കരുനാഗപ്പള്ളി (കൊല്ലം): കേന്ദ്ര സര്ക്കാര് നടപ്പാക്കിയ പൗരത്വ നിയമഭേദഗതിയെ അനുകൂലിച്ച് ഫേസ്ബുക്കില് പോസ്റ്റിട്ട ഡോക്ടര്ക്ക് മതമൗലികവാദികളുടെ ഭീഷണി. വിവിധ രാജ്യങ്ങളില് ഹോസ്പിറ്റല് ശൃംഖലകളുള്ള മെഡിക്കല് രംഗത്തെ പ്രമുഖ സ്ഥാപനത്തിന്റെ ദോഹയില് പ്രവര്ത്തിക്കുന്ന ശാഖയിലെ ഡോ. അജിത്ത് ശ്രീധരനു നേരെയാണ് മതമൗലികവാദികളുടെ ഭീഷണി. പൗരത്വ ഭേദഗതി നിയമത്തെ അനുകൂലിച്ച് ഫേസ്ബുക്കില് കുറിപ്പിട്ടതോടെ ഇദ്ദേഹം ജോലി ചെയ്യുന്ന ഹോസ്പിറ്റലിനെതിരെയും മതമൗലികവാദികള് ഭീഷണിയുമായി രംഗത്തെത്തി.
2009ല് ആരംഭിച്ച ഹോസ്പിറ്റലിന്റെ തുടക്കം മുതല് പ്രധാന ചുമതലക്കാരനായി ഡോ. അജിത്ത് ശ്രീധരന് ദോഹയില് പ്രവര്ത്തിച്ചുവരുന്നു. കേന്ദ്ര സര്ക്കാരിന്റെ ഭരണനേട്ടങ്ങളെ ചൂണ്ടിക്കാട്ടി ഫേസ്ബുക്കില് കുറിപ്പ് എഴുതാറുള്ള ഇദ്ദേഹം പാര്ലമെന്റ് പാസാക്കിയ പൗരത്വ ഭേദഗതി നിയമത്തെ അനുകൂലിച്ചും പോസ്റ്റിട്ടിരുന്നു. ഈ ഭേദഗതി മുസ്ലിം സമൂഹത്തിനെതിരാണെന്നും മതത്തെ വെല്ലുവിളിച്ച് പോസ്റ്റിട്ട ഡോക്ടറെ ഹോസ്പിറ്റലില് നിന്ന് പുറത്താക്കണമെന്നും ആവശ്യപ്പെട്ട് ഒരുവിഭാഗം മതമൗലികവാദികള് ഹോസ്പിറ്റല് മാനേജുമെന്റിനെ ഭീഷണിപ്പെടുത്തുകയും സമ്മര്ദ്ദത്തിലാക്കുകയും ചെയ്തു. സമ്മര്ദ്ദം വര്ധിച്ചതോടെ ഡോക്ടര് ജോലി വിട്ട് നാട്ടിലേക്ക് മടങ്ങി.
2015ല് ദേശീയഗാനവുമായി ബന്ധപ്പെട്ട വിഷയത്തില് ദേശീയ ഗാനാലാപനം നിര്ബന്ധമാക്കണമെന്ന് പോസ്റ്റിട്ടതിനും ഡോക്ടര്ക്കു നേരെ മതമൗലികവാദികള് ഭീഷണി മുഴക്കിയിരുന്നു. കരുനാഗപ്പള്ളി സ്വദേശിയായ ഇദ്ദേഹം പത്തു വര്ഷത്തോളം കരുനാഗപ്പള്ളിയിലെ പ്രമുഖ ഹോസ്പിറ്റലുകളില് സേവനം അനുഷ്ഠിച്ചശേഷമാണ് ദോഹയിലെ ഹോസ്പിറ്റലില് ജോലിക്ക് പ്രവേശിച്ചത്.
