തിരുവന്തപുരം: സംസ്ഥാനസര്‍ക്കാരിനുവേണ്ടി ഇന്‍ഫര്‍മേഷന്‍ – പബ്ലിക്ള്‍ റിലേഷന്‍സ് വകുപ്പ് പ്രസിദ്ധീകരിച്ചുവരുന്ന ‘സര്‍ക്കാര്‍ ധനസഹായപദ്ധതികള്‍’ എന്ന പുസ്തകത്തിന്റെ പുതിയവിവരങ്ങള്‍ ചേര്‍ത്തു പരിഷ്‌ക്കരിച്ച പതിപ്പിന്റെ വിതരണം ആരംഭിച്ചു. വിതരണോദ്ഘാടനം സഹകരണ-ടൂറിസം-ദേവസ്വം മന്ത്രി കടകംപള്ളി സുരേന്ദ്രന്‍ തിരുവനന്തപുരം മേയര്‍ കെ. ശ്രീകുമാറിനു പുസ്തകം കൈമാറി നിര്‍വ്വഹിച്ചു. പുസ്തകത്തിന്റെ പുറംചട്ടയ്‌ക്കു ചിത്രങ്ങള്‍ വരച്ച ഭിന്നശേഷികളുള്ള വിദ്യാര്‍ത്ഥിനി നൂര്‍ ജലീലയ്‌ക്കു മന്ത്രി ഉപഹാരവും സമ്മാനിച്ചു, തിരുവനന്തപുരം കോര്‍പ്പറേഷന്‍ കൗണ്‍സിലര്‍ പാളയം രാജന്‍, ഐറ്റി മിഷന്‍ ഡയറക്റ്റര്‍ ഡോ: എസ്. ചിത്ര, ഐപിആര്‍ഡി ഡയറക്റ്റര്‍ യു.വി. ജോസ്, അഡീഷണല്‍ ഡയറക്റ്റര്‍ എന്‍. സുനില്‍ കുമാര്‍ എന്നിവര്‍ സംസാരിച്ചു. വിവിധവിഭാഗം ജനങ്ങള്‍ക്കു സര്‍ക്കാര്‍ നല്കുന്ന ധനസഹായങ്ങളുടെ വിശദാംശങ്ങളാണു പുസ്തകത്തിന്റെ ഉള്ളടക്കം. ജില്ലാ ഇന്‍ഫര്‍മേഷന്‍ ഓഫീസുകള്‍ വഴിയാണു വിതരണം.
അക്കാദമിക്ള്‍ ഗ്രന്ഥങ്ങളുടെയും ജേര്‍ണലുകളുടെയും രൂപകല്പനയ്‌ക്ക് ഉപയോഗിക്കുന്ന ടെക് (TEX) എന്ന സോഫ്റ്റ്വെയറിലാണു പുസ്തകം തയ്യാറാക്കിയത്. സഹായങ്ങള്‍ നല്കുന്ന വകുപ്പുകള്‍ പ്രത്യേകം അദ്ധ്യായങ്ങളായി അകാരാദിക്രമത്തില്‍ ക്രമീകരിച്ചിരിക്കുന്നു. ഓരോ അദ്ധ്യായത്തിലും വരുന്ന പദ്ധതികളുടെ പേരുകള്‍ പേജ് നമ്പര്‍ സഹിതം ഉള്ളടക്കത്തില്‍ നല്കിയിട്ടുണ്ട്. ഏതാണ്ടെല്ലാ പദ്ധതിയുടെയും പേരും ലഭിക്കുന്ന സഹായവും അപേക്ഷിക്കേണ്ടവിധവും വിലാസവുമെല്ലാം നിശ്ചിതമാതൃകയില്‍ ക്രോഡീകരിച്ചത് പുസ്തകം ഉപയോഗിക്കുന്നവര്‍ക്കു സൗകര്യപ്രദമാണ്. പുസ്തകത്തിന്റെ മറ്റൊരു സവിശേഷത 33 പേജുള്ള സമഗ്രമായ പദസൂചികയാണ്. ഈ സൂചികയില്‍ അക്ഷരക്രമത്തില്‍ മുഴുവന്‍ പദ്ധതികളുടെയും പേര് പേജ് നമ്പര്‍ സഹിതം നല്കിയിരിക്കുന്നു.
