ശ്രീനഗര്‍ : താഴ്‌വരയില്‍ ഭീകരവാദം പ്രചരിപ്പിക്കാന്‍ പാക്കിസ്ഥാന്‍ ശ്രമം നടത്തുകയാണെന്ന് ജമ്മു കശ്മീര്‍ ജനങ്ങള്‍. ഇതുമൂലം നിരവധി പ്രശ്‌നങ്ങള്‍ നേരിടേണ്ടി വന്നിട്ടുണ്ട്. പാക്കിസ്ഥാനോട് ഒരിഞ്ചു വിട്ടുവീഴ്‌ച്ചയ്‌ക്കു പോലും തങ്ങള്‍ തയ്യാറില്ലെന്നും അവര്‍ അറിയിച്ചു. ജമ്മു കശ്മീരിലെ സ്ഥിതിഗതികള്‍ അറിയുന്നതിനായി യുഎസ് അംബാസഡര്‍ കെന്നത്ത് ജസ്റ്റര്‍ ഉള്‍പ്പെടെ പതിനാറ് വിദേശ പ്രതിനിധികളും മുതിര്‍ന്ന നയതന്ത്ര ഉദ്യോഗസ്ഥരുമായി സംസാരിക്കവേയാണ് ജനങ്ങള്‍ ഇക്കാര്യം അറിയിച്ചത്.
വിവിധ രാജ്യങ്ങളില്‍ നിന്നുള്ള നയതന്ത്ര പ്രതിനിധികള്‍ വ്യാഴാഴ്ചയാണ് ശ്രീനഗറിലെത്തിയത്. യുഎസ്, വിയറ്റ്നാം, ദക്ഷിണ കൊറിയ, ബ്രസീല്‍, ഉസ്ബെക്കിസ്ഥാന്‍, നൈഗര്‍, നൈജീരിയ, മൊറോക്കോ, ഗയാന, അര്‍ജന്റീന, ഫിലിപ്പൈന്‍സ്, നോര്‍വേ, മാലിദ്വീപ്, ഫിജി, ടോഗോ, ബംഗ്ലാദേശ്, പെറു എന്നീരാജ്യങ്ങളില്‍ നിന്നുള്ള പ്രതിനിധികളാണ് എത്തിയത്.
കശ്മീരിന്റെ സ്വയംഭരണാധികാരം പിന്‍വലിക്കുകയും, സംസ്ഥാനത്തെ രണ്ട് കേന്ദ്രഭരണ പ്രദേശങ്ങളായി വിഭജിക്കാന്‍ തീരുമാനിക്കുകയും ചെയ്ത ശേഷം സര്‍ക്കാര്‍ സംഘടിപ്പിച്ച നയതന്ത്ര ഉദ്യോഗസ്ഥരുടെ ആദ്യ സന്ദര്‍ശനമാണിത്. സംഘത്തോടൊപ്പം വിദേശകാര്യ മന്ത്രാലയത്തിലെ മുതിര്‍ന്ന ഉദ്യോഗസ്ഥരും ഉണ്ടായിരുന്നു.
യുഎസ് സ്ഥാനപതിയെ കൂടാതെ ദക്ഷിണ കൊറിയന്‍ അംബാസഡര്‍ ഷിന്‍ ബോങ്-കില്‍, നോര്‍വീജിയന്‍ അംബാസഡര്‍ ഹാന്‍സ് ജേക്കബ് ഫ്രൈഡന്‍ലന്‍ഡ്, വിയറ്റ്നാമീസ് അംബാസഡര്‍ ഫാം സാന്‍ ചൗ, അര്‍ജന്റീനിയന്‍ സ്ഥാനപതി ഡാനിയേല്‍ ചുബുരു എന്നിവരും സംഘത്തിലെ പ്രധാന അംഗങ്ങളാണ്.
ശ്രീനഗറില്‍ എത്തിയ സംഘം പഞ്ചായത്ത് അംഗങ്ങളെയും തദ്ദേശ സ്വയംഭരണ സ്ഥാപനങ്ങളുടെയും എന്‍ജിഒകളുടെയും പ്രതിനിധികളെ കണ്ടു. കശ്മീരിലെ ഒരു ബ്ലഡ്ബാത്തിനെ കുറിച്ചുള്ള പാക്കിസ്ഥാന്റെ തെറ്റായ വിവരങ്ങള്‍ തങ്ങള്‍ പൂര്‍ണമായും നിരാകരിക്കുന്നുവെന്നും കഴിഞ്ഞ വര്‍ഷം ഓഗസ്റ്റ് അഞ്ചിന് സര്‍ക്കാര്‍ കൈക്കൊണ്ട നടപടികളെ രക്തച്ചൊരിച്ചില്‍ കൂടാതെ കൈകാര്യം ചെയ്തതിനെ ജനങ്ങള്‍ അഭിനന്ദിച്ചു. അതേസമയം സംസ്ഥാനത്തെ സമാധാനം നിലനിര്‍ത്താന്‍ ഇപ്പോള്‍ ഏര്‍പ്പെടുത്തിയിട്ടുള്ള നിയന്ത്രണങ്ങള്‍ ആവശ്യമാണെന്നും വിദേശ പ്രതിനിധികള്‍ അറിയിച്ചു.
ജമ്മു കശ്മീരിലെ സുരക്ഷാ സ്ഥിതിഗതികള്‍ മനസ്സിലാക്കുന്നതിനായി സുരക്ഷാ ഉദ്യോഗസ്ഥരുമായും സംഘം കൂടിക്കാഴ്ച നടത്തി. മേഖലയില്‍ സമാധാനം നിലനിര്‍ത്തുന്നതില്‍ ഭീകരവാദം ഉയര്‍ത്തുന്ന ഭീഷണി സംബന്ധിച്ചും അവര്‍ ചര്‍ച്ച നടത്തി.
പ്രതികരിക്കാൻ ഇവിടെ എഴുതുക: