോചനം സാധ്യമാകുമെന്ന നിര്‍ദേശവും ലഭിച്ചു. തുടര്‍ന്ന് ഭാര്യാപിതാവ് കുന്ദമംഗലത്തെ വള്ളിയാട്ടുമ്മല്‍ കൃഷ്ണന്‍ ബിജെപി നേതാക്കളായ അഡ്വ. വി.പി. ശ്രീപദ്മനാഭന്‍, പി. രഘുനാഥ്, സി.പി. കിഷോര്‍, പ്രവീണ്‍ പടനിലം എന്നിവര്‍ക്കൊപ്പം കോഴിക്കോട് ഗസ്റ്റ് ഹൗസിലെത്തി കേന്ദ്രമന്ത്രി വി. മുരളീധരനെ കാണുകയും വിവരങ്ങള്‍ ധരിപ്പിക്കുകയുമായിരുന്നു. തുടര്‍ന്ന് വി. മുരളീധരന്‍ ആവശ്യമായ നടപടികള്‍ സ്വീകരിക്കാമെന്ന് ഉറപ്പും നല്‍കി.
വി. മുരളീധരന്‍ ഇന്ത്യന്‍ എംബസിയുമായി ഇടപെടുകയും ഷാജുവിന്റെ ജയില്‍ മോചനത്തിന് വഴിതെളിയുകയുമായിരുന്നു. ജനുവരി ആറിന് ഷാജു ജയില്‍ മോചിതനായി. ഇന്ന് കോഴിക്കോട് എത്തുന്ന വി. മുരളീധരനെ കണ്ട് നന്ദിയറിയിക്കാന്‍ കാത്തിരിക്കുകയാണ് ഷാജുവിന്റെ കുടുംബം.
