കുറ്റിയാടി (കോഴിക്കോട്): നായാട്ടിനു പോയ യുവാവ് വെടിയേറ്റു മരിച്ചു. നരിപ്പറ്റ പഞ്ചായത്തിലെ വാളുക്ക് ഇന്ദിരാനഗറിലെ മണ്ടേപുറം റഷീദ് (33) ആണ് മരിച്ചത്. ഇദ്ദേഹത്തിന്റെ കൂടെയുണ്ടായിരുന്ന സുഹൃത്ത് വളയം തൊട്ടിയില് ലിബിന് മാത്യു(28)വിനെ കുറ്റിയാടി പോലീസ് കസ്റ്റഡിയിലെടുത്തു.
വാളുക്കില് നിന്ന് ഒരു കിലോമിറ്ററോളം അകലെ പുള്ളിപ്പാറയിലാണ് സംഭവം. ശനിയാഴ്ച രാത്രി എട്ടു മണിയോടെ ഇരുവരും പുള്ളിപ്പാറയിലേക്ക് പോയതായി പറയപ്പെടുന്നു. ഒമ്പത് മണിയോടെയാണ് റഷീദിന് വെടിയേറ്റതായി ലിബിന് നാട്ടുകാരെ അറിയിച്ചത്. തുടര്ന്ന് റഷീദിനെ കുറ്റിയാടി ഗവ. താലൂക്ക് ആശുപത്രിയില് എത്തിച്ചെങ്കിലും രക്ഷിക്കാനായില്ല.
കാട്ടുമൃഗത്തിനെ വെടിവയ്ക്കാനുള്ള ശ്രമത്തിനിടെ അബദ്ധത്തില് വെടി പൊട്ടിയതാണെന്ന നിഗമനത്തിലാണ് പോലീസ്. ലിബിന് നിര്മിച്ച തോക്കുമായി ഇരുവരും നായാട്ടിനു പോകുകയായിരുന്നു. യു ട്യൂബില് നിന്നാണ് തോക്കു നിര്മാണം ഇയാള് മനസിലാക്കിയതെന്നും പോലീസ് പറഞ്ഞു. റഷീദിന്റെ തലയുടെ ഇടതുവശത്ത് ചെവിക്കരികിലായാണ് വെടിയേറ്റതെന്ന് പോലീസ് പറഞ്ഞു.
കണ്ണൂരില് നിന്നെത്തിയ ഫൊറന്സിക് വിദഗ്ധര് മൃതദേഹം പരിശോധിച്ചു. കുറ്റിയാടി സിഐ എന്. സുനില്കുമാര്, എസ്ഐപി. റഫീഖ് എന്നിവരുടെ നേതൃത്വത്തില് ലിബിനെ സംഭവസ്ഥലത്തു കൊണ്ടുപോയിതെളിവെടുത്തു. മൃതദേഹം പോസ്റ്റുമോര്ട്ടത്തിനായി കോഴിക്കോട് മെഡിക്കല് കോളേജ് ആശുപത്രിയിലേക്ക് മാറ്റി. പെയിന്റിങ്ങ് തൊഴിലാളിയാണ് കൊല്ലപ്പെട്ട റഷീദ്. മണ്ടേപുറം അമ്മത്-ഹാജിറ ദമ്പതികളുടെ മകനാണ്. ഭാര്യ: സറീന. മക്കള്: ഹന്ന ഫാത്തിമ, മുഹമ്മദ് സൈനുല് അബ്ദീന്. സഹോദരങ്ങള്: ആരിഫ്, മുബീന.
