തിരുവനന്തപുരം: ഭക്ഷണത്തോടൊപ്പം നാലാമതും സവോള നല്കാത്തതിന് ഡിവൈഎഫ്ഐ നേതാക്കള് ഹോട്ടല് ആക്രമിച്ചു. ചീനച്ചട്ടികൊണ്ട് ബീഹാര് സ്വദേശിയായ ജീവനക്കാരന്റെ തല അടിച്ചു പൊട്ടിച്ചു. വഞ്ചിയൂര് കൈതമുക്കിലെ വെട്ടുകാട്ടില് ഹോട്ടലാണ് ഡിവൈഎഫ്ഐ പ്രവര്ത്തകര് അടിച്ചു തകര്ത്തത്. രാത്രി എട്ടിനായിരുന്നു സംഭവം ഭക്ഷണം കഴിക്കാനെത്തിയവര് അപ്പവും ചാറുമാണ് ആവശ്യപ്പെട്ടത്. തുടര്ന്ന് മൂന്ന് പ്രാവശ്യം സവോള ആവശ്യപ്പെട്ടു. നാലാമതും സവോള ചോദിച്ചപ്പോള് വിലകൂടുതലാണെന്ന് പറഞ്ഞതാണ് ഡിവൈഎഫ്ഐ പ്രവര്ത്തകരെ പ്രകോപിപ്പിച്ചത്.
തുടര്ന്ന് ഇവര് ഇരുമ്പ് കസേരകൊണ്ട് കട തല്ലിതകര്ക്കുകയായിരുന്നു. ക്യാഷ് കൗണ്ടര് അടക്കമുള്ളവ അക്രമികള് അടിച്ചു തകര്ത്തു. തുടര്ന്ന് ഇവര് കടയുടെ മുമ്പിലുള്ള ചില്ല് കൗണ്ടര് അടിച്ചു തകര്ക്കുകയും ബീഹാറി സ്വദേശിയായ ജീവനക്കാരന്റെ തല ചീനച്ചട്ടികൊണ്ട് അടിച്ചു തകര്ക്കുകയുമായിരുന്നു. തലയുടെ രണ്ട് ഭാഗത്ത് പരുക്കേറ്റ ഇയാളെ ജനറല് ആശുപത്രിയില് പ്രവേശിപ്പിച്ചു. മൂന്ന് പേരടങ്ങുന്ന ഡിവൈഎഫ്ഐ സംഘമാണ് കട ആക്രമിച്ചത്.
ഡിവൈഎഫ്ഐ വഞ്ചിയൂര് മേഖല കമ്മിറ്റി പ്രസിഡന്റായ രഞ്ജിത്ത് സെക്രട്ടറി ദിനീത്, മേഖലാ ട്രഷറര് അജിത്ത് എന്നിവരാണ് ആക്രമണത്തിന് നേതൃത്വം നല്കിയതെന്ന് കടയുടമ പറഞ്ഞു. അക്രമം നടന്ന ഉടന് കടയുടമകള് പോലീസില് വിളിച്ച് അറിയിച്ചെങ്കിലും കടയില് തെളിവെടുക്കാന് എത്തിയില്ല. ഡിവൈഎഫ്ഐ പ്രവര്ത്തകര്ക്ക് പോലീസ് ഒത്താശ നല്കുകയാണെന്ന് കടയുടമകള് ആരോപിച്ചു.
