ന്യൂദല്ഹി: വൈദ്യുത പ്ലാന്റുകളില് ഉത്പാദിപ്പിക്കുന്ന ഫ്ളൈ ആഷ് ഇനി മുതല് കണ്ടെയ്നറുകളില് കൊണ്ടുപോകുമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ് വാര്ത്താസമ്മേളനത്തില് പറഞ്ഞു. തുറന്ന വാഗണുകളിലാണ് ഫ്ളൈ ആഷ് കൊണ്ടുപോകുന്നത്. കണ്ടെയ്നറുകളില് കടത്തിയാല് പരിസ്ഥിതിമലിനീകരണം തടയാം. സിമന്റ് കടത്തും പരിഷ്കരിച്ചിട്ടുണ്ട്. വളം കൊണ്ടുപോകാനും കണ്ടെയ്നറുകള് ഉപയോഗിക്കും. കണ്ടെയ്നറുകള്ക്കായി ഏകീകൃത ലൈസന്സ് ഏര്പ്പെടുത്തും. ചരക്ക് ചാര്ജ് കിലോമീറ്ററിന് ടണ്ണിന് എന്ന രീതിയിലാക്കും.
വ്യവസായ ആവശ്യങ്ങള്ക്കായി പ്രത്യേകം രൂപകല്പന ചെയ്ത വാഗണുകള് ലഭ്യമാക്കും. ഇതിന് പ്രത്യേക പദ്ധതിപ്രഖ്യാപിച്ചു. ഇത്തരം വാഗണുകള് എങ്ങനെ വേണമെന്ന് വ്യവസായികള്ക്ക് നിര്ദേശിക്കാം. ഏതൊരു ഡിസൈനര്ക്കും നിര്മ്മാതാവിനും പുതിയ വാഗണ് ഡിസൈന് നിര്ദേശിക്കാം. ഡിസൈന് വിലയിരുത്തിയശേഷം, റിസര്ച്ച് ഡിസൈന്സ് ആന്ഡ് സ്റ്റാന്ഡേര്ഡ്സ് ഓര്ഗനൈസേഷന് (ആര്ഡിഎസ്ഒ)പ്രോട്ടോടൈപ്പിന് അനുമതി നല്കും.
റെയില്വേ പദ്ധതികള്ക്കായുള്ള നൈപുണ്യ സര്ട്ടിഫിക്കേഷന് 24 മാസത്തിനുള്ളില് എല്ലാ പദ്ധതികളിലും നടപ്പാക്കും. പ്ലംബര്മാര്, വെല്ഡര്മാര്, ഫിറ്റര്മാര് തുടങ്ങി എല്ലാ തൊഴിലാളികള്ക്കും മികച്ച പരിശീലനം നല്കണം. ചില പ്രത്യേക റെയില്വേ ജോലികളില് സാക്ഷ്യപ്പെടുത്തിയ കരകൗശല വിദഗ്ധരെയും ജോലിക്കാരെയും മാത്രമേ വിന്യസിക്കൂ.
റെയില്വേയെ ആധുനികവല്ക്കരിക്കുവാന് എട്ട് ഘടനാപരമായ പരിഷ്കാരങ്ങളാണ് ഇന്നലെ അശ്വിനി വൈഷ്ണവ് പ്രഖ്യാപിച്ചത്. ഇതോടെ, നടപ്പാക്കിയ പരിഷ്കാരങ്ങളുടെ എണ്ണം 17 ആയി. കാര്യക്ഷമത വര്ദ്ധിപ്പിക്കാനും നവീകരണം പ്രോത്സാഹിപ്പിക്കാനും റെയില്വേയെ ശക്തിപ്പെടുത്താനുമായി 52 ആഴ്ചകള് ക്കുള്ളില് 52 പരിഷ്കാരങ്ങള് നടപ്പാക്കുക എന്നതാണ് മന്ത്രാലയത്തിന്റെ ലക്ഷ്യം.
