ലണ്ടന്‍: ഇംഗ്ലീഷ് പ്രീമിയര്‍ ലീഗിലെ സൂപ്പര്‍ പോരാട്ടത്തില്‍ കരുത്തരായ ആഴ്‌സണലിന് തോല്‍വി. സ്വന്തം ഗ്രൗണ്ടില്‍ നടന്ന മത്സരത്തില്‍ മറുപടിയില്ലാത്ത മൂന്ന് ഗോളുകള്‍ക്ക് മാഞ്ചസ്റ്റര്‍ സിറ്റിയാണ് ആഴ്‌സണലിനെ തകര്‍ത്തത്. മറ്റൊരു മത്സരത്തില്‍ മാഞ്ചസ്റ്റര്‍ യുണൈറ്റഡ് സമനിലയില്‍ കുടുങ്ങിയപ്പോള്‍ ടോട്ടനം വിജയം കണ്ടു.
എമിറേറ്റ്‌സ് സ്‌റ്റേഡിയത്തില്‍ നടന്ന പോരാട്ടത്തില്‍ കെവിന്‍ ഡി ബ്രുയിന്റെ ഇരട്ടഗോളാണ് ആഴ്‌സണലിനെ കനത്ത പരാജയത്തിലേക്ക് തള്ളിയിട്ടത്. 2, 40 മിനിറ്റുകളിലാണ് ഡി ബ്രുയിന്‍ ഗോള്‍ നേടിയത്. 15-ാം മിനിറ്റില്‍ റഹീം സ്റ്റെര്‍ലിംഗും സിറ്റിക്കായി ലക്ഷ്യം കണ്ടു. മൂന്ന് ഗോളുകളും പിറന്നത് ആദ്യ പകുതിയില്‍. പന്ത് കൈവശംവെക്കുന്നതിലും അവസരങ്ങള്‍ സൃഷ്ടിക്കുന്നതിലും ഏറെ മുന്നിട്ടുനിന്നത് മാഞ്ചസ്റ്റര്‍ സിറ്റിയായിരുന്നു. കളിയുടെ ആദ്യ മിനിറ്റില്‍ തന്നെ ആഴ്‌സണലിന്റെ ഗബ്രിയേല്‍ മാര്‍ട്ടിനെല്ലിയുടെ ഇടംകാലന്‍ ഷോട്ട് സിറ്റി ഗോളി രക്ഷപ്പെടുത്തുന്നതുകണ്ടാണ് കളി തുടങ്ങിയത്. എന്നാല്‍ തൊട്ടടുത്ത മിനിറ്റില്‍ ആഴ്‌സണലിനെ ഞെട്ടിച്ച് സിറ്റി ഗോളടിച്ചു. മൈതാനമധ്യത്തുനിന്ന് നീട്ടിക്കിട്ടിയ പന്തുമായി ബോക്‌സില്‍ പ്രവേശിച്ച ഗബ്രിയേല്‍ ജീസസ് നല്‍കിയ പാസ്നല്ലൊരു ഷോട്ടിലൂടെ ഡി ബ്രുയന്‍ വലയിലെത്തിക്കുകയായിരുന്നു. 15-ാം മിനിറ്റില്‍ സിറ്റി വീണ്ടും ലക്ഷ്യം കണ്ടു. ഇത്തണ വഴിയൊരുക്കിയത് ഡി ബ്രുയനുംഗോളടിച്ചത് സ്റ്റര്‍ലിംഗും. 40-ാം മിനില്‍ബ്രുയന്‍ തന്റെ രണ്ടാം ഗോളും ടീമിന്റെ മൂന്നാം ഗോളും നേടി. ഫില്‍ ഫോഡന്‍ തള്ളിക്കൊടുത്ത പന്ത് സ്വീകരിച്ച് എതിര്‍ പ്രതിരോധത്തെ വകഞ്ഞുമാറ്റി ബോക്‌സിന് പുറത്തുനിന്ന് ഡി ബ്രുയന്‍ പായിച്ച ഷോട്ടാണ് ആഴ്‌സണല്‍ വലയില്‍ കയറിയത്. പിന്നീട് രണ്ടാം പകുതിയില്‍ ഗോള്‍ മടക്കാന്‍ ആഴ്‌സണലും ലീഡ് ഉയര്‍ത്താന്‍ സിറ്റിയും കിണഞ്ഞു ശ്രമിച്ചെങ്കിലും കൂടുതല്‍ ഗോള്‍ വീണില്ല. 17 കളിയില്‍ 35 പോയിന്റുമായി സിറ്റി മൂന്നാം സ്ഥാനത്താണ്. ആഴ്‌സണല്‍ നിലവില്‍ ഒന്‍പതാം സ്ഥാനത്താണ്. 49 പോയിന്റോടെ ലിവര്‍പൂള്‍ ഒന്നാമതും 39 പോയിന്റോടെ ലെസ്റ്റര്‍ സിറ്റി രണ്ടാം സ്ഥാനത്തും തുടരും.
