കാഞ്ഞങ്ങാട്: ഭാരതചരിത്രത്തിലെ സുപ്രധാന നാഴികക്കല്ലായ ദേശീയ പൗരത്വ ഭേദഗതി ബില്ലിനെതിരെ സിപിഎമ്മും കോണ്ഗ്രസും രാഷ്ട്രീയ മുതലെടുപ്പ് നടത്തുകയാണെന്ന് ബിജെപി സംസ്ഥാന ജനറല് സെക്രട്ടറി കെ. സുരേന്ദ്രന് പറഞ്ഞു. ബിജെപി നേതാവ് മടിക്കൈ കമ്മാരന്റെ രണ്ടാം ചരമവാര്ഷികത്തിന്റെ ഭാഗമായി കാഞ്ഞങ്ങാട് മണ്ഡലം കമ്മിറ്റി കോട്ടപ്പാറയില് സംഘടിപ്പിച്ച പൊതുയോഗം ഉദ്ഘാടനം ചെയ്യുകയായിരുന്നു അദ്ദേഹം.
ഭാരതത്തിലെ മുസ്ലിം സമൂഹത്തെ ഈ ബില് ഒരുതരത്തിലും ബാധിക്കുന്നില്ല. കോണ്ഗ്രസും സിപിഎമ്മും ഇതിനെ വര്ഗീയവല്ക്കരിക്കാന് ശ്രമിക്കുകയാണ്. മുഖ്യമന്ത്രി പിണറായി വിജയന് ഭരണഘടനാ വിരുദ്ധ പ്രസ്താവന നടത്തി സംസ്ഥാനത്ത് കലാപത്തിനുള്ള നീക്കം നടത്തുകയാണ്. കേന്ദ്രത്തില് കോണ്ഗ്രസ് അധികാരത്തിലിരിക്കുമ്പോള് ബില് പാസാക്കണമെന്ന് ആവശ്യപ്പെട്ട സിപിഎം ഇപ്പോള് എതിര്ക്കുന്നത് രാഷ്ട്രീയ വിരോധം മൂലമാണ്. ഐഎസ്ഐയുടെ സഹായത്തോടെ ഭാരതത്തില് നുഴഞ്ഞുകയറി കലാപമുണ്ടാക്കുന്ന തീവ്രവാദികള്ക്ക് വേണ്ടിയാണ് സിപിഎമ്മും കോണ്ഗ്രസും വാദിക്കുന്നത്. എസ്ഡിപിഐ പോലുള്ള സംഘടനകളെ തെരുവിലിറങ്ങാന് പ്രേരിപ്പിക്കുന്നത് സിപിഎമ്മാണെന്നും കെ. സുരേന്ദ്രന് ആരോപിച്ചു.
യോഗത്തില് കാഞ്ഞങ്ങാട് മണ്ഡലം പ്രസിഡന്റ് എന്. മധു അധ്യക്ഷത വഹിച്ചു. ദേശീയ കൗണ്സില് അംഗം എം. സഞ്ജീവ ഷെട്ടി അനുസ്മരണ പ്രഭാഷണം നടത്തി. ജില്ലാ ജനറല് സെക്രട്ടറി എ. വേലായുധന്, സെക്രട്ടറിമാരായ എം. ബല്രാജ്, ബളാല് കുഞ്ഞിക്കണ്ണന്, ശോഭന ഏച്ചിക്കാനം, കര്ഷക മോര്ച്ച ജില്ലാ പ്രസിഡന്റ് ഇ. കൃഷ്ണന്, ന്യൂനപക്ഷ മോര്ച്ച ജില്ലാ പ്രസിഡന്റ് കെ.വി. മാത്യു, മണ്ഡലം സെക്രട്ടറിമാരായ മനുലാല് മേലത്ത്, ബിജി ബാബു എന്നിവര് സംസാരിച്ചു. പഞ്ചായത്ത് പ്രസിഡന്റ് പി. മനോജ് കുമാര് സ്വാഗതവും പഞ്ചായത്ത് സെക്രട്ടറി പ്രകാശന് ഏച്ചിക്കാനം നന്ദിയും പറഞ്ഞു.
