തിരുവനന്തപുരം: തിരുവനന്തപുരം യൂണിവേഴ്‌സിറ്റി കോളജില്‍ എസ്എഫ്‌ഐ അഴിഞ്ഞാട്ടം. കോളേജിലെ സ്റ്റാറ്റിസ്റ്റിക്‌സ് ഡിപ്പാര്‍ട്ട്‌മെന്റിലാണ് ആക്രമണമുണ്ടായത്. അധ്യാപകരുടെ വാഹനങ്ങള്‍ക്കു നേരെയും ആക്രമണം ഉണ്ടായിട്ടുണ്ട്.
എസ്എഫ്‌ഐ പ്രവര്‍ത്തകര്‍ ഇതിനു മുമ്പ് ഗേറ്റ് പൂട്ടി പ്രതിഷേധിച്ചെതിനെതിരെ കോളേജ് അച്ചടക്ക സമിതി റിപ്പോര്‍ട്ട് നല്‍കിയതാണ് ആക്രമണത്തിന് കാരണമെന്നാണ് കരുതുന്നത്. ഇതേ തുടര്‍ന്ന് അച്ചടക്ക സമിതിയിലെ അംഗങ്ങളായ സ്റ്റാറ്റിറ്റിക്‌സ് തലവന്‍ സോമശേഖരന്‍ നായര്‍, മാത്‌സ് ഡിപ്പാര്‍ട്ട്‌മെന്റ് തലവന്‍ ബാബു എന്നിവരുടെ വാഹനം തകര്‍ത്തു.
തുടര്‍ച്ചയായുള്ള വിദ്യാര്‍ത്ഥി സംഘര്‍ഷങ്ങള്‍ മൂലം അടച്ച യൂണിവേഴ്‌സിറ്റി കോളേജ് നാളെ തുറക്കാനിരിക്കെയാണ് വീണ്ടും ആക്രമണങ്ങള്‍ അരങ്ങേറിയത്. കഴിഞ്ഞ ദിവസങ്ങളില്‍ കോളേജിലും ഹോസ്റ്റലിലും നടന്ന സംഘര്‍ഷഭരിതമായ സാഹചര്യം കണക്കിലെടുത്താണ് യൂണിവേഴ്‌സിറ്റി കോളേജിന് അവധി നല്‍കിയിരുന്നത്. കോളേജ് തുറന്നതിന് ശേഷം വിദ്യാര്‍ത്ഥി സംഘടനകളുമായി പ്രശ്‌നങ്ങള്‍ സംബന്ധിച്ച ചര്‍ച്ച നടത്താമെന്ന തീരുമാനത്തിലായിരുന്നു പ്രിന്‍സിപ്പല്‍. ഈ പശ്ചാത്തലത്തിലാണ് വീണ്ടും ആക്രമണം അരങ്ങേറിയത്.
കോളേജ് ഹോസ്റ്റലില്‍ വച്ച് കെഎസ്‌യു പ്രവര്‍ത്തകര്‍ക്ക് നേരെ എസ്എഫ്‌ഐ നേതാവായിരുന്ന ഏട്ടപ്പന്‍ എന്ന് വിളിക്കപ്പെടുന്ന മഹേഷ് കൊലവിളി മുഴക്കിയതുമായി ബന്ധപ്പെട്ട വിഷയങ്ങളാണ് കോളേജില്‍ വീണ്ടും പ്രശ്‌നങ്ങള്‍ വഷളാക്കിയത്.