യുണൈറ്റഡിനെ തളച്ച് എവര്‍ട്ടണ്‍ മറ്റൊരു മത്സരത്തില്‍ മാഞ്ചസ്റ്റര്‍ യുണൈറ്റഡിന് സമനില. ഓള്‍ഡ് ട്രഫോര്‍ഡില്‍ നടന്ന കളിയില്‍ പോയിന്റ് പട്ടികയില്‍ 16-ാം സ്ഥാനത്തുള്ള എവര്‍ട്ടനാണ് യുണൈറ്റഡിനെ 1-1ന് തളച്ചത്. എവേര്‍ട്ടനാണ് യുണൈറ്റഡിനെ തളച്ചത്.
36-ാം മിനിറ്റില്‍ വിക്ടര്‍ ലിന്‍ഡെലോഫിന്റെ സെല്‍ഫ് ഗോളില്‍ എവേര്‍ട്ടണ്‍ ലീഡ് നേടി. 77-ാം മിനിറ്റില്‍ മേസണ്‍ ഗ്രീന്‍വുഡ് യുണൈറ്റഡിന്റെ സമനില ഗോള്‍ കണ്ടെത്തി. 17 കളിയില്‍ 25 പോയിന്റുള്ള യുണൈറ്റഡ് ആറാം സ്ഥാനത്താണ്.
ടോട്ടനത്തിന് നാടകീയ ജയംഅതേസമയം ടോട്ടനം നാടകീയജയം സ്വന്തമാക്കി. വൂള്‍വ്‌സിനെ ഒന്നിനെതിരെ രണ്ട് ഗോളിനാണ് ടോട്ടനം തോല്‍പ്പിച്ചത്. പരിക്ക് സമയത്ത് വെര്‍ട്ടോഗന്‍ നേടിയ ഗോളാണ് ടോട്ടനത്തിന് ജയം നേടിക്കൊടുത്തത്. എട്ടാം മിനിറ്റില്‍ ലൂക്കാസ് മൗറ ടോട്ടനത്തിനെ മുന്നിലെത്തിച്ചു.
67-ാം മിനിറ്റില്‍ ആഡാമ ട്രോറെ വൂള്‍വ്‌സിനായി തിരിച്ചടിച്ചു. പരിക്ക് സമയത്തിന്റെ ഒന്നാം മിനിറ്റിലായിരുന്നു വെര്‍ട്ടോഗന്റെ വിജയഗോള്‍. 17 കളിയില്‍ 26 പോയിന്റുമായി ടോട്ടനം അഞ്ചാം സ്ഥാനത്തേക്കുയര്‍ന്നു. പോച്ചെറ്റിനോയെ പുറത്താക്കി മൗറീഞ്ഞോ പരിശീലക സ്ഥാനം ഏറ്റെടുത്തശേഷം അഞ്ച് മത്സരങ്ങളില്‍ ടോട്ടനത്തിന്റെ നാലാം ജയമാണിത്.
