തിരുവനന്തപുരം: ഇടതു പാര്ട്ടി നേതാക്കളുടെ വാക്ക് കേട്ട് അരാജക വാദികളെ വളരാന് അനുവദിക്കരുതെന്ന് കേന്ദ്ര മന്ത്രി വി.മുരളീധരന്. പന്തീരാങ്കാവില് മാവോയിസ്റ്റ് ബന്ധം ആരോപിച്ചു കസ്റ്റഡിയില് എടുത്ത് യുഎപിഎ ചുമത്തിയ സംഭവത്തില് പ്രതികരിക്കുകയായിരുന്നു അദ്ദേഹം. ഭരണാധികാരികള് പാര്ട്ടി നേതാക്കള് പറയുന്നതിനൊത്ത് തുള്ളാനാണെങ്കില് ഭരണഘടന അല്ല പാര്ട്ടി നേതാക്കളാണ് വലുതെന്ന് ജനങ്ങളോട് പറയണമെന്നും അദ്ദേഹം. ഗാന്ധിജിയുടെ പാദസ്പര്ശമേറ്റ് പരിപാവനമായ മണ്ണിലൂടെ വി. മുരളീധരന്റെ നേതൃത്വത്തില് സംഘടിപ്പിച്ച ഗാന്ധിജി സങ്കല്പ്പ യാത്രയുടെ ഭാഗമായി മാധ്യമപ്രവര്ത്തകരോടു സംസാരിക്കുകയായിരുന്നു അദ്ദേഹം. വര്ക്കലയില് നിന്നു കല്ലമ്പലത്തേക്കാണ് യാത്ര.
യുഎപിഎ ചുമത്തിയത് നിയമപരമാണെങ്കില് നടപടി തുടരണം. തെറ്റായിരുന്നെങ്കില് ഉദ്യോഗസ്ഥര്ക്ക് എതിരെ നടപടി എടുക്കണം. ഇടതു അനുഭാവികള് ആയതു കൊണ്ട് അവര്ക്ക് എതിരെ നടപടി വേണ്ട എന്നാണ് സര്ക്കാര് തീരുമാനം എങ്കില് ഭരണഘടനയെ ബഹുമാനിക്കുന്നില്ലെന്നു സര്ക്കാര് ജനങ്ങളോട് പറയണമെന്നും വി.മുരളീധരന് പറഞ്ഞു.
