അഹമ്മദാബാദ്: ഗുജറാത്തില് ഞായറാഴ്ച നടന്ന തദ്ദേശ ഉപതെരെഞ്ഞെടുപ്പിന്റെ ഫലം പുറത്ത് വന്നപ്പോള് 33 സീറ്റുകളില് 29 സീറ്റും നേടി ബിജെപി. മൂന്ന് സീറ്റുകളില് എതിരില്ലാതെയാണ് ബിജെപി സ്ഥാനാര്ഥികള് വിജയിച്ചിരിക്കുന്നത്. മത്സരം നടന്ന 30 സീറ്റുകളില് 26 നേടി ബിജെപി കോണ്ഗ്രസിനെ നിലം പരിശാക്കി. കോണ്ഗ്രസിന് വെറും മൂന്ന് സീറ്റുകള്കൊണ്ട് തൃപ്തിപ്പെടേണ്ടിവന്നു. ഒരു സ്വതന്ത്ര സ്ഥാനാര്ഥിക്കും വിജയിക്കാനായി. 41 സീറ്റുകളിലേക്കാണ് തെരെഞ്ഞെടുപ്പ് നടക്കാനിരുന്നതെങ്കിലും കോടതി ഉത്തരവിനെ തുടര്ന്ന് ഏഴ് സ്ഥലങ്ങളിലെ തെരെഞ്ഞെടുപ്പ്് റദ്ദ് ചെയ്യുകയായിരുന്നു.
വിജയത്തില് ജനങ്ങള്ക്ക് നന്ദി അറിയിച്ച് മുഖ്യമന്ത്രി വിജയ് രൂപാണി ട്വീറ്റ് ചെയ്തു. വരാനിരിക്കുന്ന ജില്ലാ, താലൂക്ക് തെരെഞ്ഞെടുപ്പുകളുടെ ഫലസൂചകമാണ് ബിജെപിയുടെ ഈ വിജയമെന്നും അദ്ദേഹം പറഞ്ഞു. കോണ്ഗ്രസ് കര്ഷകരേയും ഗ്രാമീണ ജനങ്ങളേയും തെറ്റിദ്ധരിപ്പിക്കാന് ശ്രമിച്ചെന്നും അതിന് തക്കതായ മറുപടി ജനങ്ങള് അവര്ക്ക് നല്കിയെന്നും ഗുജറാത്ത് ബിജെപി അധ്യക്ഷന് ജിത്തു വഖാനി പറഞ്ഞു. പ്രതിപക്ഷ കക്ഷികളുടെ വിഭജനത്തിന്റെ രാഷ്ട്രീയം പരാജയപ്പെട്ടെന്നും അദ്ദേഹം കൂട്ടിച്ചേര്ത്തു.
തെടെരഞ്ഞെടുപ്പ് ഫലം അംഗീകരിക്കുന്നതായും തോല്വിയുടെ കാരണങ്ങള് പരിശോധിക്കുമെന്നും കോണ്ഗ്രസ് വക്താവ് മനീഷ് ദോഷിയും പ്രതികരിച്ചു.
