ശബരിമല: ഈ മണ്ഡലകാലത്തെ ശബരിമലയിലെ വരുമാനം 156 കോടി രൂപ കവിഞ്ഞതായി ദേവസ്വം ബോര്‍ഡ് പ്രസിഡന്റ് അഡ്വ. എന്‍. വാസു പത്രസമ്മേളനത്തില്‍ അറിയിച്ചു. കഴിഞ്ഞ 39 ദിവസത്തെ കണക്കുപ്രകാരം 156,60,19,661 രൂപയാണ്. ഇനിയും എണ്ണിത്തിട്ടപ്പെടുത്താത്ത നാണയങ്ങള്‍ കൂടി എണ്ണിക്കഴിയുന്നതോടെ വരുമാനത്തുക ഇനിയും വര്‍ധിക്കും.
കഴിഞ്ഞ വര്‍ഷം ഇതേ ദിവസം വരെ വരുമാനം 105,29,88,864 രൂപയായിരുന്നു. എന്നാല്‍ 2017ല്‍ 39 ദിവസങ്ങളിലായി 164,03,89,374 രൂപയാണ് നടവരുമാനം. ഈ മണ്ഡലകാലത്ത് ശബരിമലയില്‍ ഇതുവരെ ലഭിച്ച 156,60,19,661 രൂപയില്‍ അരവണയുടെ വില്‍പ്പനയിലൂടെയാണ് ദേവസ്വം ബോര്‍ഡിന് ഏറ്റവും കൂടുതല്‍ വരുമാനം ലഭിച്ചിരിക്കുന്നത്. അരവണയുടെ വില്‍പ്പന ഇനത്തില്‍ ഇപ്രാവശ്യം 67,76,87,780 രൂപ ലഭിച്ചു. കഴിഞ്ഞ വര്‍ഷം ഇത് 40,98,91,175 രൂപയായിരുന്നു. കാണിക്കയായി ഇപ്രാവശ്യം ലഭിച്ചത് 53,14,59,095 രൂപയാണ്. കഴിഞ്ഞ വര്‍ഷം ലഭിച്ച വരുമാനം 42,33,75,166 രൂപയാണ്.
അപ്പം ഇനത്തില്‍ ഇതുവരെ ലഭിച്ചത് 9,86,76,620 രൂപയാണ്. അപ്പം ഇനത്തില്‍ കഴിഞ്ഞ വര്‍ഷം ലഭിച്ചത് 3,88,13,180 രൂപയാണ്. അര്‍ച്ചനയിനത്തില്‍ 9,00,175 രൂപയും പഞ്ചാമൃതം വില്‍പ്പനയില്‍ 26,17,600 രൂപയുമാണ് ലഭിച്ചത്. എണ്ണിത്തിട്ടപ്പെടുത്താത്ത നാണയങ്ങളുടെ കണക്കുകൂടി ലഭിക്കുമ്പോള്‍ 2017-ലെ വരുമാനത്തിനടുത്ത് ലഭിക്കുമെന്നാണ് പ്രതീക്ഷയെന്നും അദ്ദേഹം പറഞ്ഞു.
കഴിഞ്ഞ രണ്ടുദിവസമായി പോലീസ് ഏര്‍പ്പെടുത്തിയ ചില നിയന്ത്രണങ്ങള്‍ ഭക്തര്‍ക്ക് നേരിയ വിഷമങ്ങളുണ്ടാക്കി. ശബരിമലയുമായി ബന്ധപ്പെട്ട പോലീസിന്റെ ക്രമീകരണങ്ങള്‍ ദേവസ്വം ബോര്‍ഡും പോലീസുമായി ചര്‍ച്ച ചെയ്ത് സമവായത്തിലെത്തും. ദേവസ്വം സുരക്ഷാ ജീവനക്കാരുടെ എണ്ണം വര്‍ധിപ്പിക്കുന്നതിനായി ബോര്‍ഡ് കൂടുതല്‍ നിയമനങ്ങള്‍ പരിഗണിക്കും. ദേവസ്വം ബോര്‍ഡ് അംഗങ്ങളായ അഡ്വ. കെ.എസ്. രവി, അഡ്വ. എന്‍. വിജയകുമാര്‍, ദേവസ്വം കമ്മീഷണര്‍ ബി.എസ്. തിരുമേനി, ഡെപ്യൂട്ടി ദേവസ്വം കമ്മീഷണര്‍ സുധീഷ്‌കുമാര്‍, എക്‌സിക്യൂട്ടീവ് ഓഫീസര്‍ വി.എസ്. രാജേന്ദ്രപ്രസാദ് എന്നിവര്‍ പത്രസമ്മേളനത്തില്‍ പങ്കെടുത്തു.
