തിരുവനന്തപുരം: കൈതമുക്കിലെ ഒരുകുടുംബത്തിലെ കുട്ടികള് പട്ടിണിമൂലം മണ്ണ് വാരിത്തിന്നതിനെ തുടര്ന്നുണ്ടായ വിവാദത്തില് ശിശുക്ഷേമ സമിതി ജനറല് സെക്രട്ടറി എസ്.പി.ദീപക് രാജിവച്ചു. ശിശുക്ഷേമ സമിതി ഇടപെടലും തുടര്ന്നുള്ള വാര്ത്തകളും സര്ക്കാരിനും സിപിഎമ്മിനും അവമതിപ്പുണ്ടാക്കിയതിനെ തുടര്ന്ന് പാര്ട്ടി രാജി ആവശ്യപ്പെടുകയായിരുന്നു. ശിശുക്ഷേമ സമിതി പ്രസിഡന്റ്കൂടിയായ മുഖ്യമന്ത്രിക്ക് ഇന്നലെ വൈകിട്ട് രാജിക്കത്ത് കൈമാറി.
ഡിസംബര് രണ്ടിന് വൈകിട്ട് ആറരമണിയോടെയാണ് കൈതമുക്കിലെ കോളനിയിലെ ഒരു കുടുംബത്തിലെ ആറ് കുട്ടികളില് നാലുപേര് പട്ടിണിമൂലം മണ്ണി വാരിത്തിന്നുവെന്നും അവരെ ശിശുക്ഷേമ സമിതി ഏറ്റെടുക്കുകയാണെന്നും എസ്.പി. ദീപക് മാധ്യമങ്ങളെ അറിയിച്ചത്. ഇതോടെ പട്ടിണിമൂലം കുട്ടികള് മണ്ണ് വാരിത്തിന്നുവെന്ന സംഭവം അന്തര്ദേശീയ മാധ്യമങ്ങളിലടക്കം വാര്ത്തയായി. സംസ്ഥാന സര്ക്കാരിനെതിരെ രൂക്ഷ വിമര്ശനം ഉയര്ന്നു.
എന്നാല് പിറ്റേ ദിവസംതന്നെ കുട്ടികള് മണ്ണ് വാരിത്തിന്നിട്ടില്ലെന്ന വിശദീകരണവുമായി കുട്ടികളുടെ അമ്മ രംഗത്തുവന്നു. ഭര്ത്താവിന്റെ മദ്യപാനവും മര്ദ്ദനവും മാത്രമാണ് പരാതിയായി പറഞ്ഞതെന്നും അവര് പറഞ്ഞു. എന്നാല് കുട്ടികള് മണ്ണ്വാരിത്തിന്നിരുന്നു എന്നതിന് തെളിവായി കുട്ടികളുടെ അമ്മ എഴുതിയതെന്ന് പറഞ്ഞ് കത്ത് എസ്.പി. ദീപക് പുറത്ത് വിട്ടു. കത്ത് താന് എഴുതിയതല്ലെന്നും ശിശുക്ഷേമ സമിതി ഉദ്യോഗസ്ഥര് കൊണ്ടുവന്ന കത്ത് ഒപ്പിട്ട് നല്കുക മാത്രമാണ് ചെയ്തതെന്നും കുട്ടികളുടെ അമ്മ പറഞ്ഞു. ഇക്കാര്യം സംസ്ഥാന ബാലാവകാശ കമ്മീഷന് അധ്യക്ഷനോടും മൊഴിനല്കി. ഇതോടെ ബാലാവകാശ കമ്മീഷനും ശിശുക്ഷേമ സമിതിക്കെതിരെ രംഗത്തെത്തി. തങ്ങളുടെ അന്വേഷണത്തില് മണ്ണുവാരിത്തിന്ന സംഭവം കണ്ടെത്തിയില്ലെന്നും ശിശുക്ഷേമ സമിതിയുടെ ഭാവനാവിലാസം മാത്രമാണെന്നും ബാലാവകാശ കമ്മീഷന് കുറ്റപ്പെടുത്തി. ഇതോടെ ദീപക് വെട്ടിലാവുകയായിരുന്നു.
സിപിഎം ലോക്കല് കമ്മറ്റി ഓഫീസിന് തൊട്ടുമുന്നിലുള്ള കോളനിയിലെ കുട്ടികള് പട്ടിണിയിലാണെന്നുള്ള വിവരം സിപിഎം പ്രാദേശിക നേതൃത്വം ആണ് ശിശുക്ഷേമ സമിതിയെ അറിയിച്ചത്. തുടര്ന്നാണ് ശിശുക്ഷേമ സമിതി ഇടപെടുന്നതും മൂത്ത നാല് കുട്ടികളെ ഏറ്റെടുക്കുന്നതും. സംഭവം സര്ക്കാരിനും പാര്ട്ടിക്കും നാണക്കേടായി. മുഖ്യമന്ത്രി പിണറായി വിജയനും സിപിഎം സംസ്ഥാന സെക്രട്ടേറിയേറ്റും ദീപക്കിന്റെ നടപടിയെ രൂക്ഷമായി വിമര്ശിച്ചു. ദീപക്കിന്റെ വിശദീകരണം തൃപ്തികരമല്ലാത്തതിനാല് മുഖ്യമന്ത്രിയും പാര്ട്ടിയും രാജി ആവശ്യപ്പെടുകയായിരുന്നു.
തെരഞ്ഞെടുപ്പിലൂടെ അധികാരത്തിലെത്തിയ ഭരണസമിതി ആയതിനാല് ഭരണ പ്രതിസന്ധി പരിഹരിക്കാന് നാളെ രാവിലെ 10 ന് സംസ്ഥാന ശിശുക്ഷേമ സമിതി എക്സിക്യുട്ടീവ് കമ്മറ്റി ചേരുന്നുണ്ട്. അതിലാകും താത്കാലിക ചുമതല അടക്കമുള്ളവ പരിശോധിക്കുക.
ഈ ഭരണസമിതി അധികാരത്തിലെത്തിയ ഉടന് മൂന്ന് വര്ഷം കാലാവധി എന്നത് അഞ്ച് വര്ഷമാക്കിക്കൊണ്ട് ബൈലോ ഭേദഗതി ചെയ്തിരുന്നു. ഇല്ലെങ്കില് ഭരണസമിതിയുടെ കാലാവധി ഈമാസം അവസാനിക്കേണ്ടതായിരുന്നു.
