ന്യൂദല്ഹി: രാഷ്ട്രപതി ഒപ്പിട്ടു നിയമമാക്കിയ ദേശീയ പൗരത്വ ഭേദഗതി ബില് നടപ്പാക്കില്ലെന്ന് കേരളം അടക്കം അഞ്ചു സംസ്ഥാനങ്ങളുടെ പ്രഖ്യാപനത്തോട് പ്രതികരിച്ച് കേന്ദ്രസര്ക്കാര്. വിഷയം യൂണിയന് ലിസ്റ്റിനു കീഴില് പെടുന്നതാണെന്നും ഇന്ത്യന് ഭരണഘടനയുടെ ഏഴാം അനുച്ഛേദ പ്രകാരമുള്ളതാണെന്നും കേന്ദ്രസര്ക്കാര് വൃത്തങ്ങള് വ്യക്തമാക്കി. ഇത്തരത്തില് പാസാക്കുന്ന നിയമങ്ങള് എല്ലാ സംസ്ഥാനങ്ങള്ക്കും ബാധകമാണ്. നിയമം നടപ്പാക്കില്ലെന്ന് ഒരു സംസ്ഥാനസര്ക്കാരിനു പറയാനാകില്ല. അത്തരത്തില് പ്രവര്ത്തിച്ചാല് ഭരണഘടന വിരുദ്ധമാണെന്നും സര്ക്കാരിന്റെ നിലനില്പ്പിനെ തന്നെ ബാധിക്കുമെന്നുമാണ് കേന്ദ്രസര്ക്കാര് വൃത്തങ്ങള് വ്യക്തമാക്കുന്നത്.
കഴിഞ്ഞ ദിവസമാണ് നിയമം കേരളം നടപ്പാക്കില്ലെന്ന് വാര്ത്താസമ്മേളനം വിളിച്ചു മുഖ്യമന്ത്രി വിജയന് പ്രഖ്യാപിച്ചത്. ഇതിനെതിരേ ബിജെപി നേതാക്കള് രംഗത്തെത്തിയിരുന്നു. മുഖ്യമന്ത്രിക്ക് ഇതു സംബന്ധിച്ച് കാര്യമായ വിവരമില്ലെന്നായിരുന്നു പ്രതികരണം. എതാണ്ട് അതു ശരിവയ്ക്കുന്ന സ്ഥിരീകരണമാണ് ഇപ്പോള് കേന്ദ്രസര്ക്കാര് വൃത്തങ്ങളും നല്കുന്നത്.
വാര്ത്താസമ്മേളനത്തില് പിണറായി പറഞ്ഞതിന്റെ പ്രസക്തഭാഗം- ഭരണഘടനയുടെ അടിസ്ഥാന ഘടനയെ അട്ടിമറിക്കാന് കഴിയില്ല എന്ന് സുപ്രീംകോടതി പലപ്പോഴായി വ്യക്തമാക്കിയിട്ടുണ്ട്. അതുകൊണ്ടുതന്നെ ഈ നിയമവും ജുഡീഷ്യല് പരിശോധനയില് നിലനില്ക്കില്ല എന്നത് വ്യക്തമാണ്. അത് ബോധ്യമുള്ളപ്പോള് തന്നെ അധികാരത്തിന്റെ മുഷ്ക് ഉപയോഗിച്ച് ഭരണഘടനാവിരുദ്ധമായ നിയമങ്ങള് പാസാക്കുന്നതിനു പിന്നില് നീചമായ രാഷ്ട്രീയ ലക്ഷ്യങ്ങളാണ്. ജനാധിപത്യത്തെയും സമത്വത്തെയും പിച്ചിച്ചീന്തി സമഗ്രാധിപത്യം സ്ഥാപിക്കാനും ഇന്ത്യയെ മതരാഷ്ട്രമാക്കാനുമുള്ള ഗൂഢാലോചനയാണ് അരങ്ങേറുന്നത്. ഇന്ത്യയുടെ ജനാധിപത്യ റിപ്പബ്ലിക്ക് എന്ന സ്വത്വത്തെ അട്ടിമറിക്കുന്ന നടപടികളിലേക്കുള്ള ചുവടുവെയ്പ്പാണ് ഇത് എന്ന് സംശയിക്കുന്നതില് തെറ്റില്ല. ഇതിനെതിരെ ജനാധിപത്യത്തിലും ഭരണഘടനയിലും വിശ്വസിക്കുന്ന എല്ലാ വിഭാഗം ജനങ്ങളും അണിനിരക്കണം. രാജ്യത്തിന്റെ സമ്പദ്ഘടനപരിതാപകരമായ നിലയിലാണ് എന്ന് വ്യക്തമാക്കുന്ന പഠനങ്ങളും കണക്കുകളും പുറത്തുവന്നിട്ടുണ്ട്. അത്തരം ഗുരുതര പ്രശ്നങ്ങളില് നിന്ന് ജനശ്രദ്ധ തിരിച്ചുവിടാനാണ് വര്ഗീയശക്തികള് ഭിന്നിപ്പിക്കുന്ന നടപടികളിലേക്ക് തിരിയുന്നത്. ബ്രിട്ടീഷ് സാമ്രാജ്യത്വം ഇന്ത്യയിലും ഹിറ്റ്ലര് ജര്മനിയിലുമൊക്കെ വിജയകരമായി പരീക്ഷിച്ച തന്ത്രമാണത്. അവയ്ക്ക് വലിയ ആയുസ്സുണ്ടാവില്ല എന്ന് ചരിത്രം വ്യക്തമാക്കിയിട്ടുണ്ട്. രാജ്യത്തിന്റെ വിവിധ ഭാഗങ്ങളില് ഈ നിയമഭേദഗതിക്കെതിരെ ഉയര്ന്നുവരുന്ന പ്രതിഷേധവും രോഷവും നല്കുന്ന സൂചനയും അതുതന്നെയാണ്. ചുരുക്കിപ്പറഞ്ഞാല് ഭരണഘടനാ വിരുദ്ധമായ ഒരു നിയമത്തിനും കേരളത്തില് സ്ഥാനമുണ്ടാകില്ല. കേരളം ഇത് നടപ്പാക്കില്ല.
