ന്യൂദല്ഹി: കേന്ദ്ര ഫണ്ട് ഉപയോഗിച്ച് നടപ്പാക്കുന്ന പദ്ധതികള് സോഷ്യല് ഓഡിറ്റ് നടത്താതെ സിപിഎമ്മിന്റെ താത്പര്യങ്ങള്ക്കായി അട്ടിമറിക്കുന്ന കേരള സര്ക്കാരിനെതിരെ കര്ശന നടപടിയെടുക്കണമെന്ന് ബിജെപി മുന് സംസ്ഥാന അധ്യക്ഷന് കുമ്മനം രാജശേഖരന് ആവശ്യപ്പെട്ടു. ഇക്കാര്യം ആവശ്യപ്പെട്ട് കേന്ദ്ര ഗ്രാമവികസന മന്ത്രി നരേന്ദ്ര സിങ് തോമറിന് കുമ്മനം നിവേദനം നല്കി.
ഗ്രാമീണ തൊഴിലുറപ്പ് പദ്ധതിക്കായി ഇതിനോടകം മൂന്നു ഗഡുക്കളിലായി നാലായിരം കോടി രൂപ കേരളത്തിന് കേന്ദ്ര സര്ക്കാര് നല്കിക്കഴിഞ്ഞു. എന്നാല്, ചെലവാക്കുന്ന തുകയുടെ സോഷ്യല് ഓഡിറ്റ് നടത്താനായി കേന്ദ്ര ഗ്രാമവികസന മന്ത്രാലയം നല്കിയ നിബന്ധനകള് കേരള സര്ക്കാര് പാലിക്കുന്നില്ല. കേന്ദ്ര സര്ക്കാരിന്റെ മാനദണ്ഡമനുസരിച്ച് ഗവേണിങ് ബോഡിയില് സര്ക്കാരിന് പുറത്തുനിന്ന് നിഷ്പക്ഷരും വിദഗ്ധരും പ്രവര്ത്തിപരിചയവുമുള്ള മൂന്നു പേരെയാണ് നിയമിക്കേണ്ടത്.
ഇതിന് പകരം സിപിഎമ്മുകാരായ ഏഴു പേരെയാണ് നിയമിച്ചത്. സോഷ്യല് ഓഡിറ്റിന് സിഎജി നല്കിയിട്ടുള്ള നിബന്ധനകള്ക്ക് വിരുദ്ധമാണ് ഈ നടപടി. കഴിഞ്ഞ മാര്ച്ച് 31ന് മുമ്പ് ഗവേണിങ് ബോഡി കേന്ദ്ര മാര്ഗനിര്ദേശമനുസരിച്ച് പുനഃസംഘടിപ്പിക്കണമെന്ന് ഫെബ്രുവരി എട്ടിന് കേന്ദ്രസര്ക്കാര് ആവശ്യപ്പെട്ടിട്ടും കേരള സര്ക്കാര് വഴങ്ങിയില്ല. മാത്രമല്ല സോഷ്യല് ഓഡിറ്റ് യൂണിറ്റിന്റെ ഡയറക്ടറായ ഡോ. എ.ബി. ജോര്ജ്ജിനെ തല്സ്ഥാനത്ത് നിന്ന് നീക്കം ചെയ്ത് ഗ്രാമീണ തൊഴിലുറപ്പ് പദ്ധതിയെ സിപിഎമ്മിന്റെ ചൊല്പ്പടിയിലാക്കിയെന്നും കുമ്മനം നിവേദനത്തില് പറയുന്നു.
പാവപ്പെട്ട സ്ത്രീ തൊഴിലാളികള്ക്ക് വരുമാന മാര്ഗ്ഗമെന്ന നിലയില് നാളിതുവരെ പ്രവര്ത്തിച്ചുവന്ന തൊഴിലുറപ്പ് പദ്ധതിക്ക് സുതാര്യതയും സുസ്ഥിരതയും നഷ്ടപ്പെട്ടു. നിലവിലുള്ള ഗവേണിങ് ബോഡി പിരിച്ചുവിട്ട് നിയമപ്രകാരമുള്ള ബോഡി രൂപീകരിക്കാന് കേന്ദ്ര മന്ത്രാലയം നടപടി സ്വീകരിക്കണമെന്നും സോഷ്യല് ഓഡിറ്റ് യൂണിറ്റ് ഡയറക്ടറെ തല്സ്ഥാനത്ത് തുടരാന് നടപടികള് സ്വീകരിക്കണമെന്നും കുമ്മനം മന്ത്രിയോട് ആവശ്യപ്പെട്ടു.
