കോഴിക്കോട് : മാവോയിസ്റ്റ് ബന്ധത്തില് അറസ്റ്റിലായ സിപിഎം നേതാക്കള് നിരോധിത സംഘടനയുടെ ഏരിയാ സെക്രട്ടറിയായിരുന്നെന്ന് സംശയം. സിപിഎം പ്രവര്ത്തകരായ അലന് ഷുഹൈബും, താഹ ഫസലുമാണ് ഏരിയാ സെക്രട്ടറിമാരായി പ്രവര്ത്തിച്ചിരുന്നതായി സംശയം ഉയര്ന്നിരിക്കുന്നത്.
അട്ടപ്പാടിയില് പോലീസ് വെടിവെപ്പില് കൊലപ്പെട്ട മാവോയിസ്റ്റുകളില് നിന്നും കണ്ടെത്തിയ അതേ രേഖകള് തന്നെ ഇരുവരുടേയും വീട്ടില് നിന്നും പിടിച്ചെടുത്തതോടെയാണ് ഇതുസംബന്ധിച്ചുള്ള സംശയം ശക്തമായിരിക്കുന്നത്. ലഘുലേഖകളുടെ തെലുങ്ക്, ഹിന്ദി പരിഭാഷകളും കൊല്ലപ്പെട്ട മാവോയിസ്റ്റുകളില് നിന്നും പിടിച്ചെടുത്തിട്ടുണ്ട്. ജാതിവ്യവസ്ഥയോട് എങ്ങനെ പോരാടണമെന്ന് ലഘുലേഖയില് ചര്ച്ച ചെയ്യുന്നത്.
ഇതു കൂടാതെ താഹയുടെ വീട്ടില് നടത്തിയ പരിശോധനയില് മാവോയിസ്റ്റ് സംഘടനയുടെ പ്രവര്ത്തനങ്ങളുമായി ബന്ധപ്പെട്ട ചില കണക്കുകള് കണ്ടെത്തിയതായും സൂചനയുണ്ട്.
അതേസമയം മഞ്ചിക്കണ്ടിയില് കൊല്ലപ്പെട്ട മാവോയിസ്റ്റുകളുടെ കൈവശമുണ്ടായിരുന്ന ചില ഡയറിക്കുറപ്പികളും പെന്ഡ്രൈവും ലാപ്പ്ടോപ്പും പോലീസ് നടത്തിയ തെരച്ചിലില് കണ്ടെത്തിയിട്ടുണ്ട്. മാവോയിസ്റ്റ് നേതാവ് ദീപക് സായുധ പരിശീലനം നടത്തുന്നതിന്റെ വീഡിയോയും പോലീസ് നടത്തിയ തെരച്ചിലില് കണ്ടെത്തിയിട്ടുണ്ട്. ഇത് അന്വേഷണ സംഘം പുറത്തുവിട്ടിരുന്നു.
