തിരുവനന്തപുരം : വാളയാര് പെണ്കുട്ടികളുടെ മരണത്തില് മാതാപിതാക്കള്ക്ക് നീതി നടപ്പാക്കണമെന്നാവശ്യപ്പെട്ട് ബിജെപിയുടെ പ്രതിഷേധം ശക്തമാക്കുന്നു. കേസില് പുനരന്വേഷണം ആവശ്യപ്പെട്ട് ബിജെപിയുടെ രക്ഷാ മാര്ച്ച് ഇന്ന് ആരംഭിക്കും.
വാളയാര് അട്ടപ്പള്ളത്ത് നിന്ന് മൂന്നുമണിക്ക് തുടങ്ങുന്ന മാര്ച്ച് ബിജെപി ജനറല് സെക്രട്ടറി കെ. സുരേന്ദ്രന് നയിക്കും. വാളയാര്, പുതുശ്ശേരി പ്രദേശങ്ങളില് പര്യടനം നടത്തുന്ന ജാഥ വ്യാഴാഴ്ച കളക്ട്രേറ്റിന് മുന്നില് സമാപിക്കും. ആദ്യദിനത്തിലെ സമാപന യോഗത്തില് ബിജെപി ഉപാധ്യക്ഷന് എ.പി. അബ്ദുള്ളക്കുട്ടി സംസാരിക്കും. സിബിഐ അന്വേഷണം ആവശ്യപ്പെട്ട് നാട്ടുകാരുടെ റിലേ സത്യഗ്രഹം തുടരുകയാണ്. അട്ടപ്പള്ളം ആക്ഷന് കമ്മിറ്റിയുടെ നേതൃത്വത്തില് ആണ് നാട്ടുകാരുടെ സമരം.
ഇതേ ആവശ്യവുമായി ഇന്നലെ മലപ്പുറം ജില്ലാ കോണ്ഗ്രസ് കമ്മിറ്റിയും ഉപവാസ സമരം നടത്തി. അന്വേഷണം പ്രഖ്യാപിക്കും വരെ സമരമെന്നാണ് കോണ്ഗ്രസിന്റെയും നിലപാട്. സിബിഐ അന്വേഷണം ആവശ്യപ്പെട്ട് കെപിസിസി പ്രസിഡന്റ് മുല്ലപ്പളളി രാമചന്ദ്രന്റെ നേതൃത്വത്തില് പാലക്കാട് ഏകദിന ഉപവാസം നടത്തിയിരുന്നു. സിബിഐ അന്വേഷണം ആവശ്യപ്പെട്ട് യുഡിഎഫ് ചൊവ്വാഴ്ച്ച പാലക്കാട് ഹര്ത്താല് ആചരിച്ചിരുന്നു.
അതേ സമയം വാളയാര് കേസില് പ്രതികള്ക്ക് സിപിഎം ബന്ധമുണ്ടെന്ന് ആരോപണം പെണ്കുട്ടികളുടെ അമ്മ ആവര്ത്തിക്കുകയാണ്. വാളയാര് കേസിലെ പ്രതികള്ക്ക് പാര്ട്ടിയുമായി ഒരു ബന്ധവുമില്ലെന്ന പാലക്കാട് ജില്ലാ സെക്രട്ടറിയുടെ വാദങ്ങള് പൂര്ണ്ണമായും പെണ്കുട്ടികളുടെ അമ്മ തള്ളിയിട്ടുണ്ട്.
