തൃശൂര്: പൗരത്വ നിയമ ഭേദഗതിക്കെതിരെ അനുമതിയില്ലാതെ പ്രതിഷേധിച്ച കവിയും ഗാന രചയിതാവുമായ റഫീഖ് അഹമ്മദിനെതിരെ കേസെടുത്തു. സംഗീത നിശ നടത്താനെന്ന പേരില് അനുമതി തേടിയശേഷം റഫീഖ് അഹമ്മദ് പൗരത്വ നിയമത്തിനെതിരെ പ്രതിഷേധിച്ചത്.
അനുമതിയില്ലാതെ പ്രതിഷേധം നടത്തിയെന്നും മൈക്കുപയോഗിച്ചതിനുമാണ് കേസെടുത്തിരിക്കുന്നത്. ഗാനരചയിതാവ് ബി.കെ.ഹരിനാരായണനെതിരെയും കേസെടുത്തിട്ടുണ്ട്.
തൃശൂര് അയ്യന്തോള് അമര് ജ്യോതി പാര്ക്കില് വെള്ളിയാഴ്ച വൈകിട്ട് സംഘടിപ്പിച്ച പ്രതിഷേധത്തിന് നിരവധി കലാകാരന്മാരേയും സംഘടിപ്പിച്ചിരുന്നു. എന്നാല് സംഗീത നിശ പ്രതിഷേധ പരിപാടിയാണെന്ന് അറിഞ്ഞതോടെ പോലീസ് ഇടപെട്ട് ഇവരെ മാറ്റാന് ശ്രമിച്ചു. വേള്ഡ് മ്യൂസിക് ഫെസ്റ്റിവല് കമ്മിറ്റിയുടെ ആഭിമുഖ്യത്തിലായിരുന്നു പ്രതിഷേധം.
സംഗീതനിശ നടത്താന് അനുമതി വേണമെന്നായിരുന്നു കോര്പ്പറേഷനോട് ഇവര് ആവശ്യപ്പെട്ടിരുന്നത്. തുടര്ന്ന് കോര്പ്പറേഷന്റെ നോട്ടീസ് ചൂണ്ടിക്കാട്ടി പരിപാടിക്കെത്തിയ ആളുകളെ പോലീസ് ഒഴിപ്പിച്ചു. തുടര്ന്ന് പാര്ക്കിന് പുറത്തായി പ്രതിഷേധ സമരം നടത്തുകയായിരുന്നു.
