ടൂറിന്‍: ക്രിസ്റ്റിയാനോ റൊണാള്‍ഡോയുടെ ഇരട്ട ഗോള്‍ മികവില്‍ യുവന്റസിന് സീരി എയില്‍ മികച്ച ജയം. ഒന്നിനെതിരെ മൂന്ന് ഗോളുകള്‍ക്ക് ഉദിനെസെയെ അവര്‍ പരാജയപ്പെടുത്തി. കഴിഞ്ഞയാഴ്ച ലാസിയോട് 3-1ന് തോറ്റ യുവന്റസിന്റെ തകര്‍പ്പന്‍ തിരിച്ചുവരവാണ് ഉദിനെസെയ്‌ക്കെതിരെ കണ്ടത്. 9, 37 മിനിറ്റുകളിലാണ് റൊണാള്‍ഡോ ഗോള്‍ നേടിയത്. ഇതോടെ സീസണില്‍ റൊണാള്‍ഡോക്ക് 11 ഗോളായി. 45-ാം മിനിറ്റില്‍ ലിയോണാര്‍ഡോ ബൊനൂച്ചി യുവന്റസിനായി മൂന്നാം ഗോള്‍ നേടി. ഇഞ്ച്വറി ടൈമിലാണ് ഉദിനെസെയുടെ ആശ്വസഗോള്‍. പുസ്സെറ്റോയാണ് ഗോള്‍ നേടിയത്.
ഇതോടെ ക്രിസ്റ്റിയാനോ മറ്റൊരു നേട്ടവും സ്വന്തമാക്കി. യൂറോപ്പില്‍ കഴിഞ്ഞ 15 സീസണിലും പത്തിലധികം ഗോള്‍ നേടുന്ന ഏക താരമെന്ന റെക്കോഡാണ് ക്രിസ്റ്റിയാനോ സ്വന്തം പേരിലാക്കിയത്. യൂറോപ്പിലെ അഞ്ച് പ്രമുഖ ലീഗുകളില്‍ മറ്റൊരു കളിക്കാരനുംഇതുവരെ ഈ നേട്ടം സ്വന്തമാക്കാനായിട്ടില്ല.
മറ്റൊരു മത്സരത്തില്‍ ഇന്റര്‍ മിലാന്‍ സമനിലയില്‍ കുടുങ്ങി. ഫിയോറന്റീനയാണ് 1-1ന് ഇന്ററിനെ പിടിച്ചുകെട്ടിയത്. എട്ടാം മിനിറ്റില്‍ വലേറോയിലൂടെ ഇന്റര്‍ ലീഡ് നേടിയെങ്കിലും പരിക്ക് സമയത്തിന്റെ രണ്ടാം മിനിറ്റില്‍ ദുസാന്‍ വഌഹോവിച്ച് ഫിയോറന്റീനയുടെ സമനില ഗോള്‍ നേടി. സമനിലയില്‍ കുടുങ്ങിയെങ്കിലും 16 കളികളില്‍ നിന്ന് 39 പോയിന്റുമായി ഇന്ററാണ് പട്ടികയില്‍ ഒന്നാമത്. രണ്ടാമതുള്ള യുവന്റസിനും 39 പോയിന്റുണ്ട്. മറ്റ് പ്രധാന മത്സരങ്ങളില്‍ റോമ 3-1ന് സ്പാലിനെ തോല്‍പ്പിച്ചപ്പോള്‍ എസി മിലാന്‍-സാസ്സുലോ കളി ഗോള്‍രഹിത സമനിലയില്‍ കലാശിച്ചു.
