കട്ടക്ക്: എല്ലാ തയ്യാറെടുപ്പുകളും കഴിഞ്ഞു. ഇനി കലാശപ്പോരാട്ടം. പരമ്പര വിജയം നിശ്ചയിക്കുന്ന അവസാന ഏകദിനത്തില് ഇന്ത്യയും വിന്ഡീസും ഇന്ന് കൊമ്പുകോര്ക്കും. ആരു ജയിച്ചാലും അവര്ക്ക് പരമ്പര. ബാരാബതി സ്റ്റേഡിയത്തില് ഉച്ചകഴിഞ്ഞ് 1.30 ന് കളി തുടങ്ങും.
തുടര്ച്ചയായ പത്താം പരമ്പര വിജയം ലക്ഷ്യമിട്ടാണ് കോഹ് ലിപ്പട മൂന്നാം ഏകദിനത്തിനിറങ്ങുന്നത്. അതേസമയം പതിമൂന്ന് വര്ഷത്തെ കാത്തിരിപ്പ് അവസാനിപ്പിച്ച് ഇന്ത്യക്കെതിരായ ആദ്യ ഏകദിന പരമ്പര വിജയം കൈപ്പിടയിലൊതുക്കാനുള്ള ശ്രമത്തിലാണ് കീറോണ് പൊള്ളാര്ഡിന്റെ കരീബിയന്പട.
വിശാഖപട്ടണത്തെ രണ്ടാം ഏകദിനത്തില് വിന്ഡീസിനെ പൊളിച്ചടുക്കിയതിന്റെ ആത്മവിശ്വാസത്തിലാണ് ഇന്ത്യ. ഈ വര്ഷത്തെ അവസാന മത്സരത്തിലും വിജയക്കൊടി നാട്ടുകയാണ് ഇന്ത്യയുടെ ലക്ഷ്യം. രണ്ടാം മത്സരത്തില് 107 റണ്സിന്റെ ഉജ്ജ്വല വിജയം നേടിയതോടെയാണ് പരമ്പരയില് ഇരു ടീമുകളും ഒപ്പത്തിനൊപ്പം എത്തിയത്്. ചെന്നൈയിലെ ആദ്യ മത്സരം വിന്ഡീസ് പിടിച്ചു.
വിശാഖപട്ടണത്ത് ഓപ്പണര്മാരായ രോഹിത് ശര്മയുടെയും കെ.എല്. രാഹുലിന്റെയും സെഞ്ചുറികളും സ്പിന്നര് കുല്ദീപ് യാദവിന്റെ ഹാട്രിക്കുമാണ് ഇന്ത്യക്ക്് വിജയമൊരുക്കിയത്. 159 റണ്സ് കുറിച്ച രോഹിത് കളിയിലെ കേമനുമായി. ഇന്ന് ഒമ്പത് റണ്സ് കൂടി നേടിയാല് ശര്മയ്ക്ക് ഒരു റെക്കോഡ് സ്വന്തമാകും. എല്ലാ ഫോര്മാറ്റിലുമായി ഒരു വര്ഷത്തില് ഏറ്റവും കൂടുതല് റണ്സ് കുറിക്കുന്ന ഓപ്പണറെന്ന റെക്കോഡാണ് സ്വന്തമാകുക. നിലവില് ശ്രീലങ്കയുടെ ജയസൂര്യയാണ് ഈ റെക്കോഡിനുടമ.
നാലാം നമ്പറിലിറങ്ങുന്ന ശ്രേയസ് അയ്യരും വിക്കറ്റ കീപ്പര് ബാറ്റ്സ്മാന് ഋഷഭ് പന്തും മികച്ച ഫോമിലാണ്. ഏറെ പഴി കേട്ട പന്ത് വിശാഖപട്ടണത്ത് തകര്ത്തടിച്ചു. അവസാന പോരിലും മികവ് കാട്ടുമെന്ന് പ്രതീക്ഷിക്കാം.
പരിക്കേറ്റ ദീപക് ചഹാറിന് പകരം ടീമിലെത്തിയ ദല്ഹി പേസര് നവ്ദീപ് സെയ്നി ഇന്ന് ഏകദിനത്തില് അരങ്ങേറ്റം കുറിച്ചേക്കും. കുല്ദീപും മുഹമ്മദ് ഷമിയുമൊക്ക അണിനിരക്കുന്ന ഇന്ത്യന് ബൗളിങ് ശക്തമാണ്.
വിന്ഡീസിന്റെ ഹെറ്റ്മെയര്- ഹായ് ഷോപ്പ് സഖ്യമാണ് അപകടകാരി. ചെന്നൈയില് ഇവരുടെ മികവിലാണ് വിന്ഡീസ് വിജയം പിടിച്ചത്്. വിശാഖപട്ടണത്തെ രണ്ടാം മത്സരത്തിലും ഇവര് പൊരുതിയെങ്കിലും വിന്ഡീസിനെ ജയത്തിലേക്ക് അടുപ്പിക്കാനായില്ല. ബൗളിങ്ങില് ഷെല്ഡണ് കോട്രലാണ് അവരുടെ കരുത്ത്.
ബാരാബതിസ്റ്റേഡിയത്തിലെ പിച്ചില് റണ്ണൊഴുമെന്നുറപ്പാണ്. രണ്ട് വര്ഷം മുമ്പാണ് ഇവിടെ അവസാന ഏകദിനം നടന്നത്. അന്ന് 382 റണ്സ് അടിച്ചുകൂട്ടിയ ഇന്ത്യ 15 റണ്സിന് ഇംഗ്ലണ്ടിനെ തോല്പ്പിക്കുകയും ചെയ്തു. ആദ്യ രണ്ട് മത്സരങ്ങളിലും ടോസ് നേടിയ വിന്ഡീസ് ഇന്ത്യയെ ബാറ്റിങ്ങിനയച്ചു. എന്നാല് ഇന്ന് ടോസ് നേടുന്ന ടീം രണ്ടാമത് ബൗള് ചെയ്യുന്നതിനെ കുറിച്ച് ചിന്തിക്കുമെന്നറുപ്പാണ്. കാരണം രാത്രിയിലെ മഞ്ഞുവീഴ്ചയാണ്.
