കൊച്ചി: ഗുരുവായൂര് ആനന്ദന് വധക്കേസില് സ്പെഷ്യല് പ്രോസിക്യൂട്ടറെ നിയമിക്കാന് ഹൈക്കോടതി ഉത്തരവിട്ടു. ആര്എസ്എസ് പ്രവര്ത്തകനായ ആനന്ദനെ 2017 നവംബര് 12ന് പട്ടാപ്പകലാണ് എസ്ഡിപിഐ ബന്ധമുള്ള, സിപിഎമ്മുകാര് കഴുത്തിന് വെട്ടിക്കൊന്നത്. ആനന്ദന്റെ ബൈക്കില് കാറിടിപ്പിച്ച് വീഴ്ത്തി കഴുത്തിനു വെട്ടിക്കൊല്ലുകയായിരുന്നു. ആനന്ദന്റെ അമ്മ അംബിക അഡ്വ. വി. സജിത്കുമാര് മുഖേന സമര്പ്പിച്ച ഹര്ജിയിലാണു ഹൈക്കോടതിയുടെ വിധി.
സര്ക്കാര് നിയമിക്കുന്ന പ്രോസിക്യൂട്ടര് രാഷ്ട്രീയ കൊലപാതകങ്ങളില് നീതിയുക്തമായി പ്രവര്ത്തിക്കില്ലെന്ന അംബികയുടെ ആശങ്ക മുഖവിലയ്ക്കെടുത്താണ് കോടതി നടപടി. മരിച്ചവരുടെ ബന്ധുക്കളുടെ, പ്രത്യേകിച്ച് അമ്മയുടെ ആശങ്ക അകറ്റാന് സര്ക്കാരിന് ബാധ്യതയുണ്ടെന്നും കോടതി നിരീക്ഷിച്ചു.
കേസില് ജനുവരി ആദ്യം വിചാരണ തുടങ്ങാനിരിക്കെയാണ് ഹൈക്കോടതിയുടെ ഉത്തരവ്. കേസില് പ്രോസിക്യൂട്ടറെ നിയമിച്ചത് രാഷ്ട്രീയ പരിഗണന വച്ചാണെന്നും അതിനാല് നീതി ലഭിക്കില്ലെന്ന് ആശങ്കയുണ്ടെന്നും അംബിക ഹര്ജിയില് ചൂണ്ടിക്കാട്ടിയിരുന്നു.
ഈ ആവശ്യം ഉന്നയിച്ച് നല്കിയ പരാതി സര്ക്കാര് തള്ളിയിരുന്നു. പ്രോസിക്യൂട്ടറുടെ നിയമനം രാഷ്ട്രീയപരമായതിനാല് കേസ് നേരാംവണ്ണം നടക്കില്ലെന്നും പ്രത്യേക പ്രോസിക്യൂട്ടറെ വയ്ക്കാന് അനുവദിക്കണമെന്നുമുള്ള ആവശ്യം ന്യായമാണെന്നും നിരീക്ഷിച്ച കോടതി സര്ക്കാര് നടപടി തള്ളി പ്രത്യേക പ്രോസിക്യൂട്ടറെ വയ്ക്കാന് നിര്ദേശിക്കുകയായിരുന്നു.
