ന്യൂദല്ഹി: പൗരത്വ ഭേദഗതി നിയമത്തിനെതിരെ ഡിവൈഎഫ്ഐ നേതാക്കള്ക്കൊപ്പം ഡല്ഹിയില് കലാപം അഴിച്ചുവിടാനെത്തിയ ആക്ടിവിസ്റ്റ് ബിന്ദു അമ്മിണിയെ ഡല്ഹി പോലീസ് അറസ്റ്റ് ചെയ്തു. ഡിവൈഎഫ്ഐയ്ക്കും ഭീം ആര്മി പ്രവര്ത്തകര്ക്കുമൊപ്പം യു പി ഭവനു മുന്നില് കലാപം നടത്താന് എത്തിയിരുന്നു ഇവര്. സമരം അക്രമാസക്തമായതോടെയാണ് ബിന്ദു അമ്മിണിയെ ഡല്ഹി പോലീസ് അറസ്റ്റ് ചെയ്യുന്നത്.
നേരത്തെ പ്രതിഷേധിക്കാനെന്ന പേരില് എത്തിയവര് സംസ്ഥാനത്ത് കലാപങ്ങള് അഴിച്ചുവിട്ടിരുന്നു . സര്ക്കാരിന്റെയടക്കം നിരവധി വാഹനങ്ങള് കത്തിച്ചു . ഇതേ തുടര്ന്നാണ് പോലീസ് ഇന്ന് കര്ശന നടപടി സ്വീകരിച്ചത്.നേരത്തെ, ഡല്ഹിയില് കലാപം അഴിച്ചുവിടാനുള്ള ശ്രമത്തിനിടെ ഡിവൈഫ്ഐ ദേശീയ പ്രസിഡന്റ് പിഎ മുഹമ്മദ് റിയാസിനെ പോലീസ് അറസ്റ്റ് ചെയ്തിരുന്നു. യുപി മുഖ്യമന്ത്രി യോഗി ആദിത്യനാഥിനെതിരെയെന്ന പേരില് ഉത്തര്പ്രദേശ് ഹൗസിലേക്ക് അതിക്രമിച്ച് കടക്കാന് ശ്രമിക്കുന്നതിനിടെയാണ് മുഹമ്മദ് റിയാസ് അറസ്റ്റിലാകുന്നത്.
യു.പി. ഭവനിലേക്ക് കല്ലും വടികളുമായെത്തി വിവിധ സര്വകലാശാലകളില്നിന്നുള്ള വിദ്യാര്ഥികളെയും പോലീസ് അറസ്റ്റ് ചെയ്തു നീക്കിയിട്ടുണ്ട്. കലാപകാരികള് അഴിഞ്ഞാടുമെന്ന വിവരത്തിന്റെ അടിസ്ഥാനത്തില് സീലാംപൂര്, യു.പി. ഭവന്, ജാഫ്രാബാദ് എന്നിവിടങ്ങളില് പോലീസ് നിരോധനാജ്ഞ ഏര്പ്പെടുത്തിയിട്ടുണ്ട്. ജാമിഅ മില്ലിയ സര്വകലാശാല സമര സമിതിയുടെ നേതൃത്വത്തില് ഉത്തര് പ്രദേശ് സര്ക്കാറിനെതിരായ പ്രതിഷേധത്തിന്റെ ഭാഗമായി ഡല്ഹിയിലെ യു.പി ഭവന് ഉപരോധിക്കുമെന്ന് പ്രഖ്യാപിച്ചിരുന്നു. ഈ സാഹചര്യത്തില് യു.പി ഭവന് കനത്ത സുരക്ഷ ഏര്പ്പെടുത്തുകയും വിദ്യാര്ഥി ഉപരോധത്തിന് അനുമതി നിഷേധിക്കുകയുമായിരുന്നു. തുടര്ന്നാണ് മുഹമ്മദ് റിയാസിന്റെ നേതൃത്വത്തിലുള്ള സംഘം സ്ഥലത്തേക്ക് അതിക്രമിച്ച് കയറാന് ശ്രമിച്ചത്. അറസ്റ്റ് ചെയ്ത റിയാസിനെ ഡല്ഹി പോലീസ് സ്റ്റേഷനിലേക്ക് മാറ്റി.
