തിരുവനന്തപുരം: ശ്രീകുമാര് മേനോനെതിരെ നടി മഞ്ജുവാര്യര് ഉന്നയിച്ച ഗുരുതര ആരോപണങ്ങള് പോലീസിലെ പ്രത്യേക സംഘം അന്വേഷിക്കും. ഡിജിപിയുടെ നിര്ദേശാനുസരണമാണ് പ്രത്യേക അന്വേഷണ സംഘം രൂപികരിച്ചിരിക്കുന്നത്. പോലീസ് ആസ്ഥാനത്തെ ഡിവൈഎസ്പി രാജ്കുമാറിന്റെ മേല്നോട്ടത്തില് സിഐ പ്രകാശാണ് കേസ് അന്വേഷിക്കുന്നത്. പോലീസ് ശ്രീകുമാര് മേനോന്റെ മൊഴിയെടുക്കും. ശ്രീകുമാറിന്റെ സുഹൃത്തിനെയും ചോദ്യം ചെയ്യും.
ശ്രീകുമാര് മേനോന് തന്നെ വധിക്കുമെന്ന് നിരന്തരം ഭീഷണിപ്പെടുത്തുന്നതായികാട്ടി മഞ്ജുവാര്യര് ഇന്നലെയാണ് ഡിജിപിയ്ക്ക് പരാതി നല്കിയത്. ശ്രീകുമാര് മേനോന് തന്നെ അപകടത്തില്പ്പെടുത്താന് ശ്രമിക്കുമോ എന്ന ഭയം ഉണ്ട്. തനിക്കൊപ്പമുള്ളവരെ ഇയാള് നിരന്തരം ഭീഷണിപ്പെടുത്തുന്നു. വിവിധ ആവശ്യങ്ങള്ക്കായി ശ്രീകുമാര് മേനോന് കൈമാറിയ ലെറ്റര് ഹെഡും രേഖകളും ഇയാള് ദുരുപയോഗം ചെയ്യാന് സാധ്യതയുണ്ടെന്നും മഞ്ജുവാര്യര് ഡിജിപിയെ നേരില് കണ്ടു നല്കിയ പരാതിയിലുണ്ട്. നേരത്തെയും ശ്രീകുമാറിനെതിരെ മഞ്ജുവാര്യര് ആരോപണം ഉന്നയിച്ചിരുന്നു. ഇന്നലെ വൈകിട്ടാണ് മഞ്ജുവാര്യര് തിരുവനന്തപുരത്തെത്തി സംസ്ഥാന പൊലീസ് മേധാവിയെ നേരില് കണ്ടത്.
മോഹന്ലാലിനെ നായകനാക്കി ശ്രീകുമാര് മേനോന് സംവിധാനം ചെയ്ത ഒടിയന് എന്ന ബിഗ് ബജറ്റ് സിനിമയില് മഞ്ജുവാര്യരായിരുന്നു നായികാവേഷത്തിലെത്തിയത്. സിനിമയ്ക്ക് ശേഷം സമൂഹമാധ്യങ്ങളിലൂടെ തനിക്ക് നേരെ നടക്കുന്ന ആക്രമണത്തിന് പിന്നില് ശ്രീകുമാര് മേനോനും ഇയാളുടെ സുഹൃത്തുമാണെന്ന് മഞ്ജു പറയുന്നു. തന്നെ സിനിമയില് നിന്ന് പുറത്താക്കാനാണ് ഇയാള് ശ്രമിക്കുന്നത്. മഞ്ജു എഴുതി തയാറാക്കിയ പരാതിയില് സാമ്പത്തിക ചൂഷണവും, ഭീഷണിയും കൂടാതെ അപായപ്പെടുത്താനുള്ള ശ്രമവും ഉണ്ടായിയെന്ന് പറഞ്ഞതോടെ പുതിയ ഒരു വിവാദത്തിനാണ് തുടക്കമിട്ടിരിക്കുന്നത്.
