കൊച്ചി : എറണാകുളം നഗരത്തിലെ വെള്ളക്കെട്ട് പ്രശ്നത്തില് കൊച്ചി കോര്പ്പറേഷന് പരാജയമെന്ന് ഹൈക്കോടതി. അവരെക്കൊണ്ട് ഈ ജോലി പറ്റില്ലെങ്കില് സര്ക്കാര് ഭരണം ഏറ്റെടുക്കണം. എന്തുകൊണ്ട് ചെയ്യുന്നില്ലെന്നും കോടതി നഗരസഭയെ രൂക്ഷമായി വിമര്ശിച്ചു. വെള്ളക്കെട്ട് പ്രശ്നം രാവിലെ അമിക്കസ് ക്യൂറി പ്രതിപാദിച്ചപ്പോഴാണ് കോടതി ഇത്തരത്തില് പ്രതികരിച്ചത്.
നൂറുകണക്കിന് മനുഷ്യരാണ് ഇവിടെ വെള്ളത്തില് ജീവിക്കുന്നത്. കൊച്ചിന് കോര്പ്പറേഷന് ഇതിനെതിരെ എന്ത് നടപടിയാണ് സ്വീകരിച്ചത്. സര്ക്കാരും എന്താണ് ചെയ്തതെന്നും കോടതി ചോദിച്ചു. വെള്ളക്കെട്ട് പ്രശ്നത്തില് നഗരസഭയെ ന്യായീകരിക്കുകയും ഉദ്യോഗസ്ഥര്ക്കുമേല് പഴിചാരി മേയര് സൗമിനി ജെയ്ന് പ്രസ്താവന നടത്തിയതിനു പിന്നാലെയാണ് ഹൈക്കോടതിയുടെ ഈ രൂക്ഷ വിമര്ശനം. വിഷയത്തില് ജനങ്ങളുടെ ഒരു മൂവ്മെന്റ് ഉണ്ടായി വരണമെന്നും കോടതി അറിയിച്ചു. ഇതുസംബന്ധിച്ച കേസ് ബുധനാഴ്ച്ച കോടതി പരിഗണിക്കും.
അതേസമയം വെള്ളക്കെട്ട് പ്രശ്നത്തില് കോര്പ്പറേഷനെ പഴിക്കുന്നതില് അര്ത്ഥം ഇല്ലെന്നും നഗരസഭക്ക് സാധ്യമായതെല്ലാം ചെയ്തുവെന്നുമാ ണ് മേയര് സൗമിനി ജെയ്ന് ന്യായീകരിക്കുന്നത്. വിഷയത്തില് ഉദ്യോഗസ്ഥര് കൂടുതല് കാര്യക്ഷമമായി ഇടപെടേണ്ടത് ആയിരുന്നുവെന്നും കുറ്റപ്പെടുത്തി.
ഇപ്പോള് നഗരത്തില് ഉള്ളത് പരിചയം ഇല്ലാത്ത ഉദ്യോഗസ്ഥര് ആണെന്നായിരുന്നു വിമര്ശനം. പ്രശ്നത്തില് സര്ക്കാര് ഇടപെടുന്നത് സ്വഭാവികം മാത്രമാണ്. വെള്ളക്കെട്ടിന് കാരണം ഓടകളിലേക്ക് ജനങ്ങള് മാലിന്യം തള്ളുന്നതാണെന്നും മേയര് കൂട്ടിച്ചേര്ത്തു.
