കണ്ണൂര്: പൗരത്വ നിയമത്തെ പരസ്യമായി അനുകൂലിച്ച കേരളാ ഗവര്ണര് ആരിഫ് മുഹമ്മദ് ഖാനെതിരെ കരിങ്കൊടി പ്രതിഷേധവുമായി യൂത്ത് കോണ്ഗ്രസ്-കെഎസ്യു പ്രവര്ത്തകര്. ദേശീയ ചരിത്ര കോണ്ഗ്രസില് പങ്കെടുക്കാനായി കണ്ണൂര് സര്വകലാശാലയിലേക്ക് വരും വഴിയാണ് ഗവര്ണറെ പ്രതിഷേധക്കാര് കരിങ്കൊടി കാണിച്ചത്. പ്രതിഷേധക്കാരെ പോലീസ് അറസ്റ്റുചെയ്തു നീക്കി.
ചരിത്രകോണ്ഗ്രസ് ഉദ്ഘാടനത്തില് നിന്നും ഗവര്ണരെ മാറ്റി നിര്ത്തണമെന്ന് നേരത്തെ വിവിധ സംഘടനകള് ആവശ്യപ്പെട്ടിരുന്നു. എന്നാല് ചട്ടപ്രകാരമേ പരിപാടി നടത്തൂ എന്ന് സംഘാടകര് അറിയിച്ചു. തുടര്ന്ന് ഗവര്ണര്ക്കെതിരെ ശക്തമായി പ്രതിഷേധിക്കുമെന്ന് വിവിധ സംഘടന നേതാക്കള് വ്യക്തമാക്കി. അതേസമയം ഗവര്ണര് പങ്കെടുക്കുന്നതില് പ്രതിഷേധിച്ച് കെ. സുധാകരന് എംപിയും കണ്ണൂര് കോര്പ്പറേഷന് മേയറും ചരിത്ര കോണ്ഗ്രസില് നിന്ന് വിട്ട് നില്ക്കുമെന്ന് വ്യക്തമാക്കിയിരുന്നു.
