ബെംഗളൂരു: ഐഎസ്ആര്ഒയുടെ മൂന്നാമത് ചാന്ദ്രദൗത്യമായ ചന്ദ്രയാന് മൂന്നിന് ഔദ്യോഗിക സ്ഥിരീകരണം. ചന്ദ്രയാന് മൂന്നിനായി 75 കോടി രൂപ ഉള്പ്പെടെ ഐഎസ്ആര്ഒയുടെ പുതിയ പദ്ധതികള്ക്കെല്ലാം 666 കോടി രൂപ കേന്ദ്രത്തോട് ആവശ്യപ്പെട്ടതായി ധനകാര്യ മന്ത്രാലയം അറിയിച്ചു. നിലവിലെ ബജറ്റില് നീക്കിവച്ച തുകയ്ക്ക് പുറമേയാണ് ഈ തുക.
പ്രൊവിഷന് ഓഫ് സപ്ലിമെന്ററി ബജറ്റ് പ്രകാരമാണ് ഇപ്പോള് തുക ആവശ്യപ്പെട്ടത്. 75 കോടിയില് 60 കോടി രൂപ യന്ത്രസംവിധാനങ്ങള്, പദ്ധതിക്കാവശ്യമായ ഉപകരണങ്ങള്, മൂലധനചെലവുകള് എന്നിവയ്ക്ക് വേണ്ടിയാണ്. ബാക്കി 15 കോടി രൂപ നികുതിയിനത്തിലാണ് ഉള്ക്കൊള്ളിച്ചത്.മനുഷ്യനെ ചന്ദ്രനിലെത്തിക്കുന്ന പദ്ധതി ഗഗന്യാനിനായി 8.6 കോടി രൂപയാണ് ആവശ്യപ്പെട്ടത്. ചെറിയ ഉപഗ്രഹങ്ങളുടെ വിക്ഷേപണ വാഹനമായ എസ്എസ്എല്വിക്കായി 12 കോടിയും അതിന്റെ ലോഞ്ച്പാഡിനായി 120 കോടി രൂപയും ഇതില് ഉള്പ്പെടുത്തിയിട്ടുണ്ട്. ഏറ്റവും കൂടുതല് തുക ആവശ്യപ്പെട്ടിരിക്കുന്നത് യുആര് റാവു സാറ്റലൈറ്റ് സെന്ററിന് (യുആര്എസ്സി) വേണ്ടിയാണ്.
2020 നവംബറിന് മുന്നോടിയായി ചന്ദ്രയാന് മൂന്നിന്റെ വിക്ഷേപണം നടത്താനാണ് ഐഎസ്ആര്ഒ ലക്ഷ്യമിടുന്നത്. ചന്ദ്രയാന് രണ്ടിലേതു പോലെ മൂന്നിലും ലാന്ഡറും റോവറും ഇന്ധനം നിറച്ചിരിക്കുന്ന ഡിറ്റാച്ചബിള് പ്രൊപ്പല്ഷന് മൊഡ്യൂളുമുണ്ടാകും.
ഇപ്പോള് തന്നെ പദ്ധതിയുടെ നടത്തിപ്പിന് വിവിധ സംഘങ്ങള് പ്രവര്ത്തനമാരംഭിച്ചു. ഗഗന്യാന്റെയും സൗര ദൗത്യമായ ആദിത്യയുടെയും വിക്ഷേപണത്തിനുള്ള നടപടിക്രമങ്ങള് പുരോഗമിക്കുകയാണെന്നും ഔദ്യോഗിക വൃത്തങ്ങള് അറിയിച്ചു.
