കൊച്ചി : മഞ്ജു വാര്യറും ശ്രീകുമാര് മേനോനും പരസ്പരം വിഴുപ്പലക്കാനുള്ള സാഹചര്യത്തിലേക്ക് എത്തിച്ചത് കാലത്തിന്റെ കാവ്യ നീതിയാണെന്ന് ബ്ലോഗറും ആക്ടിവിസ്റ്റുമായ കെ.പി. സുകുമാരന്. നിരാശ കാമുകന്റെ തേങ്ങല് എന്ന് തോന്നിപ്പിക്കും വിധത്തിലാണ് ശ്രീകുമാര് മേനോന് മഞ്ജുവിനെതിരെ ഫേസ്ബുക്കില് പോസ്റ്റിട്ടതെന്നും അദ്ദേഹം കുറ്റപ്പെടുത്തി.
സംവിധായകന് ശ്രീകുമാര് മേനോന് തന്നെ ഭീഷണിപ്പെടുത്തുന്നതായും അപായപ്പെടുത്തുമോയെന്ന് ഭയമുണ്ടെന്നും ചൂണ്ടിക്കാട്ടി മഞ്ജു വാര്യര് ഡിജിപിക്ക് കഴിഞ്ഞ ദിവസം പരാതി നല്കിയിരുന്നു. ഇതിനെ തുടര്ന്ന് മഞ്ജു വാര്യര് തന്റെ ബുദ്ധി ഉപയോഗിച്ച് നേട്ടം ഉണ്ടാക്കിയെന്നും അതിനുശേഷം ഉപകാര സ്മരണ പോലുമില്ലാതെയാണ് പരാതി നല്കിയത്. എന്ന വിധത്തില് ശ്രീകുമാര് മേനോന് ഫേസ്ബുക്കിലൂടെ കുറിപ്പ് എഴുതുകയും ചെയ്തിരുന്നു. ഇതിന്റെ പശ്ചാത്തലത്തിലാണ് കെ.പി. സുകുമാരന്റേയും പോസ്റ്റ്.
അതേസമയം നടിയെ ആക്രമിച്ച കേസില് ഗൂഢാലോചന ഉണ്ടെന്ന മഞ്ജുവിന്റെ പരാമര്ശം ദിലീപിനെ ഇല്ലായ്മ ചെയ്യാനുള്ള മറ്റൊരു നീക്കം ആയിരുന്നോ എന്ന സംശയത്തിന് ഇനി തെളിവുകള് പുറത്തുവന്നേക്കാമെന്നും അദ്ദേഹം പറഞ്ഞു. ദിലീപിനെ നിശ്ശേഷം ഇല്ലായ്മ ചെയ്യാനുള്ള മഞ്ജുവിന്റെ മറ്റൊരു ഗൂഢാലോചന ആയിരുന്നോ എന്ന് സംശയിക്കേണ്ടതായുണ്ട്. ദിലീപിനെ അന്യായമായി 86 ദിവസം ജയിലിലെ സിമന്റ് തറയില് കിടത്തിയതിന്റെ കാരണക്കാര്ക്ക് ശിക്ഷ ഏതെങ്കിലും രൂപത്തില് കിട്ടാതിരിക്കില്ലെന്നും സുകുമാരന് കുറ്റപ്പെടുത്തി.
കെ.പി. സുകുമാരന്റെ കുറിപ്പിന്റെ പൂര്ണ്ണരൂപം
ശ്രീകുമാര് മേനോന്റെ പോസ്റ്റ് വായിച്ചു. ഒരു നിരാശാകാമുകന്റെ തേങ്ങലാണ് ആ പോസ്റ്റിലെ വരികള്ക്കിടയില് എനിക്ക് വായിക്കാന് കഴിഞ്ഞത്. ശരിക്ക് പറഞ്ഞാല് ഞാന് ദിലീപിന്റെ ഫാന് ഒന്നുമല്ലായിരുന്നു. മലയാളത്തില് സത്യന് ശേഷം മോഹന്ലാലിനെ മാത്രമേ നല്ല നടനായി എനിക്ക് തോന്നിയിട്ടുള്ളു. എന്നാലും ദിലീപിന്റെ നിര്ദോഷമായ കോമഡികള് ആസ്വദിച്ചിരുന്നു.
നടിയെ പീഡിപ്പിച്ച കേസില് ദിലീപിനു യാതൊരു പങ്കും ഇല്ല എന്ന് മാത്രമല്ല, ദിലീപ് സ്വപ്നത്തില് കൂടി വിചാരിക്കാത്ത കാര്യമായിരുന്നു. നടിയെ പീഡിപ്പിക്കാന് ദിലീപ് ക്വട്ടേഷന് കൊടുത്തു എന്ന ആരോപണം എന്ന് എനിക്ക് ഉറപ്പായിരുന്നു. ദിലീപിനു അനുകൂലമായി പോസ്റ്റുകള് എഴുതിയത് കൊണ്ട് എനിക്ക് കുറേ തെറികള് കേള്ക്കേണ്ടി വന്നു, എന്ന് മാത്രമല്ല കുറേ സ്ത്രീസുഹൃത്തുക്കളെ നഷ്ടപ്പെടുകയും ചെയ്തിരുന്നു.
