തിരുവനന്തപുരം: ഇ-ടെന്ഡര് നടപടികള് മറികടന്ന് അരി വാങ്ങിയതുമായി ബന്ധപ്പെട്ട വിഷയത്തില് വിചിത്ര വിശദീകരണം നല്കി സിവില് സപ്ലൈസ് കോര്പ്പറേഷന്.
പ്രളയവും ആഭ്യന്തര പ്രശ്നങ്ങളും നേരിടുമ്പോള് മാത്രം കൈക്കൊള്ളേണ്ട എമര്ജന്സി പര്ച്ചേസാണ് സാധാരണ മാസമായ നവംബറില് സപ്ലൈക്കോ നടത്തിയത്. എമര്ജന്സി പര്ച്ചേസിലൂടെ 350 ടണ് അരിയാണ് വാങ്ങിയത്. ഇതിന് സപ്ലൈക്കോ എംഡി കെ.എന് സതീഷ് നല്കുന്ന വിശദീകരണവും വിചിത്രമാണ്. ഓപ്പണ് മാര്ക്കറ്റില് വില കൂടിയപ്പോള് ആളുകളെത്തി വന്തോതില് അരി വാങ്ങിയതാണ് അടിയന്തര സാഹചര്യത്തിന് കാരണമായത്. ഇതാണ് എമര്ജന്സി പര്ച്ചേസിന് സപ്ലൈക്കോയെ പ്രേരിപ്പിച്ചതെന്നായിരുന്നു വിശദീകരണം.
നവംബര് അഞ്ചിന് വിതരണക്കാരില് നിന്ന് അരിയും ധാന്യങ്ങളും പഞ്ചസാരയും വാങ്ങാന് സിവില് സപ്ലൈസ് കോര്പ്പറേഷന് ഇ-ടെന്ഡര് നിശ്ചയിച്ചു. ഇതിന് ശേഷമാണ് പരമ്പരാഗത വിതരണക്കാരെയെല്ലാം ഞെട്ടിച്ച് സപ്ലൈക്കോ ഇ ടെന്ഡര് റദ്ദാക്കിയതിന്റെ ഉത്തരവ് പുറപ്പെടുവിക്കുകയും എമര്ജന്സി പര്ച്ചേസിനുള്ള പ്രത്യേക അധികാരങ്ങള് ഉപയോഗിച്ച് കോടികളുടെ ഇടപാടുകള് നടത്തിയതും.