ഈ പുസ്തകം ഇന്ററാക്റ്റീവ് പിഡിഎഫ്, ഹൈപ്പര്‍ ടെക്ള്‍സ്റ്റ് ലിങ്കോടുകൂടിയ ഇ-ബുക്ക്, എക്‌സ്.എം.എല്‍., എച്ഛ്.റ്റി.എം.എല്‍., ചെറിയ ഫയല്‍ രൂപമായ ദേയ്സാ വൂ (DjVu) എന്നിങ്ങനെ ഇന്നുള്ള എല്ലാ ഇലക്‌റ്റ്രോണിക് രൂപങ്ങളിലും പ്രസിദ്ധീകരിക്കുകയാണ്. കൂടാതെ സ്മാര്‍ട്ട് ഫോണുകളുടെ സ്‌ക്രീന്‍ വലിപ്പത്തിലുള്ള പിഡിഎഫ് പതിപ്പുകളും പ്രസിദ്ധീകരിക്കും. ഇവ പബ്ലിക്ള്‍റിലേഷന്‍സ് വകുപ്പിന്റെ www.prd.kerala.gov.in എന്ന വെബ്സൈറ്റില്‍ ലഭ്യമാക്കും.
ഇ-ബുക്ക്, ഇന്ററാക്റ്റീവ് പിഡിഎഫുകള്‍ എന്നിവയില്‍ ഉള്ളടക്കത്താളിലും പദസൂചികയിലുംനിന്ന് ഒറ്റ ക്ലിക്കില്‍ അതതുപദ്ധതി സംബന്ധിച്ച താളിലേക്കു പോകാം. പദ്ധതിയുടെ പേരും മറ്റും ടൈപ്പ് ചെയ്തു സേര്‍ച്ച് ചെയ്യാനും സൗകര്യവുമുണ്ട്. ഇ-ബുക്കില്‍ പുസ്തകത്തിലെന്നപോലെ അടയാളപ്പെടുത്താനും ഹൈലൈറ്റ് ചെയ്യാനും വിവരങ്ങള്‍ കോപ്പി ചെയ്ത് പേസ്റ്റ് ചെയ്ത് ഉപയോഗിക്കാനും മറ്റുള്ളവര്‍ക്ക് അയയ്‌ക്കാനും ഒക്കെ കഴിയും.
ഇലക്‌റ്റ്രോണിക്ള്‍ പ്രസിദ്ധീകരണത്തില്‍ വിവിധ പദ്ധതികളുടെ അപേക്ഷാഫോമിന്റെ ലിങ്കുകള്‍ ചേര്‍ത്തിട്ടുണ്ട്. അവയില്‍ ക്ലിക്ള്‍ ചെയ്താല്‍ ആ ഫോം കാണാം. ആ ഫോം ഡൗണ്‍ലോഡ് ചെയ്തു പ്രിന്റ് എടുത്തു പൂരിപ്പിച്ച് അപേക്ഷ അയയ്‌ക്കാം. ചില ലിങ്കുകളില്‍ ഓണ്‍ലൈനായി അപേക്ഷ അയയ്‌ക്കാനുള്ള സൗകര്യവുമുണ്ട്. കാഴ്ചയ്‌ക്കു തകരാറുള്ളവര്‍ക്ക് പ്രത്യേക സോഫ്റ്റ്വെയര്‍ ഉപയോഗിച്ച് ശബ്ദമാക്കിമാറ്റി കേള്‍ക്കാനും ശ്രവണവൈകല്യമുള്ളവര്‍ക്ക് ബ്രയില്‍ ആക്കി മാറ്റാനും കഴിയും.
സ്വതന്ത്രപകര്‍പ്പവകാശനിയമമായ ക്രിയേറ്റീവ് കോമണ്‍സ് ലൈസന്‍സ് പ്രകാരമാണ് ഈ പുസ്തകവും ഇലക്‌ട്രോണിക്ക് പതിപ്പുകളും പ്രസിദ്ധീകരിച്ചിരിക്കുന്നത്. അതിനാല്‍, ഇതിലെ വിവരങ്ങള്‍ പകര്‍ത്തി പുനരുപയോഗിക്കുകയും വ്യവസ്ഥകള്‍ പാലിച്ചു പ്രസിദ്ധപ്പെടുത്തുകയുമൊക്കെ ആകാം. സര്‍ക്കാര്‍വിവരങ്ങള്‍ സ്വതന്ത്രലൈസന്‍സില്‍ പൊതുസമൂഹത്തിനു ലഭ്യമാക്കണമെന്നത് ഏറെക്കാലമായി വൈജ്ഞാനിക, വിവരപരിപാലന, ഐറ്റി രംഗങ്ങളിലൊക്കെ പ്രവര്‍ത്തിക്കുന്നവര്‍ ആവശ്യപ്പെട്ടുവരികയായിരുന്നു
