തിരുവനന്തപുരം: കേരളാ ഗവര്ണര് ആരിഫ് മുഹമ്മദ് ഖാനെതിരെ തുടര്ച്ചയായി ഉണ്ടായിക്കൊണ്ടിരിക്കുന്ന ആക്രമണങ്ങളും അദ്ദേഹത്തിന് സുരക്ഷ ഉറപ്പാക്കുന്നതില് സംസ്ഥാന സര്ക്കാര് അനാസ്ഥ കാട്ടുന്നതും ചൂണ്ടിക്കാട്ടി മുതിര്ന്ന ബിജെപി നേതാവും എംഎല്എയുമായ ഒ. രാജഗോപാല് കേന്ദ്ര ആഭ്യന്തരമന്ത്രി അമിത് ഷായ്ക്ക് കത്തയച്ചു.
കേരളത്തില് ഭരണഘടനാത്തകര്ച്ച സംഭവിച്ചതായി ഒ. രാജഗോപാല് എംഎല്എ വ്യക്തമാക്കുന്നു. കഴിഞ്ഞ കുറെ ദിവസങ്ങളായി ആക്രമങ്ങള് നേരിടുന്ന ഗവര്ണര്ക്ക് മതിയായ സംരക്ഷണം ഒരുക്കുന്നതില് സംസ്ഥാന പോലീസ് അങ്ങേയറ്റം അനാസ്ഥയും നിരുത്തരവാദിത്വവും കാട്ടി. രാജ്യത്തെ ഫെഡറല് വ്യവസ്ഥക്ക് തന്നെ ഭീഷണിയാണിതെന്നും രാജഗോപാല് പറഞ്ഞു.
പ്രാസംഗീകാരുടെ പട്ടികയില് ഇല്ലാത്തവരെ ഗവര്ണര് പ്രസംഗിക്കുന്ന വേദിയില് അദ്ദേഹത്തോടൊപ്പം ഇരിക്കാന് അനുവദിച്ചത് ഗുരുതരമായ പ്രോട്ടോകോള് ലംഘനമാണ്. ഇവയൊന്നും വിശദീകരിക്കാന് ബാധ്യസ്ഥനായ മുഖ്യമന്ത്രി പിണറായി വിജയന് ഇത് വരെ കൂട്ടാക്കിയില്ല. പിണറായിയുടെ ജില്ലയില് അദ്ദേഹത്തിന്റെ അറിവും സമ്മതവും കൂടാതെ ഭരണത്തലവനായ ഗവര്ണര്ക്കെതിരെ അനിഷ്ട സംഭവങ്ങള് അരങ്ങേറുമെന്ന് വിശ്വസിക്കാനാവില്ല.
കേരളം ഗവര്ണറെ മാത്രമല്ല ലക്ഷദ്വീപിലേക്കുള്ള യാത്രാമധ്യേ കേരളത്തിലെത്തിയ മണിപ്പൂര് ഗവര്ണര് നജ്മ ഹെപ്തുള്ളക്കും ആലുവയില് മാര്ഗ്ഗതടസമുണ്ടാക്കാന് ശ്രമം നടന്നെന്ന് കത്തില് പറയുന്നു. കര്ണാടക മുഖ്യമന്ത്രി കേരളത്തില് തീര്ത്ഥാടനത്തിന് എത്തിയപ്പോഴും പല സ്ഥലങ്ങളില് വഴിതടയല് നേരിട്ടു.
നിയമസമാധാനം ഉറപ്പു വരുത്തുന്നതില് സംസ്ഥാന പോലീസ് പരാജയപ്പെടുന്നു എന്നതിന് മറ്റൊരു ഉദാഹരണമായി കേന്ദ്ര ആഭ്യന്തരമന്ത്രിക്കുള്ള കത്തില് രാജഗോപാല് ഉന്നയിച്ചിട്ടുള്ളത് കാസര്ഗോഡ് ആര്എസ്എസ് പഥസഞ്ചലനത്തിനെതിരെ നടന്ന ആക്രമണമാണ്. മുന്കൂട്ടി പോലീസിന്റെ അനുമതി വാങ്ങി സമാധാനപരമായി നടത്തിയ പഥസഞ്ചലനത്തെ ഡിവൈഎഫ്ഐക്കാര് ആക്രമിക്കുകയായിരുന്നെന്നും ഒ. രാജഗോപാല് എംഎല്എ കത്തില് വ്യക്തമാക്കുന്നു.