ജയിലില് ആകുന്നത് വരെയും സ്വയരക്ഷയ്ക്ക് ദിലീപ് ഒന്നും ചെയ്തില്ല. എന്നതും ജയിലില് നിന്ന് തെളിവെടുപ്പിനു കൊണ്ടുപോകുമ്പോള് കൂകിവിളിക്കുന്ന ആള്ക്കൂട്ടത്തിനു മുന്നിലൂടെ നിഷ്കളങ്കഭാവത്തില് തലയുയര്ത്തി ദിലീപ് നടന്നതും മകള് മീനാക്ഷി ദിലീപിന്റെ കൂടെ നിന്നതും എല്ലാം ചേര്ത്ത് നിരീക്ഷിച്ചപ്പോള് എനിക്ക് ഉറപ്പായിരുന്നു ദിലീപ് നിരപരാധി ആണെന്ന്.
ദിലീപ് അന്യായമായി കേസില് പ്രതി ചേര്ക്കപ്പെട്ട് ജയിലില് അടയ്ക്കപ്പെട്ടതും ആള്ക്കൂട്ടം ദിലീപിനെ കുറ്റവാളിയായി വിധിയെഴുതിയതു കൊണ്ടൊക്കെ എനിക്ക് ദിലീപിനോട് വല്ലാത്ത സ്നേഹം ഉണ്ടാകുന്നതിന് കാരണമായിട്ടുണ്ട്. ഇന്നിപ്പോള് മഞ്ജു വാരിയരും ശ്രീകുമാര് മേനോനും നേര്ക്കുനേര് നിന്ന് വിഴുപ്പലക്കാനുള്ള സാഹചര്യം ആണ് ഉണ്ടായിട്ടുള്ളത്. അത് കാലത്തിന്റെ ഒരു കാവ്യനീതിയാണ്. കുറേ കാര്യങ്ങള് ഇനി പുറത്ത് വരും.
ഇരയായ നടി പീഡിപ്പിക്കപ്പെട്ടതില് ഗൂഢാലോചന നടന്നിട്ടുണ്ട് എന്ന് ആദ്യമായി പ്രഖ്യാപിച്ചത് മഞ്ജുവാരിയര് ആണ്. അങ്ങനെയാണ് ആ ഗൂഢാലോചനയുടെ സൂത്രധാരത്വം ദിലീപിലേക്ക് ചെന്നെത്തുന്നതും ദിലീപ് ജയിലില് അടയ്ക്കപ്പെടുന്നതും. മഞ്ജു വാരിയറുടെ ആ ഗൂഢാലോചനാ സിദ്ധാന്തം ദിലീപിനെ നിശ്ശേഷം ഇല്ലായ്മ ചെയ്യാനുള്ള മറ്റൊരു ഗൂഢാലോചന ആയിരുന്നോ എന്ന സംശയത്തിനു ഇനി തെളിവുകള് പുറത്ത് വന്നേക്കാം.
കാരണം, അയ്യോ പാവം മട്ടിലുള്ള ശ്രീകുമാര് മേനോന്റെ ഫെയ്സ്ബുക്ക് പോസ്റ്റ് മഞ്ജു വാരിയറെ അക്ഷരാര്ത്ഥത്തില് അപമാനിക്കുന്നതാണ്. 1500 രൂപ മാത്രം ബാക്കിയായി പാപ്പരായ മഞ്ജുവിന് പരസ്യചിത്രത്തിനു അഡ്വാന്സായി 25 ലക്ഷത്തിന്റെ ചെക്ക് കൊടുത്ത് ഉയര്ത്തിക്കൊണ്ട് വന്നത് താന് ആണെന്നും തനിക്കെതിരെ ഡിജിപിക്ക് പരാതി കൊടുത്തതില് മഞ്ജുവിന്റെ ദിവംഗതനായ പിതാവിന്റെ ആത്മാവ് തനിക്കൊപ്പം ദുഃഖിക്കുന്നുണ്ടാകും എന്നൊക്കെ ശ്രീകുമാര് മേനോന് പരസ്യപ്പെടുത്തുമ്പോള് മഞ്ജു വാരിയര്ക്ക് മിണ്ടാതിരിക്കാന് പറ്റുമോ? സത്യങ്ങള് വെളിയില് വരട്ടെ. ദിലീപിനെ അന്യായമായി 86 ദിവസം ജയിലിലെ സിമന്റ് തറയില് കിടത്തിയതിന്റെ കാരണക്കാര്ക്ക് ശിക്ഷ ഏതെങ്കിലും രൂപത്തില് കിട്ടാതിരിക്കില്ല.
