തിരുവനന്തപുരം: പൗരത്യ ഭേദഗതി നിയമത്തെക്കുറിച്ചുള്ള കേരള ഗവര്‍ണ്ണര്‍ ആരിഫ് മുഹമ്മദ് ഖാന്റെ നിലപാട് ശരിയാണെന്ന് മിസോറാം ഗവര്‍ണ്ണര്‍ പി.എസ് ശ്രീധരന്‍പിള്ള. രാഷ്‌ട്രപതി ഒപ്പിട്ട നിയമത്തിനെതിരെ പറയാന്‍ ആരിഫ് മുഹമ്മദ് ഖാന് സാധിക്കില്ല. കേരളത്തില്ലാതെ ഇന്ത്യയില്‍ മറ്റെവിടെയെങ്കിലും ഗവര്‍ണ്ണറെ തടഞ്ഞ സംഭവം ഉണ്ടായിട്ടില്ല. കേരളം ഇത് എങ്ങോട്ടാണ് പോകുന്നത്. ഇത് പറഞ്ഞതിന്റെ പേരില്‍ തന്നെയും തടയേണ്ടവര്‍ക്ക് തടയാം. കേരളത്തില്‍ ഇന്ന് കാണുന്ന സംഭവങ്ങളില്‍ ദുഃഖമുണ്ട്. 88 ശതമാനം ക്രിസ്ത്യന്‍ ഭൂരിപക്ഷമുള്ള മിസോറാമിലെ ഏക എംപി പൗരത്വബില്ലിന് അനുകൂലമായാണ് പാര്‍ലമെന്റില്‍ നിലപാട് എടുത്തത്. ഈസ്റ്റര്‍ ദിനത്തില്‍ ശ്രീലങ്കയില്‍ 321 പേരെ ഐഎസ് ഭീകരര്‍ സ്‌ഫോടനത്തിലൂടെ കൊല്ലപ്പെടുത്തിയപ്പോള്‍ ഒരു മൗനപ്രാര്‍ത്ഥന പോലും കേരളത്തില്‍ ആരും നടത്തിയില്ല. ഇവര്‍ ആരെയാണ് ഭയക്കുന്നതെന്നും ശ്രീധരന്‍ പിള്ള ചോദിച്ചു.
പി.എസ് ശ്രീധരന്‍പിള്ള എഴുതിയ 105-ാമത് പുസ്തകമായ ‘എഴുത്ത്’ എന്ന പുസ്തകത്തിന്റെ പ്രകാശന ചടങ്ങില്‍ സംസാരിക്കുകയായിരുന്നു അദ്ദേഹം. റിട്ട. ജസ്റ്റിസ് എം.ആര്‍ ഹരിഹരന്‍ നായര്‍ പുസ്തകപ്രകാശനം ഉദ്ഘാടനം ചെയ്തു. ആര്‍.രാമചന്ദ്രന്‍ നായര്‍ അധ്യക്ഷത വഹിച്ചു. മുതിര്‍ന്ന മാധ്യമപ്രവര്‍ത്തകന്‍ എം.വി തോമസ് പുസ്തകം പരിചയപ്പെടുത്തി. സാഹിത്യകാരന്‍ പ്രൊഫ. ജോര്‍ജ് ഓണക്കൂര്‍ എഴുത്തുകാരന്‍ ചെറിയാന്‍ ഫിലിപ്പിന് പുസ്തകം നല്‍കി പ്രകാശനം ചെയ്തു. ഡോ. അബ്ദുള്‍ സലാം, കായംകുളം ഫിലിപ്പ്, ബിഷപ്പ് മാത്യൂസ് തുടങ്ങിയവര്‍ ആശംസകള്‍ അര്‍പ്പിച്ചു.
പി.എസ് ശ്രീധരന്‍പിള്ള മിസോറാം ഗവര്‍ണ്ണര്‍ പദവി ഏറ്റെടുത്ത ശേഷം എഴുതിയ ‘ഓ മിസോറാം’ എന്ന കവിത, ആള്‍ക്കൂട്ട കൊലപാതകം, പൗരത്വ ഭേദഗതി നിയമം ഉള്‍പ്പെടെ പരാമര്‍യിക്കുന്ന ലേഖനങ്ങളും ഈ പുസ്തകത്തില്‍ അടങ്ങിയിട്ടുണ്ട്. പുസ്തകത്തിന്റെ അവസാന ഭാഗത്ത് കഴിഞ്ഞ 104 പുസ്‌കതങ്ങളുടെ പട്ടികയുമുണ്ട്. 202 പേജ് അടങ്ങിയ പുസ്തകത്തിന് 200 രൂപയാണ് വില. ചെങ്ങന്നൂര്‍ അര്‍ജ്ജുന്‍ ബുക്സാണ് പുസ്തകം പുറത്തിറക്കിയിരിക്കുന്നത്.
